Apocalipsis—Ti Grande a Tampokna Asidegen!
1 “Naragsak daydiay mangbasa a sipipigsa ken dagidiay dumngeg iti sasao daytoy a padto, ken mangtungpal iti bambanag a naisurat iti dayta; ta ti naituding a tiempo asidegen.” (Apoc. 1:3) Itampok dagita a sasao ti kinapateg ti libro nga Apocalipsis, nangnangruna ta agbibiagtayon iti naituding a tiempo a pannakatungpal iti adu a padtona. Maitutop ngarud nga adalentayo ti libro nga Apocalipsis—Ti Grande a Tampokna Asidegen! iti Panagadal iti Libro ti Kongregasion a mangrugi iti lawas ti Enero 8, 2007.
2 Adun ti namalbaliwan ti lubong sipud idi naudi a panangadaltayo iti libro a Tampok ti Apocalipsis iti Panagadal iti Libro ti Kongregasion. (1 Cor. 7:31) Maysa pay, adu kadagidiay nakikadua iti pannakaikaskasaba iti naimbag a damag ti Pagarian ti pulos a saan pay a nagunggonaan iti bersikulo por bersikulo a panangusig iti libro nga Apocalipsis. Ti panangadal iti libro a Tampok ti Apocalipsis tulongannatayo amin nga agtalinaed a siririing no ania ti agur-uray iti masanguanan.—Apoc. 16:15.
3 Ikagumaanyo ti tumabuno iti tunggal lawas. Daytoy a publikasion saannatay laeng a tulongan nga agtultuloy nga agbantay no di ket dagiti mensahe ni Jesus kadagiti pito a kongregasion tulongannatayo met a mangliklik kadagiti situasion ken kasasaad a mangapektar iti espiritualidadtayo ken iti pannakiramantayo iti ministerio.—Apoc. 1:11, 19.
4 Agsaganakayo a Naimbag: Sakbay ti tunggal panagadal iti libro, basaenyo dagiti mausig a bersikulo iti libro nga Apocalipsis. Imutektekanyo dagiti Nainkasuratan a rason a mangilawlawag iti mausig a bersikulo. Ikagumaanyo a tarusan dagiti kangrunaan a punto tapno matukay ti pusoyo. (Neh. 8:8, 12) Iwayaanyo ti agmennamenna ken iyimtuodyo iti bagiyo: ‘Ania ti ibagbaga daytoy kaniak maipapan ken ni Jehova ken iti pannakatungpal ti panggepna? Kasano a makapagtignayak a maitunos iti panggepna ket matulongak dagiti sabsabali?’
5 Siam a pulo ket dua a tawen ti napalabasen manipud idi nangrugi ti “aldaw ti Apo” idi 1914. (Apoc. 1:10) Dandanin dumteng dagiti makapikapik a pasamak a naipadto iti libro nga Apocalipsis. Ti panangadal iti libro a Tampok ti Apocalipsis paragsakenna ti puso ken isiptayo ken pabilgenna ti pammatitayo nga asidegen ti “gubat ti naindaklan nga aldaw ti Dios a Mannakabalin-amin” ken ti baro a lubong.—Apoc. 16:14; 21:4, 5.