Itukonyo Dagiti Magasin a Mangsaksi iti Kinapudno
1. Ania ti akem Ti Pagwanawanan ken Agriingkayo!?
1 Ti Pagwanawanan Mangibumbunannag iti Pagarian ni Jehova ken ti kaduana a magasin nga Agriingkayo! ket napateg pay laeng nga alikamen iti trabaho a panangikasaba iti Pagarian ken iti panagaramid iti adalan. (Mat. 24:14; 28:19, 20) Pagragsakantayo nga itukon a kanayon dagitoy a dua a naintiempuan a magasin bayat a makiramramantayo kadagiti nadumaduma nga aspeto ti ministerio.
2. Ania dagiti naaramid a panagbalbaliw iti Ti Pagwanawanan ken Agriingkayo!, ken apay?
2 Iti panaglabas dagiti tawen, nakitatayo dagiti panagbalbaliw iti kadakkel ken linaon dagiti magasin kasta met kadagiti pamay-antayo a mangipaima kadagita. Naaramid dagitoy a panagbalbaliw tapno agbalin dagiti magasintayo nga ad-adda a makaay-ayo ken epektibo, iti kasta ti mensahe maipapan iti Pagarian madanonna ti puso “dagiti amin a kita ti tattao ken dumtengda iti umiso a pannakaammo iti kinapudno.”—1 Tim. 2:4.
3. Kasano a maitampok dagiti magasin iti ministeriotayo?
3 Sipud idi Enero 2006, naruamtayon nga agusar kadagiti nagduduma a presentasion para iti binulan a ruar ti Agriingkayo! Ita, kasta met laeng ti aramidentayo iti panangitukon iti maysa laeng kadagiti dua a ruar Ti Pagwanawanan Mangibumbunannag iti Pagarian ni Jehova iti panangasabatayo. Masarakan iti makinlikud a panid Ti Ministeriotayo iti Pagarian dagiti pagtuladan a presentasion para iti tunggal magasin. Gagangay a maitampok kadagitoy ti maysa kadagiti panglukat nga artikulo iti magasin ngem no dadduma, adda met dagiti maitampok a sabali nga artikulo a paginteresan dagiti tattao. Mabalin nga epektibo unay ti pannakausar dagiti pagtuladan a presentasion no kabesadotayo ti naitampok nga artikulo ken agusartayo iti bukodtayo a sasao tapno maibagaytayo ti presentasion iti teritoriatayo.
4. Apay a mabalin nga adda pagsayaatanna no agusarkayo iti sabali a presentasion malaksid kadagiti pagtuladan a presentasion iti Ti Ministeriotayo iti Pagarian?
4 Nupay dua a presentasion ti naisingasing para iti tunggal magasin iti Ti Ministeriotayo iti Pagarian, nawayakayo a mangusar iti sabali a presentasion. Ti maysa a rason no apay nga aramidenyo dayta ket mabalin nga adda sabali nga artikulo nga ad-adda a paginteresan dagiti tattao iti teritoriayo. Wenno nalabit a mariknayo nga ad-adda nga epektibo ti presentasionyo no itampokyo ti artikulo nga ad-adda a paginteresanyo.
5. Ania ti nasken nga aramidenyo sakbay a mangisaganakayo iti presentasion para iti maitukon a magasin?
5 No Kasano nga Isagana ti Presentasionyo: Kangrunaan iti amin, nasken a kabesaduenyo a naan-anay ti artikulo a piniliyo nga itampok. Mabalin a saanyo a kanayon a makabesado ti tunggal artikulo ti magasin nga itukonyo iti ministerio iti tay-ak. Nupay kasta, naganaygay ken napasnek koma ti panangidatagyo kadagiti artikulo a piniliyo nga itampok. Maaramidyo laeng dayta no adalenyo a naimbag ti impormasion nga idatagyo.
6. Kasanotay nga isagana ti bukodtayo a presentasion?
6 Sumaganad, mangisaganakayo iti panglukat a sasao a mabalin nga ibagaybagay kadagiti nagduduma a tattao. Ti maitutop ken makatukay iti interes a saludsod ket mabalin nga usaren a pangilukat iti saritaan. Kanayon nga agpannuraykayo iti bileg ti Sao ti Dios a mangtukay iti puso. (Heb. 4:12) Mangpilikayo iti maitutop a teksto nga adda pakainaiganna iti topiko nga idatagyo. Nangnangruna a pilienyo ti teksto a naisitar wenno nakotar iti artikulo nga itampokyo. Usigenyo no kasanoyo nga inaig ti teksto iti artikulo.
7. Kasanotay a mapasayaat pay dagiti presentasiontayo?
7 Iti Tunggal Gundaway: Tapno talaga nga epektibo ti maysa a presentasion, masapul nga usarentayo dayta. Makiramankayo iti kongregasion iti panagipaima kadagiti magasin tunggal Sabado. Itukonyo dagiti magasin kadagiti tattao a nangala idin kadagiti dadduma a literatura. Kanayon nga itukonyo dagiti magasin kadagiti iyad-adalanyo iti Biblia ken kadagiti dadduma a mabalin a makasaritayo bayat ti panagsarungkaryo. Nalabit, mapaimaanyo kadagiti magasin dagiti tattao a makasaritayo no mapankayo aggatang, bayat nga agdaldaliasatkayo, wenno bayat nga agur-uraykayo iti klinika ti doktor. Pasayaatenyo dagiti presentasionyo bayat nga us-usarenyo dagita iti makabulan.
8. Kadagiti ania a pamay-an a naisangsangayan ti Agriingkayo! ken Ti Pagwanawanan?
8 Naisangsangayan dagiti magasin a Pagwanawanan ken Agriingkayo! Itan-okda ni Jehova kas ti Soberano iti uniberso. (Ara. 4:24) Liwliwaenda dagiti tattao babaen ti naimbag a damag maipapan iti Pagarian ti Dios ken iparparegtada ti panamati ken Jesu-Kristo. (Mat. 24:14; Ara. 10:43) Malaksid iti dayta, sipsiputanda dagiti pasamak iti lubong bayat a tungtungpalen dagita ti padto ti Biblia. (Mat. 25:13) Tulonganyo dagiti tattao iti teritoriayo a mabenepisiaran kadagitoy a magasin babaen ti panagsaganayo a mangitukon kadagita tunggal adda maitutop a gundaway!
9. Kasanotay a makaipasdek iti pundasion para iti panagsarungkar?
9 No makaipaimakayo iti magasin, wenno no makasabaanyo laeng ti maysa a tao, mangibatikayo iti maysa a saludsod wenno mamagpanunot a sasao a mabalin a mangilukat iti gundaway para iti panagsarungkar ken para iti kanayonan a panagsarita maipapan iti Biblia. No nagagettayo nga agimula kadagiti bin-i ti kinapudno, masiguradotayo a luktanto ni Jehova ti puso dagidiay sipapasnek nga agtarigagay a mangam-ammo ken agserbi Kenkuana.—1 Cor. 3:6.