Panangasaba iti Binalaybalay
1. Ania a saludsod ti tumaud mainaig iti panagbalaybalay a ministerio, ken apay?
1 “Dagidiay nakapadas iti nagduduma a pamay-an ti panangisaknap iti Kinapudno umanamongda a ti kampania a panangasaba iti binalaybalay babaen ti libro a MILLENNIAL DAWN ti kaepektibuan pay laeng a pamay-an ti panangikasaba iti Kinapudno, iti agdama a tiempo.” Dagita a sasao iti Hulio 1, 1893, a ruar ti Zion’s Watch Tower itampokna ti kinapateg ti panagbalaybalay a ministerio. Dagiti tattao iti intero a lubong matmatanda dayta kas pakabigbigan dagiti Saksi ni Jehova. Epektibo pay laeng kadi daytoy a pamay-an, nupay kadagiti dadduma a pagilian ket narigat a madanon dagiti tattao iti pagtaenganda?
2. Ania a Kasuratan ti nakaibatayan ti panangasaba iti binalaybalay?
2 Nainkasuratan ken Napateg: Nainkasuratan ti panangasaba iti binalaybalay. Binilin ni Jesus dagiti 70 nga adalanna a mapanda a sagdudua kadagiti pagtaengan dagiti tattao. (Luc. 10:5-7) Di nagbayag kalpasan ti ipapatay ni Jesus, kuna ti Biblia maipapan kadagiti adalanna: “Tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag.” (Ara. 5:42) Naregta met ni apostol Pablo a nangisuro iti binalaybalay.—Ara. 20:20.
3. Ania dagiti sumagmamano a pagsayaatan ti panangasaba iti binalaybalay?
3 Ti panangasaba iti binalaybalay ket napateg pay laeng a pamay-an iti panangisaknap iti naimbag a damag ita. Tulongannatayo a ‘mangbirok’ kadagiti maikari iti sistematiko ken organisado a pamay-an. (Mat. 10:11) Kaaduanna a kalmado dagiti tattao iti pagtaenganda. Babaen ti pannakisaritatayo kadakuada iti rupanrupa—pannakangngeg iti timekda, pannakakita iti ekspresion ti rupada, ken pannakapaliiw iti aglawlawda—maammuantayo ti paginteresan ken pakaseknanda. Masansan a mangipaay dayta iti kasayaatan a gundaway tapno maitultuloytayo ti saritaan.
4. Ania ti aramidentayo tapno nabungbunga ti panangasabatayo iti binalaybalay?
4 Mangaramidkayo Kadagiti Personal a Panagbalbaliw: Sidadaan ni apostol Pablo a nangaramid kadagiti personal a panagbalbaliw ‘maigapu iti naimbag a damag.’ (1 Cor. 9:23) Nalabit baliwantayo ti eskediultayo tapno mawayaantayo ti mangasaba kadagiti tiempo nga ad-adun a tattao ti adda kadagiti pagtaenganda, kas iti mumalem, kadagiti ngudo ti lawas, wenno bakasion. Ilistayo dagiti pagtaengan nga awan dagiti bumalayna, ket padasenyo ti sumarungkar iti sabali nga aldaw ti lawas wenno sabali nga oras ti aldaw.
5. Kasano a dagidiay nakapuy ti salun-atda mabalinda ti makiraman iti trabaho a panagbalaybalay?
5 Mabalin a makiraman iti panangasaba iti binalaybalay uray dagidiay nakapuyen ti salun-atda. Mabalin nga iplanotayo nga ikuyog ida kadagiti nalaka a madanon a pagtaengan, a bay-antayo nga agtrabahoda sigun iti kabaelanda. Adda kabsat a babai a marigatan nga aganges isu a maysa laeng a balay ti kabaelanna a sarungkaran iti kada 30 minuto. Ngem anian a ragsak ken pannakapnekna idi nakiraman iti grupo a panangasaba!
6. Apay a rumbeng a pagbalinentayo a regular a paset ti ministeriotayo ti panangasaba iti binalaybalay?
6 Adu a marakarnero ti agtultuloy a masarsarakan gapu iti trabaho a panagbalaybalay. Adda agibumbunannag a nagtuktok iti ridaw ket kinuna ti bumalay kenkuana: “Sumrekka. Ammok no siasinoka. Ikarkararagko iti Dios a mangibaon koma iti tumulong kaniak, kalpasanna nangngegko nga adda nagtuktok iti ridaw. Impangagnak ti Dios ket imbaonnaka.” Dagiti nagsayaat a resulta ket pammaneknek a bembendisionan ni Jehova daytoy a pamay-an ti panangasaba. (Mat. 11:19) Ikagumaanyo koma a pagbalinen a regular a paset ti ministerioyo ti panangasaba iti binalaybalay.