Baro a Programa iti Aldaw ti Espesial nga Asamblea
1 Ti panangadal Ti Katan-okan a Tao a Nagbiag Pay Laeng isut’ nangparayray ti panangipategtayo ken Jesu-Kristo. Apagtutop, ti programa iti aldaw ti espesial nga asamblea a mangrugi inton Marso ti naputar iti tema a “Nasinged a Panangsurot iti Naindaklan a Paguadan,” a tumulong kadatayo a mangawat iti ad-adu no ania ti kaipapanan iti panangsurot kenkuana.
2 Aniaman ti edad wenno tawentayo iti kinapudno, amintayo a tumabuno iti asamblea ti lalo pay a maparegta nga agbalin a kas ken Kristo. Adda paset ti programa a nangruna a pammagbaga kadagiti agtutubo. Kabalanna ida a makirupak kadagiti karit maipapan iti edukasion, paglinglingayan, ken ti materialismo. Addanto dagiti palawag, kapadasan, ken demostrasion a mangilawlawag no kasano a masaranget iti impluensia ti lubong ken maisukog iti bagi ken Kristo.—1 Ped. 2:21.
3 Dagiti baro a dedikado a tattao ti maaddaan iti gundaway a mangipanayag iti publiko ti bautismoda kas pasurot ni Kristo. Maysa a makapaganaygay a Nainkasuratan a diskusion iti tema ti umuna a mangngeg sakbay iti seremonia ti bautismo. Amin dagiti agngayangay a mabautisaran iti aldaw ti espesial nga asamblea isudat’ mangibaga iti nasakbay a tiempo iti mangidaulo a manangaywan tapno maiyurnos dagiti panglakayen ti panangwanas kadagiti naituyang a saludsod kadagiti kandidato iti bautismo.
4 Maysa a sangaili a pumapalawag, no adda, ti mangidatag iti kangrunaan a palawag, a natituluan ti “Panangsurot iti Naindaklan a Paguadantayo—Iti Ania ti Pakaiturongantayo?” Siguruenyo nga awisen dagiti amin nga interesado a tattao iti daytoy makaparegta ken makapabileg ti pammati a programa. Awanen iti dakdakkel pay a makagunggona a kurso ngem ti panangsurot iti Naindaklan a Paguadantayo, Ni Jesu-Kristo.—Mat. 19:27-29.