“Ti Pammati Sumaruno iti Banag a Nangngeg”

¹ No makasaraktayo iti tao a “siuumiso a maikari iti agnanayon a biag,” masapul a pabilgentayo ti pammati dayta a tao iti nangngegna. (Ara. 13:48; Roma 10:17) Tapno maitungpal dayta, masapul a subliantayo dagiti naipaima a magasin, nga itugot dagiti kaudian a ruar ken nalabit itukon ti suskripsion. Nupay kasta, ti kalattayo ket tapno mairugi a mayadal ti libro a Pannakaammo a Mangiturong iti Biag nga Agnanayon. Adtoy ti sumagmamano a singasing a mabalin a makatulong:

² No sarungkaranyo dagidiay nangisaritaanyo iti artikulo nga “Idaydayawyo ti Ari iti Kinaagnanayon!,” mabalinyo a rugian iti kastoy:

◼ “Idi napalabas a panagsaotayo, rinepasotay dagiti sumagmamano nga ebidensia a mangpatalged nga adda maysa a mannakabalin-amin a Dios. Nupay kasta, saan nga umdas ti basta sipapanunot iti kaaddana. Masapul nga ammuentayo ti naganna. Ammoyo kadi no ania dayta? [Palubosan a sumungbat.] Kayat ti Dios a maam-ammotayo babaen iti naganna. [Basaen ti Salmo 83:18.] Ad-adu pay ti ibaga ti Biblia kadatayo maipapan ken Jehova a Dios, kas nailawlawag iti daytoy a libro.” Ipakita ti ladawan, sa basaen ti kapsion iti panid 29 iti libro a Pannakaammo. Kalpasan a mapagsaritaanyo dagiti umuna a tallo a parapo iti kapitulo 3, nairugiyon ti panagadal!

³ Kadagidiay nangisanguanyo ti artikulo nga “No Apay nga Umawat iti Bendision ti Dios ti Pudno a Panagdayaw,” mabalin a kayatyo a pasarunuan ti interes babaen ti panagkuna:

◼ “Kalpasan ti panangbasayo iti artikulo, nalabit a nadlawyo a ditay mabalin a matmatan dagiti amin a relihion iti pareho a wagas. Agpadpada nga adda pudno a relihion ken adda dagiti ulbod a relihion. Mamataud daytoy iti lohikal a saludsod a, Makinpanagdayaw ti awaten ti Dios? Napagminar ti sungbat iti daytoy a libro.” Luktan iti kapitulo 5 iti libro a Pannakaammo sa basaen ti parapo 4, agraman ti Juan 4:23, 24. Sa isaludsod, “Kayatyo kadi nga awaten ti libre a panagadal ti Biblia iti pagtaenganyo?” No positibo ti sungbat, luktan iti kapitulo 1 sa irugi ti panagadal.

⁴ No adda naipakita nga interes iti Abril 22 nga “Agriingkayo!,” mabalinyo nga ipadas daytoy nga iyaasideg a pangirugi ti panagadal iti libro a “Pannakaammo” inton agsublikayo:

◼ “Mabalin a malagipyo a nagsaritaantayo idi maipapan ti pangnamnamaan nga inton agangay makitatayto ti maysa a lubong nga awanen ti gubat. Narigat nga iladawan no anianto ti pudno a langana. Adtoy ti kapanunotan ti maysa a pintor iti dayta. [Ipakita ti ladawan iti pinanid 188-9 iti libro a Pannakaammo.] Saan kadi a makaparagsak a sagrapen dagitoy nga aglawlaw? [Luktan iti pinanid 4-5, ipakita ti ladawan, sa basaen ti kahon.] Mayasping ti titulo daytoy a libro iti sasao ni Jesus idiay Juan 17:3. [Basaen.] No mabalin, kayatko nga idemostra no kasano nga usaren daytoy a libro a kadua ti Bibliayo a mangsarak iti makasalbar biag a pannakaammo.” No kayat ti bumalay, irugi ti panagadal iti umuna a kapitulo.

⁵ Dakkel ti rag-otayo no mabalintay a ‘luktan kadagiti sabsabali ti ruangan ti pammati’ a mangiturong iti biag nga agnanayon.—Ara. 14:27; Juan 17:3.