Siaayat a Tulongan Dagidiay Mangipakita ti Interes
1 Idi inturong ti anghel ni Jehova ni Felipe iti Etiope a nangipakita iti pudno nga interes iti Saot’ Dios, siaayat a tinulonganna idi a mangtarus iti basbasaenna. (Ara. 8:26-39) Adda aya naisangsangayan a panangikagumaantayo a tumulong kadagidiay mangipakita ti interes? Aniat’ maaramidantayo tapno matulongan ida?
2 Mangilasinkay iti tiempo nga agsarungkar iti kada lawas. Ituloyyo dagiti punto a nagsaritaanyo iti umuna nga isasarungkaryo. Laglagipenyo ti kalat nga irugi ti panangyadal ti Biblia. Regular a sumarungkarkayo tapno itukon dagiti kaudian a ruar ti magasin. No interesado, mabalinyo nga itukon ti suskripsion.
3 No pakisaritaanyo ti kinapateg ti Biblia iti damo nga isasarungkaryo, mabalin nga ituloy ti panagpapatang babaen ti panangusar iti singasing manipud panid 76 ti libro a “Panakirinnason” sayo kuna:
◼ “Patien dagiti dadduma a saanen a praktikal ti balakad ti Biblia iti moderno a lubongtayo. Aniat’ makunayo iti dayta? [Palubosan a sumungbat.] Saankay kadi nga umanamong a ti libro a mangipaay iti balakad no kasano a maaddaan iti naragsak a pamilia ket praktikal? [Palubosan nga agkomento.] Dagiti pamilia a mangyap-aplikar iti kunaen ti Biblia ket kaaduanna natibker ken naragsakda.” Basaen ti Colosas 3:18-21.
4 Mabalinyo nga irugi ti pannakisarita maipapan iti kasasaad dagiti natay iti kastoy:
◼ “Aniat’ pagarupyo a mapasamak kadatayo no mataytayo? [Palubosan a sumungbat.] Isuro ti kaaduan a relihion nga agtultuloytayo nga agbiag iti sabali a kasasaad. Adu dagiti nasdaaw a makaammo no aniat’ kuna ti Biblia maipapan iti daytoy a banag. [Basaen ti Eclesiastes 9:5.] Idinto ta awan puot dagiti natay, saanda a nalipatan. Inkari ti Dios a pagungarennanto ida iti sidong ti Pagarianna.” Luktanyo ti Oktubre 15, 1994, a Pagwanawanan wenno iti panid 162 iti libro nga Agbiag nga Agnanayon, ket ilawlawagyo dagiti kasuratan ken ilustrasion. Yurnosyo ti panagsubli tapno mairugi ti panangyadal ti Biblia.
5 No kayatyo nga ilawlawag iti ad-adu pay maipapan ti Nakristianuan a panangmatmat iti panaggugubat ti nasnasion, mabalinyo nga ikuna:
◼ “Patien dagiti dadduma a ti panaggugubat ti kakaisuna a wagas a pangrisut kadagiti di pagkikinnaawatan. Aniat’ makunayo iti dayta? [Palubosan a sumungbat.] Ipakita ti Biblia a kayat ti Dios nga agbiag dagiti tao iti kappia. [Basaen ti Roma 12:17, 18.] Pumaysonto dayta iti intero a lubong iti sidong ti Pagarian ti Dios.” Kitaenyo ti broshur a Pudno Aya a Maseknan ti Dios Kadatayo?, pinanid 25-6. Itukon ti panagsubliyo iti sabali a tiempo maipaay iti kanayonan a panangilawlawag.
6 Inadmitir ti eunuko nga Etiope a dina maawatan no awan mangiwanwan kenkuana. (Ara. 8:31) Isut’ siaayat a tinulongan ni Felipe. Mabalin nga ipakitatay ti panagayat maipaay iti sabsabali babaen iti panangtulong kadakuada iti isu met laeng a wagas.