Panangirakurak iti Pannakaammo a Mangiturong iti Biag nga Agnanayon
1 Ni Jehova “Daydiay mangisuro kadagiti tattao iti pannakaammo.” (Sal. 94:10) Usarennatayo a mangirakurak iti makasalbar-biag a pannakaammo maipapan kenkuana kadagidiay saan a makaammo no kasano a maawat ti panagserbida kenkuana. Nasayaat nga alikamen a pangisuro ti libro a Pannakaammo a Mangiturong iti Biag nga Agnanayon a tumulong kadagiti nasingpet ti panagpuspusona a gumun-od iti umiso a pannakaammo iti kinapudno. (1 Tim. 2:3, 4) Ti nalawag ken lohikal a panamagsasaganad ti kinapudno iti libro a Pannakaammo tulonganna dagiti tattao a mangtarus no ania ti isursuro ni Jehova kadakuada. Iti daytoy a bulan kayattayo ti makisao kadagiti tattao iti wagas a manggargari kadakuada a mangbasa iti libro. Adtoy ti sumagmamano a singasing. Padasenyo nga iyebkas dagitoy iti bukodyo a sasao ken iti gagangay a wagas ti pannakisao.
2 Yantangay kaaduan a tattao ti nalabit nakapukaw iti ay-ayatenna ken patay, mabalinyo nga iruar iti saritaan ti namnama a panagungar babaen ti panagkuna nga umuna iti kastoy:
◼ “Kaaduan kadatayo ti nakapukaw iti ay-ayatenna ken patay. Pinampanunotyo kadin no makitatayto manen? [Palubosan a sumungbat.] Ti ipapatay ket saan a paset ti orihinal a panggep ti Dios iti tao. Pinaneknekan ni Jesus a mabalin a maalaw manipud ken patay dagiti ay-ayatentayo. [Basaenyo ti Juan 11:11, 25, 44.] Idemostra daytoy no ania ti inkari ti Dios nga aramidenna kadatayo. [Ukagen ti libro a Pannakaammo iti ladawan idiay panid 85 ken basaen ti kapsion. Kalpasanna ipakita ti ladawan iti panid 86 ken komentuan dayta.] No kayatyo a mabasa ti ad-adu pay maipapan iti daytoy namnama a panagungar, ragsakek nga ibati kadakayo daytoy a libro.”
3 Kalpasan ti umuna a panagsaritayo maipapan iti namnama a panagungar, mabalinyo a rugian ti sumaruno a saritaan iti dayta a tao iti kastoy:
◼ “Nalabit a malagipyo daydi kinunak a ti ipapatay ket saan a paset ti orihinal a panggep ti Dios para iti tao. No pudno dayta, apay ngarud a lumakay/bumaket ken mataytayo? Agbiag ti dadduma a pag-ong iti nasurok a 100 a tawen, ken adda pay dagiti kayo nga agbibiag iti rinibun a tawen. Apay a dagiti tattao ket agbiagda laeng iti 70 wenno 80 a tawen? [Palubosan a sumungbat.] Mataytayo agsipud ta nagsukir iti Dios ti immuna a natauan nga agassawa.” Basaenyo ti Roma 5:12. Iturongyo iti panid 53 iti libro a Pannakaammo sa basaen ti paulo ti kapitulo. Usigen ti umuna a tallo a parapo, a mangipakita kadagiti sungbat dagiti naimaldit a saludsod. Iyurnos ti panagsubli tapno mapagsaritaan ti natda iti kapitulo.
4 No makisaokayo iti maysa a tao nga agparang a relihioso, mabalinyo a kunaen:
◼ “Adda ginasut a nagduduma a relihion ita. Isuroda ti adu nga agsusupadi a pammati. Kunaen ti dadduma a tattao a naimbag amin a relihion ket saan a nasken no ania ti patpatientayo. Ania ti opinionyo? [Palubosan a sumungbat.] Insuro ni Jesus ti pudno a relihion ket impakitana a saan nga awaten ti Dios dagiti sabali a porma ti panagdayaw. [Basaenyo ti Mateo 7:21-23.] No kayattayo nga ay-aywen ti Dios, masapul a dayawentayo maitunos iti pagayatanna.” Luktan ti libro a Pannakaammo iti kapitulo 5, basaen ti paulo ken dadduma a subtema. Itukon kenkuana ti libro.
