Report Dagiti Manangiwaragawag ti Pagarian
Agyamyamankay Aya Gapu iti Ministerio Publiko?
TI MINISTERIO a panagbalaybalay ket nainkasuratan ket nalatak dagiti Saksi iti intero a lubong iti daytoy a paset ti serbisioda iti publiko. (Aramid 20:20, 21) Kuna ni Jesus kadagiti pasurotna: “Umawatkayto ti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” (Aramid 1:8) Ipakpakita ti Aramid 5:42 a dagiti immuna a Kristiano ket “nagbalaybalayda” nga awan sardayna.
Idiay Haiti adda ti komprontasion maipapan iti panagbalaybalay a ministerio dagiti Saksi ni Jehova. Rimsua daytoy idi a ti maysa nga espesial a payunir ti nakasarak ti maysa a napeklan a babai a Protestante. Bayat ti panagpatpatangda, intudo ti kabsat a dagiti laeng Saksi ni Jehova ti mangaskasaba manipud balaybalay kas imbalabala ti Biblia. Simmungbat ti babai a dagiti miembro met ti relihionna mabalinda ti agbalaybalay ket ar-aramidenda dayta sagpaminsan. Pudno unay, iti sumaganad a Sabado, nasabat ti Saksi ti maysa a grupo nga agbalaybalay nga idadauluan daytoy a babai. Addada agarup sangagasut iti dayta a grupo. Ti babai, a medio maipagpannakkelna daytoy a nagapuananna, inawisna ti kabsat tapno maimatangan daytoy nga ar-aramidenda.
Maysa a lawas kamaudiananna, ti isu met laeng a babai ti nangidaulo ti sabali pay a grupo ket maragsakan a nangitudo manen iti daytoy iti kabsat. Ti kabsat, nupay kasta, kunana nga adda laeng ti kagkagudua iti bilangda ngem iti lawas sakbayna. Iti maikapat a Sabado ti grupo ti bimmassiten iti 20, ket iti maikalima a Sabado daydiay babai ti agbukbukoden. Sipapakumbaba, isu ti immay iti kabsat ket inaminna: “Dagiti laeng Saksi ni Jehova ti addaan kinapudno, ta isuda laeng ti makapagtultuloy iti trabaho a panangaskasaba iti linawanlawas.”
Tinukonan ti espesial a payunir ti babai iti maysa a panagadal ti Biblia a mangipakpakita kenkuana no apay a dagiti Saksi ti makapagtultuloy a mangaskasaba iti binalaybalay ken no apay a dagiti dadduma ket saanda a makapagtultuloy. Inawat ti babai dayta. Isu ken ni lakayna nangrugidan a makipagadal ket rumangrang-ayda metten. Isuda a dua ti makitimtimpuyogen kadagiti Saksi ni Jehova, a sireregta a manangiwaragawag ti Pagarian iti publiko ken iti binalaybalay!
Ti ministerio a panagbalaybalay ken dadduma pay a pamay-an ti ministerio iti publiko isu dagiti nakaskasdaaw ken naayat a sagana nga inyurnos ni Jehova a panangsapul kadagiti nasingpet panagpuspusona ken tapno tulongan ida a makaammo kadagiti al-alagadenna a maipaay iti biag. Gapu itoy, siraragsak a makiranranud dagiti Saksi ni Jehova iti daytoy ken kadagiti dadduma pay a paset ti sagrado a serbisioda iti Dios. Ti kababalinda ket umasping iti kababalin ni apostol Pablo a nagkuna: “Agyamanak iti daydiay namapigsa kaniak, a ni Kristo Jesus nga Apotayo, gapu ta imbilangnak a matalek a dinutokannak iti ministerio.”—1 Timoteo 1:12.