Agbalinkayo nga Amin-Kararua!
1 Adut’ makagapu nga agyamantay ken Jehova. Ramanen dagitoy ti bambanag nga inaramidna iti napalabas, ti ar-aramidenna ita, ken ti aramidennanto pay kadatayo iti masanguanan. Ania koma ti pangtignayan ti panagyamantayo nga intay aramiden? Sumungbat ni David: “Idaydayawkonto ni Jehova iti amin a tiempo; iti agnanayon ti dayawna addanto iti ngiwatko.”—Sal. 34:1.
2 Idi nagdedikartayo ken Jehova, tinallikudantay ti bagitayo ket imbaklaytay ti kayo a pagtutuokan kas disipulo ni Jesus. (Mat. 16:24) Ania ti kayat a sawen dayta? Ti tao a nangtallikud iti bagina pagbalinenna ti pagayatan ti Dios a kapatgan a panggep iti biag. Pagayatan ni Jehova a maipakaammo ti naganna iti amin a daga.—Sal. 83:18.
3 Sibabatad nga ipakita ti Biblia a nabilintayo a mangasaba. Daytoy ket trabaho nga aramidentayo iti “amin-kararua a kas maipaay ken Jehova.” (Col. 3:23) Kasano kawadwad ti rebbeng nga aramidentayo iti ministerio no agpaypayso nga amin-kararua ti ipapaaytayo? No panunotentay ti ayat ni Jehova kadatayo, sigurado a tignayennatay dagiti pusotayo a naan-anay a makiraman iti panangibaga iti sabsabali maipapan kenkuana ken dagiti panggepna!
4 Ti tao nga amin-kararua kayatna nga ipamaysa ti atensionna iti sagrado a serbisio. Kinuna ti salmista: “Maminpito iti inaldaw nga idaydayawka.” (Sal. 119:164) Gundawayan dagidiay adda riknana a kas iti salmista ti amin nga oportunidad a mangidayaw ken Jehova.
5 Nalawlawtayo Kadagiti Oportunidad a Mangidayaw ken Jehova: Saantayo a masapul nga urayen ti intay pannakiraman iti trabaho a panagbalaybalay a mangikasaba iti naimbag a damag. Masapul a mangngeg amin dagiti katrabahuan, kaeskuelaan, kabagian, ken kaam-ammotayo ti mensahe ti Pagarian. No agbiahetayo, mabalin a rugiantayo a kasarita dagiti padatayo a pasahero, dagiti agtartrabaho iti restawran, agserserbi iti gasolinaan, wenno agmanmaneho ti taksi. No addatayo iti pagtaengan, mabalin a kasabaantay dagiti kaarruba wenno dagiti ahente. No maospitaltayo, addada narses, dodoktor, ken dadduma a pasiente a makasabaantayo nga impormal.
6 Adda Resulta ti Impormal a Panangasaba: Adda dua a Saksi a magmagna iti parke iti maysa nga aldaw ket rinugianda a kasarita ti maysa nga lalaki nga agkabannuag nga agpaspasiar a kadua ti anakna. Idi agtanoy, inabrasada ken ni baketna ti kinapudno. Impudno ti lalaki kalpasanna a nagkararag iti Dios, saan a nabayag sakbay a nakasaritana ti dua a Saksi, a nagkiddaw, ‘No pudno nga addaka, pangngaasim ta ipalubosmo a maam-ammoka.’ Imbilangna ti pasamak idiay parke a kas sungbat ni Jehova iti kararagna.
7 Masagrap dagidiay agbalin nga amin-kararua ti kadakkelan a rag-o. Ammoda a ti panagserbi a “buyogen ti naan-anay a puso” ket makaparagsak ken Jehova.—1 Cron. 28:9.