5 Mabalin nga apresiaren dagiti tattao a mariribukan gapu iti kaadu ti relihion ti sungbat daytoy a saludsod inton agsarungkarkayo:
◼ “Iti kaadu dagiti nagduduma a relihion nga adda ita, kasanotayo a maibaga no ania ti pudno? Kasanoyo nga ilasin ti umiso a relihion? [Palubosan a sumungbat.] Imbaga ni Jesus kadatayo no kasano a mailasin dagiti pudno a pasurotna.” Basaenyo ti Juan 13:35. Usigen ti parapo 18 ken 19 iti kapitulo 5 ti libro a Pannakaammo. Ipaganetget a babaen iti panangusar kadagitoy Nainkasuratan a giya, mabigbig ti maysa a tao ti pudno a relihion. Isalaysay no kasano nga agdindinamag dagiti Saksi ni Jehova iti intero a lubong gapu iti pudno nga ayat ken nangato a pagalagadanda iti moral. Ilawlawag no kasano a silalawag nga ilasin ti panagadal iti Biblia, babaen ti panangusar iti libro a Pannakaammo, ti porma ti panagdayaw nga anamongan ti Dios.
6 No makasabetkayo iti nagannak, mabalin nga epektibo daytoy nga iyaasideg:
◼ “Kada aldaw, makadamagtayo kadagiti nasukir a kababalin dagiti agtutubo nga agparang nga awan aniaman a moral a pagalagadanda. Pabasolen ti dadduma dagiti eskuelaan gapu iti saanda a panangisuro kadagiti ubbing no ania ti naimbag ken dakes. Siasino ti pagarupyo a rumbeng a mangipaay iti daytoy a panangsanay? [Palubosan a sumungbat.] Imdenganyo ti kuna ti Biblia iti daytoy a saludsod. [Basaenyo ti Efeso 6:4.] Ibaga dayta kadatayo a ti panangimula iti moral a pagalagadan kadagiti annak ket responsabilidad dagiti nagannak.” Ukagen ti libro a Pannakaammo iti panid 145, basaen ti parapo 16, ken komentuan dagiti ladawan iti panid 147. Ilawlawag a ti libro ket nadisenio nga adalen ti intero a pamilia. Babaen ti panangusar kadagiti parapo 17 ken 18 iti panid 146, itukon ti pannakaidemostra no kasano nga idaulotayo ti panagadal kadagiti pamilia.
7 No nairugiyo ti panagadal iti maseknan a naganak iti umuna a panagsarita, mabalinyo nga ituloy dayta inton agsarungkarkayo babaen ti panagkuna:
◼ “Nakaad-adu a sulisog ti pangipasanguan ti lubong ita kadagiti agtutubo. Mangparigat unay daytoy kadakuada nga agbalin a managbuteng iti Dios bayat ti idadakkelda. Nalabit malagipyo nga iti napalabas a panagsaritatayo, inlasintay dagiti dua a prinsipio. Kas nadiosan a nagannak, masapul a mangituyangtay kadagiti naimbag a pagulidanan dagiti annaktayo, ken iyebkas a kanayon ti ayattayo kadakuada. Adda pay sabali a banag nga ibaga ti Biblia a kasapulan dagiti annak kadagiti nagannakda.” Basaenyo ti Proverbio 1:8. Iturongyo iti panid 148 iti libro a Pannakaammo ket itultuloy ti panagadal, a saklawenyo ti parapo 19-23. Isingasingyo nga agsublikayto manen tapno agadalkayo a kadua ti intero a pamilia, a mangrugi iti kapitulo 1.