Ni Jehova Mangted ti Pannakabalin
1 Kas tattao ni Jehova, tinudingannatay a mangikasaba iti naimbag a damag bayat a taginayonen ti ‘nasayaat [a kababalintayo] iti tengnga dagiti nasion.’ (Mat. 24:14; 1 Ped. 2:12) Gapu iti kinapeggad ti tiempo agraman bukodtayo a pagkapuyan ken pagkurangan, ditay mairingpas daytoy a trabaho a bukbukodtayo. (2 Tim. 3:1-5) Anian a ragsaktayo ta mabalintay ti kumita ken Jehova a maipaay iti tulong!
2 Nagibtur ni apostol Pablo iti adu a suot. (2 Cor. 11:23-27) Kasanona a nasaranget dagitoy ken naitungpal ti naituding a trabahona? Impaay ni Jehova kenkuana ti “pannakabalin a nalablabes ngem ti gagangay.” (2 Cor. 4:7) Binigbig ni Pablo ti kasta a nadiosan a tulong idi insuratna: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.” (Fil. 4:13) Tulongannatayo ni Jehova iti isu met laeng a wagas. Kasanotay a magun-odan daytoy a tulong?
3 Babaen ti Awan Ressatna a Panagkararag: Ginutugotnatayo ni Jesus nga ‘itultuloy[tay] ti agdawat, agsapul, ken agtuktok,’ ket ditay koma sumardeng. (Luc. 11:5-10) Ti kinapingettayo nga agkararag ipakitana ken Jehova ti kauneg ken kapegges ti tarigagaytayo, ken ti kinapudno ti motibotayo. (Sal. 55:17; 88:1, 13; Roma 1:9-11) Nabigbig ni Pablo ti pateg ti kinapinget iti kararag idi inggunamgunamna nga “agkararagkayo a di agressat.” (1 Tes. 5:17) Ti kararag isut’ maysa kadagiti kangrunaan a wagas a panggun-odantayo iti tulong ni Jehova.
4 Babaen ti Panangsurot iti Teokratiko a Panangiturong: Ti kayat a sawen ti “teokrasia” ket turay ti Dios, nga isut’ ayat. Ramanenna ti panangawat iti naayat nga autoridad ni Jehova ken panangsurot iti panangiwanwanna agpadpada iti dadakkel ken babassit a desision. “Ti matalek ken masirib nga adipen” ibagianna ti teokratiko a turay ditoy daga. (Mat. 24:45-47) Ti pannakikooperar iti organisasion nga us-usaren ti “adipen” ket nasken tapno magun-odan ti bendision ni Jehova. (Idiligyo ti Hebreo 13:17.) Gunggonaan ni Jehova ti kinasungdo ken kinatuloktayo babaen ti panangipaayna iti pannakabalin a kasapulantayo iti maitutop a tiempo.—Heb. 4:16.
5 Babaen ti Panagtalinaed a Nasinged Kadagiti Kakabsattayo: Ti ayat isut’ pakabigbigan dagiti adalan ni Jesus. (Juan 13:34, 35) Gapu iti nagduduma a kinatao, mabalin a tumaud ti di pagkikinnaawatan iti tengngatayo gapu iti panagsusupadi ti kinatao. Masapul nga agbalintay a nadungngo ken naasi, a sidadaan nga agpipinnakawan. (Efe. 4:32) Daytoy ti mamagsinged kadagiti kakabsattayo iti pammati ken mangparegta kadakuada babaen ti kinatibkerda nga agibtur iti sidong ti pakasuotan. “Yantangay ammo[tayo] a dagiti isu met laeng a bambanag a sagsagabaen maitungtungpalda iti intero a timpuyog dagiti kakabsat[tayo],” addaantayo iti inted-Dios a bileg a sumaranget kadagiti umasping a pakasuotan.—1 Ped. 5:9.
6 Babaen ti Panangsalimetmet iti Nasayaat nga Eskediul ti Personal a Panagadal: Ti panangsaluad iti panunot ken pusotayo iti naespirituan ti mamagballigi kadatayo a mangsaranget iti iraraut ni Satanas. (1 Ped. 5:8) Ti eskediul iti personal a panagadal parang-ayenna ti nadiosan a pannakaammotayo. Makasakdotayo iti daytoy no maipasangotay kadagiti inaldaw a karit. Impaganetget ni Pablo a nasken ti “umiso a pannakaammo” iti pananggun-od iti pannakaisalakan. (1 Tim. 2: 3, 4) Masapul a regulartay a mangipauneg iti naespirituan a taraon.
7 Amin a kasapulan a mamapigsa kadatayo ket maipapaay babaen iti kongregasion Kristiano. Ti naimpusuan a panangsuportar kadagiti aramidna ipanamnamana a ‘magnatayo ket ditay agkapuy.’—Isa. 40:29-31.