Ti Pagwanawanan ken Agriingkayo!—Dagiti Magasin a Maipaay iti Naganat a Tiempotayo!
1 Kas makitatayo iti mapaspasamak iti aglawlawtayo ditoy lubong ken kasta met iti teokratiko nga organisasion, maipategtay no kasano kaganatna ti panangikasabatayo “ti naimbag a damag” ti Pagarian. (Mar. 13:10) Mangted daytoy kadatay ti rason a mangtungpal iti ministeriotayo a buyogen ti regta bayat iti bulan ti Abril.
2 Ti kinapateg ti mensahetayo isut’ naigunamgunam babaen ti espesial a trabaho nga akmentayo iti daytoy a bulan. Sigagagartay a naguray iti pannakairuar ti Kingdom News nga iwarastayo bayat iti Abril ken Mayo. Tapno mapabileg ti kinarayraytayo maipaay iti daytoy a trabaho, Ti Pagwanawanan ken Agriingkayo! addaanda kadagiti artikulo a mangigunamgunam iti naimpadtuan a kaipapanan dagiti pasamak ti lubong. Kasanotay a mangisagana iti panangiparang a makatukay iti interes kadagiti magasin?
3 Nalabit a kabaelanyo a putaren ti maysa nga epektibo a panangiparang babaen ti panangsurot kadagitoy sumaruno a nasken nga addang: (1) Pilien ti maysa nga artikulo iti maysa kadagiti magasin a makaawis kadagiti tattao iti komunidadyo. (2) Pilien ti sasao wenno kasuratan iti artikulo a makatignay iti interes ti bumalay. (3) Isagana ti ababa a panangiparang a ramanenna ti nainggayyeman a kablaaw, maysa a saludsod wenno sasao a mangitampok iti Nainkasuratan a kapanunotan, ken maysa a napudno nga awis nga agsuskribe. Kas makitayo, saan a narigat nga aramiden daytoy. Apay a dikay mangisagana iti maysa a panangiparang a kadua ti sabali nga agibumbunannag a makakuyogyo iti ministerio?
4 Idinto ta ti Abril 22 nga “Agriingkayo!” pataudenna ti saludsod a, “Dagitoy Kadin ti Maudi nga Al-aldaw?,” mabalinyo a repasuen ti material idiay baba ti paulo a “Maudi nga Al-aldaw” iti panid 13 iti “Panakirinnason” a libro. Mabalinyo a rugian babaen ti panagkunayo:
◼ “Simmarungkarkami tapno ilawlawag ti kaipapanan ti nariribuk a paspasamak iti aglawlawtayo. Imutektekanyo no ania ti kunaen daytoy nga artikulo . . . ”
5 Ti Abril 1 a “Pagwanawanan” pataudenna ti saludsod: “Relihion—Di Rumbeng a Pagsaritaan?” No itukonyo ti suskripsion, mabalinyo a kunaen:
◼ “Masansan a maikuna a ti relihion ket maysa a suheto a di rumbeng a pagsasaritaan agsipud ta mapagsusupiatan unay. Ania ti makunayo maipapan dayta?” Kalpasanna maiturong kadagiti sasao iti artikulo.
6 Nalabit nga usarenyo ti Abril 15 a “Pagwanawanan” babaen ti artikulo a “Maragpat Aya ti Narelihiusuan a Kinapudno?” Nalabit a makagun-odkayo iti naimbag a sungbat babaen daytoy nga introduksion:
◼ “Agsipud ta nagadu ti relihion itatta, agduadua ti dadduma a tattao no ti narelihiusuan a kinapudno ket magun-odan. Daytoy nga artikulo ti mangibuksil iti wagas a dakayo ken siak ket makasarak iti makapnek a sungbat iti daytoy a saludsod. . . . ”
7 Bayat nga umas-asideg ti panungpalan, parang-ayentayo koma ti pingettayo a tumulong iti tattao a tumalaw manipud Babilonia a Dakkel. (Apoc. 18:4) Ti Pagwanawanan ken Agriingkayo! alaenda ti nasken a papel iti daytoy dinto pulos mauliten a trabaho.