Adalentayto Manen ti Libro nga Apocalipsis
1 Inadaw ti panid a yan ti tema ti libro nga Apocalipsis ti Apocalipsis 1:3: “Naragsak daydiay mangbasa a sipipigsa ken dagidiay dumngeg kadagiti sasao daytoy a padto.” Ti kinaragsak ti ili ni Jehova itatta pudno a pinarayray ti moderno-aldaw a kaitungpalan dagiti padto iti libro ti Apocalipsis. Ti agdama a pannakaawattayo kadagiti pasamak “iti aldaw ti Apo” ket nailawlawag iti Apocalipsis—Ti Grande a Tampokna Asidegen! (Apoc. 1:10) Idi naadal dayta, naawatantay dagiti napateg a pasamak iti lubong, nangruna dagidiay nangiraman iti sangalubongan nga imperio ti palso a relihion ken ti panagmartsa dagiti nasion nga agturong iti Armagedon kasta met ti pannakilangen ni Jehova iti ilina.
2 Inton umay nga Enero rugiantayto nga adalen daytoy a libro iti panagadal ti libro kadagiti amin a kongregasion a Cebuano, Hiligaynon, Iloko, ken Tagalog iti maikatlo a gundaway ket maitedto ti eskediol iti Ministeriotayo iti Pagarian iti umiso a tiempo. Nupay kasta, maipakpakauna daytoy tapno amin a kabarbaro nga awan pay kopiada iti daytoy a libro sigurado a makaaladanton ti usarenda inton maadal.
3 Iti kaaduan kadatayo, ti panangadal iti daytoy a publikasion ket saan laeng a mangipalagip kadagiti punto a naadalen no di ket mangpatadem iti naespirituan a panangmatmattayo iti agdama a paspasamak a mangitunda iti aldaw ti panagballigi ni Jehova kadagiti amin a kabusorna. Pudno a magunggonaanto dagiti rinibo a nakitimpuyog kadatayo bayat ti napalabas a dua aginggat’ tallo a tawen iti daytoy maikatlo a pannakaadal ti libro nga Apocalipsis iti Panagadal ti Libro iti Kongregasion.
4 Siguraduen a linawas a nakasaganakay a naimbag, mangrugi inton Enero 30, 1995. Magunggonaankayto a sibabaknang bayat nga ad-adda a maawatanyo a silalawag ti kaipapanan dagiti pasamak ti lubong iti lawag dagiti padto iti Apocalipsis.