“Agtultuloykayo nga Agbantay”
1 Idi insawang ni Jesus dagiti sasao a nailanad iti Mateo 26:38-41, umad-adanin iti kangitingitan a tiempo ti natauan a biagna. Nakapusta ti pannakaisalakan ti intero a sangatauan. Kasapulan dagiti adalan ni Jesus ti “agtultuloy nga agbantay.”
2 Ita, paspasungadentayon ti idadateng ni Jesus kas manangispal ken manangdadael. Kas managbantay a Kristiano a makailasin iti kinaganat dagiti tiempo, ditay koma basta agtugaw ken aguray lattan iti pannakaisalakan. Ammotayo a masapul a nakasaganatayo iti amin a tiempo. Nasken nga “agtartrabahotayo a sipipinget ken umag-agawatayo” iti serbisiotay ken Jehova. (1 Tim. 4:10) Komusta ngay ti tunggal maysa kadatayo? Agbambantaytayo kadi met laeng?
3 Panangusig iti Bagbagitayo: Namakdaar pay ni Jesus: “Asikasuenyo ti bagbagiyo.” (Luc. 21:34, 35) Masapul nga asikasuentay ti bagbagitayo, a siguruen nga ‘awan pakababalawantayo ken natarnawtay koma . . . iti tengnga ti nakillo ken natiritir a kaputotan.’ (Fil. 2:15) Agbibiagtay kadi iti kada aldaw kas Kristiano, a tultuladen ni Jesus ken magmagna a maitunos kadagiti prinsipio a naituyang iti Sao ti Dios? No sukimatentay ti bagbagitayo iti lawag dagiti Kasuratan, pudno aya nga agbambantaytayo kas inwardas ni Jesus?—Roma 13:11-14.
4 Masapul a napasnek dagiti panglakayen a mangitungpal kadagiti rebbengenda iti kongregasion, a mabigbigda nga agsungbatdanto no kasano ti panangtaripatoda iti arban. (Heb. 13:17) Adda espesial nga obligasion dagiti ulo ti pamilia a mangiturong iti sangakabbalayanda iti daldalan ni Jehova. (Gen. 18:19; Jos. 24:15; idiligyo iti 1 Timoteo 3:4, 5.) Kasta met, anian a nagpateg a tungpalentay amin ti Nainkasuratan a bilin nga agiinnayattayo iti maysa ken maysa! Isu dayta ti marka ti pudno a Kinakristiano.—Juan 13:35.
5 Agalertokayo a Mamakdaar iti Sabsabali: Ti panagtultuloy nga agbantay ramanenna ti ad-adu pay ngem ti panangasikaso iti bagbagitayo. Adda komisiontay a pagbalinen nga adalan dagiti sabsabali. (Mat. 28:19, 20) Tignayennatay koma ti ayat iti kaarruba a mamakdaar iti sabsabali tapno malasatda ti pannakadadael a naipasango iti daytoy a lubong. Naipabaklay daytoy a responsabilidad kadagiti amin a Kristiano. Maysa daytoy a nasken a paset ti panagdayawtayo. (Roma 10:9, 10; 1 Cor. 9:16) Masansan a makasaraktayo iti kinaaleng-aleng wenno ibubusor iti daytoy makasalbar-biag a trabaho. Obligasiontay ti agpinget, uray no di ikaskaso ti kaaduan ti pakdaartayo. (Ezeq. 33:8, 9) Ti napudno nga ayat iti Dios ken kaarruba ti mangtignay kadatayo nga aganus.
6 Saan a tiempo daytoy ti panangyaleng-aleng. Saantay koma makumikom kadagiti inaldaw a pakaringgoran iti biag wenno ragragsak daytoy a sistema nga agtinnagto a maysa a silo. (Luc. 21:34, 35) No adda man panagkasapulan iti rikna ti kinaganat, itan a mismo. Dagidiay laeng siririing, naridam, ken managbantay ti makalasat. Anian a panagyamantayo no agtulnogtay iti panangiwanwan ni Jesus ken “makapagballigitayo iti pananglisi kadagitoy amin a bambanag!”—Luc. 21:36.