Agbalinkayo a Mannursuro iti Sao ti Dios—Usarenyo Dagiti Broshur
1 Tunggal dedikado nga adipen ni Jehova ket rumbeng nga agbalin a mannursuro iti Sao ti Dios. Tinudingannatayo ni Jesus a ‘mangaramid kadagiti adalan a tattao iti isuamin a nasnasion, . . . nga isurotay ida.’ (Mat. 28:18-20) Gapuna, ti pannakiraman iti panangikasaba ti naimbag a damag kasapulanna nga agbalintayo a mannursuro!—2 Tim. 2:2.
2 Kabayatan ti Agosto mabalintay nga usaren ti laingtayo a mangisuro no itukon dagiti broshur. Mabalintay ti mangpili iti sumagmamano a makapainteres a Nainkasuratan a kapanunotan kadagitoy ken mangisagana iti sumagmamano a komento a tumulong kadatayo a mangirugi iti saritaan.
3 No itukon ti broshur a “Pudno Aya a Maseknan ti Dios Kadatayo?” mabalinyo a kunaen:
◼ “Nasarakanmi nga adu kadagiti kaarrubayo ti maseknan maipapan iti alisto a panagadu ti krimen, terorismo, ken kinaranggas. Iti opinionyo, apay a daytoy ket nagbalin a kasta a problema? [Palubosan a sumungbat.] Rumbeng nga imutektekan a ti Biblia impadtona a mapasamak daytoy. [Basaen ti 2 Timoteo 3:1-3.] Imutektekanyo a daytoy ket maaramid ‘iti maudi nga al-aldaw.’ Iparangarang daytoy nga adda banag nga agpatingga. Ania ngata dayta iti panagkunayo?” Palubosan a sumungbat. Ukagenyo iti panid 22, itudo ti ilustrasion, ken pagsaritaan ti maysa wenno dua a kasuratan a naadaw iti dayta a panid. Iyurnos ti panagsubliyo.
4 Nalabit a kayatyo nga usaren daytoy nga iyaasideg no itukonyo ti broshur nga “Ania ti Panggep ti Biag—Kasanoyo a Masarakan Dayta?”:
◼ “Adu a tattao ti marigatan a mangsarak iti pudpudno a panggep ti biag. Idinto ta bassit laeng dagiti mangsagsagrap iti ragsak, ti biag dagiti kaaduan ket napno iti pannakapaay ken panagsagaba. Ti kunayo, daytoy ngata ti wagas a kayat ti Dios a panagbiagtayo? [Palubosan a sumungbat.] Ipakita ti Biblia a ti Dios kayatna nga agbiagtayo iti maysa a lubong a kas iti daytoy.” Ipakita ti ilustrasion iti panid 21, sa iturong iti pinanid 25 ken 26, parapo 4-6. Ibangon daytoy a saludsod a pagsaritaanyo inton agsublikayo: “Kasanotayo a masiguro a ti Dios tungpalennanto dagiti karina?”
5 Mabalinyo nga itukon ti broshur a “Tagiragsakenyo ti Biag nga Agnanayon Ditoy Daga!” babaen ti panangipakitayo a naan-anay iti ladawan iti makinsango ken makinlikud nga akkubna sayo isaludsod:
◼ “Kayatyo kadi ti agbiag iti maysa a lubong a kas itoy? [Palubosan a sumungbat.] Ibaga ti Biblia kadatayo nga ay-ayaten ti Dios dagiti tattao ket kayatna nga agbiagda nga agnanayon iti kinaragsak ditoy daga.” Ukagen iti ladawan numero 49, ken basaen ti maysa kadagiti naisitar a teksto. Sa, iti ladawan numero 50, ipakita no ania ti masapul nga aramiden tapno agbiagtayo iti Paraiso. Ibaga a kayatyo ti agsubli tapno ituloy ti panagsaritayo.
6 Maragsakan ni Jehova no ‘maiparangarang ti panagrang-aytayo babaen ti panangasikaso iti isursurotayo.’ (1 Tim. 4:15, 16) Dagiti broshur ti pudno a makatulong kadatayo iti panagreggettayo a bumadang kadagidiay aggagar a dumngeg iti “naimbag a damag maipapan iti nasaysayaat a banag.”—Isa. 52:7.