Dagiti Naballigi a Panagsarungkar Kasapulanna ti Epektibo a Panangisuro
1 Apay a masapul a nagagettayo a sumarungkar kadagiti interesado a tattao? Maipakaammo ti nagan ni Jehova babaen iti daytoy trabaho a panagaramid iti adalan, ket matulongan dagiti managbuteng iti Dios a magna iti dana ti biag. (2 Cor. 2:17–3:3) Ti pannakaammo iti daytoy isut’ mangtignay kadatayo nga agsagana a naimbag sakbay a sumarungkartayo.
2 Ti naimbag a mannursuro tulonganna ti estudiante a rumang-ay iti pamuon a nalpasen a naisaad. Kas ti maestro iti pagadalan a parang-ayenna ti pannakaammo a magun-odan dagiti estudiante iti inaldaw-aldaw, gagangay a surnadantayo ti umuna nga ipapan babaen ti kanayonan a komento iti isu met laeng a suheto.
3 No sumarungkarkayo kalpasan a naipaima ti broshur a “Pudno Aya a Maseknan ti Dios Kadatayo?” nalabit a masarakanyo nga epektibo daytoy:
◼ “Iti kallabes nga isasarungkarko, napagsaritaantayo ‘ti maudi nga al-aldaw.’ Mabalin a masdaawkayo no kasanotay nga ammo nga agbibiagtayon iti maudi nga al-aldaw. (2 Tim. 3:1) Uray dagiti adalan ni Jesus ket nagagarda idi a mangammo iti daytoy. [Basaen ti Mateo 24:3.] Iti sungbatna, dineskribir ni Jesus dagiti kasasaad a makitkitatayo kadagitoy nga aldaw.” Itudo ti paset ti pagilasinan a nailawlawag idiay parapo 3 ken 4 iti panid 19. No dumngeg, itultuloy idiay parapo 5-8 iti panid 20. Ibagayo a kayatyo ti agsubli tapno sungbatan dagiti saludsod a napataud iti parupa ti broshur.
4 No surnadanyo ti naginteres iti broshur nga “Ania ti Panggep ti Biag—Kasanoyo a Masarakan Dayta?” mabalinyo a kunaen:
◼ “Magagaranak a mangituloy iti saritaantayo maipapan iti panggeptayo nga agbibiag. Awan duadua a pareho nga umanamongtayo nga inranta ti Dios nga agbiagtayo iti naragsak ken natalna a kasasaad imbes a kas iti daytoy sasaadentayo ita. Ti kunayo tungpalenna ngata ti karina?” Palubosan a sumungbat. Basaen ti Isaias 55:11, sa pagsaritaan dagiti parapo 25 aginggat’ 27 iti panid 30. Irekomenda ti personal a panagadal ti Biblia a kas kasayaatan a pangsarakan iti pudpudno a panggep ti biag.
5 Kas pangsaruno iti napalabas nga interes a naipakita iti broshur a “Tagiragsakenyo ti Biag nga Agnanayon Ditoy Daga!” mabalinyo nga ipakita manen ken kunaenyo:
◼ “Nagsaritaantayo idi ti maipapan iti napintas a lubong a nailadawan iti daytoy a broshur; kayatko nga ibaga kadakayo no apay a ti pammati ken Jesu-Kristo ket nasken unay kadagiti tattao a mayat nga agbiag sadiay.” Ukagenyo iti panid 41, sayo basaen ti Isaias 9:6. Ipakita ti retrato 62, sayo basaen ti Juan 3:16, a mangipaganetget a kasapulan ti panagtulnog. Ilawlawagyo a dagiti Saksi ni Jehova ket tumultulongda kadagiti tattao a mangalagad iti pammati babaen ti panagadal ti Biblia ken ikagkagumaanda ti agbiag a mayannurot iti dayta.
6 Kalpasan ti kada panagsarungkar, isaludsodyo iti bagiyo: Adda kadi banag a masinunuo iti panunotko a sawek? Impamaysak kadi ti atensionko iti Biblia? Nakaibangonak kadi idiay naipasdeken a pamuon idi umuna nga ipapanko? Nadisenio aya ti panangiparangko a mangiturong iti panagadal ti Biblia? Dagiti positibo a sungbat ti mangted iti pammatalged nga ikagkagumaanyo ti agbalin a naimbag a mannursuro iti Sao ti Dios.