Tigtignayennatay Aya iti Naespirituan Dagiti Pammalagip ni Jehova?
1 Indayaw ti salmista ni Jehova, a kunana: “Dagiti pammalagipmo isudat’ pakaseknak.” (Sal. 119:99) Ti Hebreo a sao a maipaay iti ‘pammalagip’ iyegna ti kapanunotan nga ipalagip ni Jehova dagiti naisawangen a bilbilinna. No ipangagtayo, tinayennatay dagitoy iti naespirituan ken mangparagsak kadatayo.—Sal. 119:2.
2 Kas tattao ni Jehova, kanayontay nga umawat ti pammagbaga. Adu kadagitoy ti nangngegtayon. Nupay apresiarentayo daytoy a balakad, mabalin a makalipattayo. (Sant. 1:25) Siaanus ni Jehova a mangipapaay kadagiti naayat a pammalagip. Inlanad ni apostol Pedro dagiti sumagmamano a pammalagip tapno ‘parayrayenna ti nalawag a pannakabalintayo nga agpanunot.’—2 Ped. 3:1.
3 Maulit-ulit a mapalagipantayo maipapan iti pateg ti personal a panagadal ken itatabuno iti gimong. Masapul daytoy agsipud ta dagitoy nga aktibidad ket nasken unay iti espiritual a pagimbagantayo.—1 Tim. 4:15; Heb. 10:24, 25.
4 Ti kadakkelan a karit kadagiti dadduma isut’ panangitungpal iti annongen ti Kristiano a mangasaba. Kasapulanna ti pinget ken determinasion. Ngem, matulongantayo nga “agtakder a sititibker” no ‘nakapetan dagiti sakatayo iti alikamen ti naimbag a damag.’—Efe. 6:14, 15.
5 Palagipannatay ni apostol Pablo a tignayennatay ti puso a mangaramid ti “publiko a panangideklara maipaay iti pannakaisalakan.” (Roma 10:10) No umimdeng ti pusotayo kadagiti pammalagip ni Jehova, magutugottayto nga agsao a mangidayaw ti naganna.—Sal. 119:36; Mat. 12:34.
6 No aggagettayo nga agaramid iti naimbag, manamnamatay a mangyeg daytoy iti rag-otayo. (Ecl. 2:10) Impabigbig ni Pablo ti rag-o kas bunga ti espiritu ni Jehova. (Gal. 5:22) Innayon ni Pedro a ti “napasnek a panagregget” ket magunggonaan iti nabunga a ministerio, a mamataud ti rag-o.—2 Ped. 1:5-8.
7 No maipasangotayo iti maysa a karit, laglagipentay koma ti natibker a takder dagiti apostol idi indeklarada, “dikam mabalin ti agsardeng nga agsao maipapan kadagiti bambanag a nakita ken nangngegmi.” (Ara. 4:20) Mapabilegtay nga agtultuloy no malagiptayo a ‘babaen ti panangaramid kadagitoy a bambanag, isalakantayo nga agpadpada ti bagitayo ken dagidiay agimdeng kadatayo.’—1 Tim. 4:16.
8 Ditay koma gumura no masansantay a mapalagipan. Imbes ketdi, sipapasnek nga ipategtayo dagiti di maartapan a pategda. (Sal. 119:129) Kadagitoy napeggad a tiempo, agyamantayo ta agtultuloy nga ipapaayannatay ni Jehova kadagiti pammalagip tapno maparayraytay iti naespirituan ken matignaytayo nga agregta kadagiti naimbag nga aramid!—2 Ped. 1:12, 13.