Sipapanunot iti Magasin Bayat ti Oktubre
1 Linaon Ti Pagwanawanan ken Agriingkayo! ti makaparegta a mensahe ti agnanayon a naimbag a damag. Ti sipapanunot iti magasin kaipapananna ti naannad a panangbasa kadakuada tapno amirisen no kasano a makaay-ayo dagiti artikulo iti tattao iti teritoriatayo.
2 Umuna, pamiliarkay koma kadagiti artikulo a naitampok iti akkub. Masansan a makatignay iti bumalay a mangala iti magasin dagiti mismo nga ilustrasion iti akkub. Pilien dagiti artikulo a makaawis kadagiti tattao iti teritoriayo. Kaaduanna kadi ket maymaysa ti relihion dagiti tattao? Ania dagiti kangrunaan a pakaseknanda? No sipapanunotkay kadagitoy a punto, makaisaganakayo iti epektibo a presentasion. Kitaenyo dagiti naikabil iti baba.
3 No ituktukonyo ti Oktubre 1 a “Pagwanawanan,” mabalin nga iparangyo ti artikulo a “Ti Biblia—Aniat’ Pudpudno a Pategna?” Mabalinyo nga ikuna:
◼ “Adda Biblia a masarankanyo iti adu a balbalay iti komunidadtayo. Adu kadakuada ti mamati a naglaon dayta iti banag a napateg unay.” Kalpasanna mabalinyo nga isaludsod: “Aniat’ pagarupyo a mamagbalin a naisangsangayan ti Biblia?” Kalpasan a sumungbat ti bumalay, mabalinyo nga ikuna: “Aglaplapusanan dagiti ebidensia a mangpaneknek a ti Biblia ket impaltiing ti Dios ken mapagpiaran a giyatayo. Linaonna dagiti pannakaammo a mangitunda kadatayo iti agnanayon a biag. [Basaen ti Juan 17:3.] Adut’ tao a mangraem iti dayta ngem dida ammo nga usaren. Daytoy nga artikulo Ti Pagwanawanan ilawlawagna no kasano a personal a mabalinyo nga usaren ti Biblia a mangsapul kadagiti sungbat ti salsaludsodyo maipapan iti masanguanan.” Ilawlawagyo ti urnos maipapan iti suskripsion sayo itukon dayta iti bumalay.
4 No usarenyo ti Oktubre 15 a “Pagwanawanan,” mabalin a kaykayatyo ti simple a yaasideg a kas itoy:
◼ “Gistay tunggal maysa adda pimmusayen nga inay-ayatna. Daytoy nga artikulo pataudenna ti saludsod nga: ‘Aniat’ Kasasaad Dagiti Natay?’ Ti panagkunayo, aniat’ mapasamak no matay ti maysa a tao? [Palubosan a sumungbat.] No kayatyo a maammuan no kasano a sungbatan ti Biblia dayta a saludsod, maragsakanak a mangibati iti daytoy a kopia ti magasin kadakayo. Kasta met, mabalin nga awatenyo a regular daytoy a magasin babaen iti suskripsion.”
5 Usigen ti Oktubre 22 nga “Agriingkayo!” iti maysa kadagiti adu nga ebidensia a mangipakita ti pannakapaay ti palso a relihion. No usarenyo ti artikulo a “No Makinamin ti Relihion iti Gubat,” mabalinyo nga isaludsod:
◼ “No adda koma ni Jesus ditoy ita, kasanot’ pagarupyo a riknana maipapan kadagiti amin a kinaranggas iti aglawlawtayo? [Palubosan a sumungbat.] Insuronatay ni Jesus a mangayat iti isuamin, uray dagiti kabusortayo. Kaskasdi, adu a relihion nga agkunkuna a Kristianoda ti makinamin kadagiti napolitikaan a riri. Kasanot’ panagkunayo a panangapektar dayta kadagiti tao a mayat nga agbiag sigun iti insuro ni Jesus? [Palubosan a sumungbat.] Salaysayen daytoy a ruar ti Agriingkayo! dayta makariribuk a saludsod ken ilawlawagna no kasano a sungbatanto dayta ti Pagarian ti Dios.”
6 Reggetanyo nga itukon dagiti magasin iti tunggal ruangan, uray no dikay maaramat ti Biblia. Wen, agbalinkay a sipapanunot iti magasin bayat ti Oktubre!