Panangbirok Kadagidiay Nalaka a Paisuro
1 “Awan ti tao a makaumay kaniak malaksid no ti Ama, a nangibaon kaniak, ti mangiyasideg kenkuana.” (Juan 6:44) Gunggonaan ni Jehova dagidiay nalaka a paisuro. (Jer. 17:10; Juan 6:45) Addaantay ti pribilehio a kas katrabahuanna iti panangbirok kadagidiay naemma a tattao.—Sal. 37:11; 1 Cor. 3:9.
2 Inladawan ni Jesus dagiti adalanna a kas “dumadaklis kadagiti tattao.” (Mat. 4:19) Ti naballigi a dumadaklis masapul nga ammona ti aramidenna tapno maatrakar ti ikan. Kaaspingna, masapul nga idatagtay ti mensahe iti wagas a makaawis kadagiti panagsarungkar a manggutugot ti interes dagiti managdengngegtayo. Ania ti maikunatayo?
3 No naipakita ti interes kadagiti artikulo ti “Pagwanawanan” maipapan ti relihion, mabalinyo a kunaen:
◼ “Iti napalabas, nagsaritaantayo no apay nga adu a tattao ti madi makisao maipapan ti relihion. Natingitingyo kadin no apay a ti relihion ket mapagsusupiatan a suheto?” Palubosan a sumungbat. Iturong iti Panakirinnason a libro, panid 361, ket pagsaritaan ti “Apay a Nagadu Dagiti Relihion?”
4 Mabalinyo nga usaren daytoy umasping a yaasideg a pangirugi ti saritaan iti suheto ti relihion:
◼ “Adda kadi dadduma a pamay-an a pangsiguruan nga adda kadatayo ti pudno a relihion? [Palubosan a sumungbat.] Gapu ta nagadu ti nagduduma a relihion, adu a tattao ti mariribukan.” Iturong iti Panakirinnason a libro, pinanid 368-9, iti saludsod a “Kasano a Maammuan ti Maysa No Ania a Relihion ti Umiso?” Komentuan iti ababa ti saludsod numero 5: “Talaga kadi nga agiinnayat dagiti miembroda?” Ilawlawag ti programatayo a panagadal iti Biblia.
5 No ti bumalay ket agminar a maseknan maipapan iti kasasaad ti lubong, mabalin a kayatyo nga ipadas daytoy:
◼ “Agminar a maseknankayo maipapan kadagiti dakes a kasasaad a masapul a sanguen iti panagbiag ken panangpatanor iti pamiliatayo. Ipalgak ti Biblia ti nakaskasdaaw a kari a tungpalento ti Dios iti asideg a masakbayan.” Basaen ti Proverbio 2:21, 22, ken ilawlawag ti kari nga agnanayon a sangalubongan a talna.
6 No agsarungkarkayo kalpasan ti Abril 23, pangngaasiyo ta siguruenyo ti mangibati iti kopia ti Kingdom News kadagiti bumalay nga awanan pay. No ania ti sawenyo a pangsurnad kadagiti naipaima a Kingdom News ti mailawlawagto iti Mayo a ruar Ti Ministeriotayo iti Pagarian.
7 Agsipud ta ti Sao ti Dios ket “adda bilegna,” masapul nga ipadastayo nga usaren dayta kadagiti panangiparangtayo. (Heb. 4:12) Paregtaen ti bumalay a basaenna a mismo ti Biblia. (Idiligyo iti Aramid 17:11.) No siaanep nga aramiden ti pasettayo, bendisionan ni Jehova ti reggettayo.