Panangsurot iti Ehemplotayo kas Manangawit ti Lawag
1 Kinuna ni Jesus: “Siak ti silaw ti lubong.” Babaen ti panangsurot iti ehemplona, dagiti disipulo ni Jesus isuda met “ti silaw ti lubong.” (Mat. 5:14) Kinuna ni Jesus nga amin dagiti sumurot kenkuana kupikopanda “ti silaw ti biag”—Juan 8:12.
2 Sansanayennatayo ti organisasion ni Jehova nga agbalin nga epektibo a manangawit ti lawag. No sisisinged a surotentayo ti panangiturong nga aw-awatentayo, mabalintayto a lawagan dagiti amin a kita dagiti tattao. (1 Tim. 4:6) Ti panagserbi kas manangawit ti lawag ramanenna saan laeng a ti panagsao ti kinapudno iti tunggal gundaway no di pay ket ti panangsalimetmet iti nasayaat a kondukta. Ti kondukta ti Ehemplotayo ket awan pakaumsianna. Kas pasurotna, masapul nga idemostratayo a ti Kinakristiano ket inaldaw a wagas ti panagbiagtayo. (Efe. 5:9; Tito 2:7, 8, 10) Masapul a mangpataudtayo iti nasayaat nga ar-aramid a makita dagiti dadduma, a mangtignay kadakuada a mangidayaw iti Dios.—Mat. 5:16.
3 Naipasango ti maysa a Saksi iti karkarna a kiddaw bayat ti panagbalaybalayna. Maysa a lalaki ken ti asawana ti masakit, ngem kasapulanda ti agdeposito iti kuarta idiay banko. Sinaludsodda no ti Saksi ket maaramidna daytoy. Immanamong ket nayawat ti $2,000 a cash a maibanko! Idi nagsubli, sinaludsodna: “Kasano a nagtalekkayo kaniak idinto ta didak pay am-ammo?” Ti sungbat: “Ammomi, ken ammo dagiti amin, a dagiti laeng Saksi ni Jehova ti mapagtalkan.” Anian a yamantayo ta ti panangsurottayo kadagiti moral a prinsipio ti Biblia ket mamataud iti kakasta a nasayaat nga aramid!
4 Maysa a maestra iti primaria ti nangilawlawag iti klasena no apay a ti maysa nga innem-ti-tawenna a Saksi nga estudiante ket saan a makipaspaset iti panagkolor iti ladladawan ti Halloween. Imbaga ti maestra a maipagpannakkelna ti naidumduma a kinaturedna. No natibker ti panamatitayo iti maysa a banag, kinuna ti maestra, masapul nga adda turedtayo a mangitakder iti dayta. Iti dayta a rabii inusisa ti maestra ti bukodna a pammati ket binigbigna a saanna a maipakita ti kasta a kinatured a mangitakder iti patpatienna. Iti sumaruno nga aldaw inyanunsiona a saannan nga iraman ti klasena kadagiti masanguanan nga aldaw ti ramrambak, a dadduma kadagitoy saanna pay a patien a mismo!
5 Sigagagar dagiti tattao ni Jehova a mangisilnag iti lawagda, uray sadino ti yanda. Raemen dagiti kaeskuela ken mamaestroda ti mapagwadan a kondukta dagiti agtutubo iti pagadalan. Dagiti adulto a Saksi a mangiparangarang iti nasayaat a kondukta iti sangakaarrubaan tignayenna dagiti dadduma a mangidayaw iti mensahe ti Pagarian. Ti impormal a panangasaba guyugoyenna dagiti napasnek a tattao a mayat a mangadal iti ad-adu pay. Maysa met a panangsaksi uray ti kinagaget ken kinamapagpiarantayo iti sekular a trabaho.
6 Babaen ti nasinged a panangsurot iti naindaklan nga Ehemplotayo, maan-anaytay ti laingtayo kas disipulona. Ti panangtulad iti ulidanna ti mangisiguro a ti lawagtayo ket “silnaganna amin.”—Mat. 5:15; 1 Ped. 2:21.