Ipakita ti Napaypayso a Pannakaseknan iti Amin a Nasarakan nga Interes
1 Naganetget ti panagtrabaho dagidiay adda iti organisasion ni Jehova. Dandanin agpatingga ti sangalubongan a pannakaiwaragawag ti Pagarian, a kalpasan dayta madadaelto amin dagidiay “di makaammo iti Dios.” (2 Tes. 1:7-9) Gapuna, ti napaypayso a pannakaseknan iti biag dagiti sabsabali tigtignayenna ti ili ni Jehova a mangidanon iti mensahe ti Pagarian iti kaaduan a tattao agingga iti mabalin.—Sof. 2:3.
2 Iti binulan, minilion nga oras ti mabusbusbos iti panangbirok kadagidiay mayat nga agimdeng “kadagiti naimbag a damdamag ti kinaimbag.” (Isa. 52:7) Iti pannakaitukon dagiti agdama a literatura, adu ti umaw-awat iti Pagwanawanan ken Agriingkayo! wenno ti broshur nga Ania ti Kalikaguman ti Dios Kadatayo? Ti napaypayso a pannakaseknan kadagitoy a tattao rumbeng a tignayennatayo nga agtultuloy a mangparayray iti amin a nasarakan nga interes.—Prov. 3:27.
3 Salimetmetanyo Dagiti Umiso a Rekord: Ad-adu ti magapuanan iti panangsalimetmet iti kompleto ken umiso a rekord iti nasarakan nga interes. Ti impormasion a kas iti nagan ken direksion ti bumalay, aldaw ken oras ti isasarungkaryo, literatura a naipaima, ken ti tema a napagsasaritaan tulongannakayo nga agbalin a mas epektibo inton agsublikayo. Kasta met, no isuratyo ti sumagmamano a komento ti bumalay iti damo a panagsaritayo, mabalinyo a dakamaten dagitoy inton itultuloyyo ti diskusion iti panagsarungkaryo.
4 Dagdagusenyo ti Sumarungkar: Mano ti nasarungkaranyon kadagidiay napaimaanyo iti literatura idi napan a bulan? Napalabas kadin ti adu a lawas a diyo pay nasurnadan? Ti napaypayso a pannakaseknan iti pagimbaganda ti mangtignay koma kadakayo nga agsubli iti kabiitan a tiempo, a kasayaatan iti las-ud ti sumagmamano nga aldaw, tapno silalagipda pay laeng iti napagsasaritaan. Babaen ti panagsubli a dagus, malapdanyo ti panangikagumaan ni Satanas sakbay nga “umay ket ikkatenna ti sao a naimula kadakuada.”—Marcos 4:15.
5 Nasken ti Panagsagana: Ti kinaepektiboyo nga agsarungkar agpannuray iti kinasayaat ti panagsaganayo. Ti makinlikud a panid ti Abril 1997 a Ministeriotayo iti Pagarian mangipaay iti sumagmamano a presentasion a mabalin nga usaren no itukonyo dagiti magasin wenno ti broshur a Kalikaguman. Ti sumaganad a banag ket ti panangpanunot iti sumagmamano a punto a dakamatenyo inton agsublikayo. Ania ti mabalin nga ibaga a pangsurnad iti interes? Kasano a mairugi ti panagadal iti Biblia? Mabalinyo a padasen dagitoy a singasing.
6 Inton itultuloyyo ti diskusion maipapan kadagiti kasapulan a maaramid tapno madalusan ti daga ken mapagbalin a paraiso, mabalinyo nga ibaga:
◼ “Iti napalabas nga isasarungkarko, napagsaritaanta a kasapulan dagiti nainget nga addang sakbay a mapagbalin ti daga a natalna a paraiso. Panagkunam kabaelan ngata dagiti tattao nga aramiden daytoy? [Palubosanyo a sumungbat.] Pangngaasim ta kitaem no apay a nasken a makibiang ti Dios kadagiti gannuat ti tao.” Basaenyo ti Salmo 37:38. Kalpasanna iturongyo iti leksion 5 iti broshur a Kalikaguman, ket usarenyo dagiti napili a paset ti parapo 4-5 a mangipakita no kasano a tungpalen ti Dios daytoy a padto. Itultuloyyo babaen ti panangitukon iti panagadal iti Biblia nga usarenyo ti broshur.
