Ipakitayo ti Panagyamanyo
1 Nupay agbibiagtayo iti “napeggad a tiempo a narigat a pakilangenan,” adu ti panggapuantayo nga agyaman ken ni Jehova. (2 Tim. 3:1) Kangrunaan kadagitoy ti panangisagutna iti ipatpategna nga Anak maipaay kadatayo. (Juan 3:16) Maysa pay, bayat a mabisbisinan iti naespirituan dagidiay adda iti palso a relihion, sagsagrapentayo ti aglaplapusanan a naespirituan a taraon. (Isa. 65:13) Karamantayo iti maysa a sangalubongan a panagkakabsat ken naparaburantayo a makipaset iti makapagagar nga irarang-ay ti pudno a panagdayaw. (Isa. 2:3, 4; 60:4-10, 22) Kasanotayo a maipakita ti panagyamantayo ken ni Jehova gapu kadagiti bendision nga imburayna kadatayo?—Col. 3:15, 17.
2 Naragsak, Naimpusuan a Panagserbi: Maipapan iti panangted kadagiti material a banag, insurat ni apostol Pablo: “Ti Dios ayatenna ti naragsak a manangited.” (2 Cor. 9:7) Agaplikar met daytoy a prinsipio iti panagserbitayo iti Dios. Maipakitatayo ti panagyaman no ipapusotayo ti kinapudno, pagrag-oantayo dagiti Nakristianuan a gimong, naregtatayo iti ministerio iti tay-ak, ken siraragsak nga aramidentayo ti pagayatan ti Dios.—Sal. 107:21, 22; 119:14; 122:1; Roma 12:8, 11.
3 Iti Linteg a naited iti nagkauna nga Israel, awan ti naikeddeng a masnup a kaadu dagiti maidatag a daton. Tunggal managdaydayaw maipakitana ti panagyamanna babaen ti panangtedna iti “mairukod iti pamendision ni Jehova” nga inawatna. (Deut. 16:16, 17) Kasta met ita, ti managyaman a puso tignayennatayo a mangaramid iti aniaman nga ipalubos ti kasasaadtayo iti trabaho a panangikasaba iti Pagarian ken panangaramid kadagiti adalan. Iti bulan ti Mayo, addaantayo iti nasayaat a gundaway a mangipakita iti panagyamantayo. Mabalin nga ag-auxiliary pioneer dagiti dadduma bayat ti bakasionda idiay eskuelaan, ket dagiti dadduma mabalin a manayonanda ti oras a panagserbida iti tay-ak bayat a nasayaat ti paniempo. Mapalawayo kadi ti ministerioyo ita a bulan?
4 Nalapunos iti Panagyaman: Ti maysa a napateg unay a pamay-an a panangyebkas iti panagyamantayo ken ni Jehova ket babaen ti kararag. (1 Tes. 5:17, 18) Idagadag ti Sao ti Dios nga ‘agliplippiastayo koma iti pammati iti panagyaman.’ (Col. 2:7) Uray no adu ti pakakumikoman wenno pakaringgorantayo, kanayon koma nga iramantayo ti panagyaman kadagiti inaldaw a kararagtayo. (Fil. 4:6) Wen, babaen ti ministerio ken dagiti kararagtayo, sapay koma ta ‘bumaknangtayo iti adu nga ebkas ti panagyaman iti Dios.’—2 Cor. 9:12.