Yamanentay ti Adda Kadatayo
1 “Ti Dios irekomendana ti bukodna nga ayat kadatayo iti banag a, bayat a managbasoltayo pay laeng idi, ni Kristo natay a maipaay kadatayo.” (Roma 5:8) Anian a yamantayo amin maigapu iti natan-ok a daton nga inaramid agpadpada ni Jehova a Dios ken ti Anakna a maipaay iti biangtayo! Babaen ti naibukbok a dara ni Kristo, naipaayantayo iti gundaway nga agbiag nga agnanayon, maysa a banag a di maipaay kadatayo ti sabali a tao.
2 Kasanotay a maipakita ti panangipategtayo? Adu a tattao ti mawawan iti pudno a pannakaammo manipud Sao ti Dios. Pagayatan ni Jehova a matulongan dagitoy. (1 Tim. 2:4) Ipakitatayo ti panangipateg babaen ti ‘panangideklara iti naimbag a damag ti Pagarian ti Dios.’ (Luc. 4:43) Ti naimpusuan a pannakipaset ipakitana nga ipategtayo a natay ni Kristo gapu kadatayo ket kayattay a tuladen babaen ti panagaramid kadagiti sabsabali nga adalan.—Mat. 28:19, 20.
3 Ania ti dadduma kadagiti pamay-an ti panangasaba a nakalukat kadatayo? Posible kadi kadatayo ti agpalista nga auxiliary payunir iti sagpaminsan? Kalpasan ti panangusig, nalabit a kabaelan dagiti dadduma ti agserbi a regular payunir. Iti naglabas a tiempo nalabit pinanunotyo ti agpalista, ngem addada nakalapped. Nalabit a nagbaliwen ti kasasaadyo. No kasta, tiningitingyo kadin a siseserioso a parang-ayen ti serbisioyo babaen iti iseserrekyo iti payunir a serbisio wenno babaen ti panagserbiyo kas auxiliary payunir iti sagpaminsan?
4 Lalo a dumegdeg ti panagyamantayo no kumitatayo kadagiti mapaspasamak iti aglawlawtayo. Kumarkaro ti kinaranggas, guranggura, ken riribuk iti sangalubongan. Dineskribir a naimbag ni Pablo ti tiempotayo a kas “napeggad” ken “narigat a pakilangenan.” (2 Tim. 3:1) Iti tengnga dagitoy a makapadanag a kasasaad, addaantayo iti nawadwad a naimbag a damag nga iranud iti dadduma. Addaantay iti dua a nagsayaat a magasin, Ti Pagwanawanan ken Agriingkayo!, a maitukontayo iti daytoy a bulan a sinaggaysa wenno babaen ti suskripsion. Addaantay met kadagiti broshur iti nagduduma a suheto. Ti panagyaman iti adda kadatayo ti mangtignay koma kadatayo a mangiranud kadagitoy iti sabsabali.—Heb. 13:16.
5 Mabalin nga iti lugar a pagnanaedanyo, adda bassit interes dagiti tattao iti espiritual a bambanag. Maisupadi iti dayta, adda dagiti nabunga a teritoria. Posible kadi a makapagserbikay iti maysa a lugar a pudpudno nga agkasapulan iti tulongyo? Ti manangaywan ti sirkitoyo ti nalabit addaan iti sumagmamano a singasing maipapan daytoy a banag.
6 Adu dagiti rason a pamkuatantayo nga agyaman no ania ti adda kadatayo, pudno a nawadwad a naimbag a bambanag. Ti panagyamantayo ken Jehova ti kasayaatan a mayebkas babaen ti panangipakaammo iti nagan ken pangpanggepna kadagiti dadduma.—Isa. 12:4, 5.