7 No napagsaritaanyo ti Pagarian ti Dios ken naipaimayo ti broshur a “Kalikaguman” iti damo nga ipapan, inton agsublikayo mabalin a kastoy ti ibagayo:
◼ “Iti daydi naudi a panagsaritata, naammuanta ti Pagarian ti Dios kas napaypayso a gobierno a mangiturayto iti intero a daga. Ipakita ti Biblia a ni Kristo Jesus ti agturayto iti dayta. Adda kadi makitam a pagsayaatan ti kaadda ti kastoy a gobierno ken lider?” Palubosanyo a sumungbat. Lukibenyo ti broshur a Kalikaguman iti leksion 6. Aramatenyo dagiti punto iti parapo 6-7 ken ti ilustrasion iti panid 13, ipakitayo ti aramidento ti Pagarian ti Dios agpaay iti sangatauan. Basaenyo ti Daniel 2:44, ket no maitutop, ipakitayo ti libro a Pannakaammo ken itukonyo ti panagadal iti Biblia.
8 No nakasarakkayo iti umanamong a nangpataud dagiti relihion iti lubong kadagiti parikut iti sangatauan, mabalin a kastoy ti isaludsodyo iti isasarungkar:
◼ “Pinampanunotyo kadin no kasanotayo a maammuan no ania a relihion ti anamongan ti Dios? [Palubosanyo a sumungbat.] Daytoy a broshur nga Ania ti Kalikaguman ti Dios Kadatayo? ipakitana dagiti pakailasinan ti pudno a relihion.” Iturongyo iti leksion 13, ket ipaganetgetyo dagiti lima a punto iti parapo 3-7 a nakasurat iti italiko. Mabalinyo nga ituloy a kunaen: “Mainayon pay iti pannakasarak iti pudno a relihion, masapul nga ammuentayo ti kalikaguman kadatayo ti Dios kas indibidual.” Basaenyo ti Juan 4:23, 24. Itukonyo ti panangisalaysay iti ad-adu pay maipapan iti daytoy. Iturongyo iti leksion 1 iti broshur, ken ipakitayo no kasano ti panagadaltayo.
9 No sumarungkarkayo a mangituloy iti diskusion maipapan iti kinaragsak ti pamilia, mabalin a kastoy ti ibagayo:
◼ “Iti damo a panagam-ammota, napagsaritaanta ti sekreto ti kinaragsak iti pamilia, nga isu ti panangyaplikar iti balakad a masarakan iti Biblia. No tamingentayo dagiti kasapulan ti moderno a pamilia, patiem kadi a lausen ti Biblia wenno naintiempuan?” Palubosanyo a sumungbat. Ipakitayo ti libro a Pannakaammo. Iturongyo iti kapitulo 2, ket basaenyo ti naadaw a komento iti parapo 13. Iti panangusar kadagiti punto iti parapo 3, itukonyo ti panagadal ti pamilia iti Biblia.
10 Ti broshur a Kalikaguman ket nagsayaat a pangtulong iti sabsabali a mangammo kadagiti kalikaguman ti Dios. Ti kinaababa ken kinalawag ti mensahena, ken ti napintas a pannakadiseniona palakaenna ti panangirugi kadagiti panagadal. Iti kabiitan a panawen, depende iti interes ken kabaelan ti estudiante, mabalin a mayallatiw ti panagadal iti libro a Pannakaammo.
11 Gundawayantayo koma ti tunggal oportunidad a mangipakita iti napaypayso a pannakaseknan kadagiti amin nga interesado iti teritoriatayo. Babaen ti panangsalimetmet kadagiti umiso a rekord, panagsagana a naimbag, ken panagsubli a dagus maipakitatayo iti padatayo a tao ti ayat a mangguyugoy kadakuada iti kinapudno.—Mat. 22:39; Gal. 6:10.