Ti Kinadalus Mangidayaw ti Dios

¹ Ti Mosaiko a Linteg naglaon iti nainget a reglamento maipapan ti kinadalus. Insina dagitoy ti Israel a kas tattao a nadalus iti pisikal ken espiritual. (Lev. 11:35, 36; 15:1-11; Isa. 52:11) Daytoy a nadalus a kasasaad ti nangidayaw ti Dios ken nangted ti salun-at iti nasion.

² Ita met, ti kinadalus isut’ pakailasinan a marka dagiti tattao ni Jehova. Ngem bayat nga ipabigbigna daytoy dagiti tattao ni Jehova a kas grupo, pudno kadi dayta kadatayo iti tunggal maysa? Ti pannakaseknan iti personal a kinadalus isut’ mangisarming no kasano ti panangipategtayo kadagiti reglamento ni Jehova.

³ Kasano ngay ti langa iti pagtaengantayo? Mangibaw-ing ngata manipud iti mensahe ti Pagarian? Posible kadi nga agduadua dagiti dadduma iti kinapudnotayo no agsaotayo maipapan ti panagbalin daytoy daga a paraiso bayat a narugit ti bukodtayo a pagtaengan ken nagbalin a karuotan iti arubayantayo? No ti balaytayo ket nagulo ti langana wenno agalingasaw ti angot gapu iti saan a nadalus a kababalin, makuna ngata a napatanortayo iti “padron ti kinadalus a maibagay idiay baro a lubong iti sidong ti Pagarian ti Dios”?​—om p. 130.

⁴ Kasano met ti kawestayo, bag ti libro, ken personal a panagarwattayo? Nadalus ken presentableda kadi? Maiparbeng a salimetmetan ti bagi ken kawestayo a nadalus babaen iti regular a panagdigos ken panaglaba.​—w89 6/1 p. 16-19.

⁵ Kasano ngay no ti katatao iti maysa a kabsat ken ti arubayanna ket pakaumsian iti kongregasion? Nalabit a kasapulanna laeng ti bassit a naayat a tulong gapu iti edad ken kinabaldado. No kasta, maysa a kinaasi ti panangtulong kenkuana. Nalabit nga adda problema ti maysa a kabsat ken saanna a madlaw dayta; ti naanus a balakad ti mangtignay kenkuana a mangpasayaat ti kasasaad. Tunggal maysa a nalaad unay ti ehemplona iti daytoy a banag ti saan a maikari kadagiti naiduma a pribilehio iti kongregasion. Siempre, annadan dagiti panglakayen ti mangituyang iti bukodda pagalagadan wenno pagayatan.

⁶ Gagangay a nagagartayo a mangyeg ti awis kadagiti interesado a tattao a tumabuno iti gimong agsipud ta dagiti Kingdom Halltayo ket makaatrakar ken nadalus. Kitaenyo ti aglawlaw ti patakderyo. Dagiti kadi tugaw, suelo, ken pader ket nadalusda? Regular aya a madalusan dagiti kasilias? No nairuamtayon a kumita iti narugit a suelo wenno pader nga agkulatlat ti pintorana, mabalin a matmatanen a kas maawat. Nupay kasta, saan a makapabur iti kapaliiwan dagiti bisita. Aramidentayo koma ti kasayaatantayo a mangtaginayon nga atraktibo iti patakder, a tunggal maysa aramidenna ti pasetna iti kanito a masapul a madalusan ken maarwatan.

⁷ Agpapan pay awan ti sao, maidayawtayo iti Dios babaen ti personal a langa ken kinadalimanet iti pagtaengan, kotse, ken Kingdom Halltayo. Ti ehemplotayo ti saan laeng a mangted iti aniaman a pakaitibkolan ngem mangipakita met a ti panagdayawtayo ket nadalus ken nalinteg.​—1 Cor. 10:31, 31; Sant. 1:27.