Saantay Pay a Naaddaan ti Kastat’ Kasayaatna iti Naespirituan!
1 Iliwen ti kaaduan a tattao ti aldaw a mabalinda a kunaen, “Saantay pay a naaddaan ti kastat’ kasayaatna!” Kayatda a sawen a namnamaenda ti maaddaan iti nabuslon a material a bambanag, tapno mabalinda ti ‘agnam-ay, mangan, uminum, ken pagumaen ti bagbagida.’ (Luc. 12:19) Iti kasupadina, maikunatayo ita, nga awan ti pagkurangantayo iti naespirituan a pannao. (Sal. 34:10) Kasano a posible dayta?
2 Kunaen ti Proverbio 10:22 a “ti bendision ni Jehova—ti mangpabaknang.” Maikunatayo a ti Dios “sibabaknang a mangipaay kadatayo iti isuamin a bambanag a pagragsakantayo.” (1 Tim. 6:17) Pagbalinennatayo daytoy a kababaknangan a tattao ditoy daga!
3 Panangbilang Kadagiti Bendisiontayo: Nupay saan nga adu ti kukuatayo a material, saantay unay a madanagan maipapan ti inaldaw a kasapulantayo. Ammo ni Jehova ti kasapulantayo, ket inkarina nga ipaayna dagita. (Mat. 6:31-33) Ikkannatay daytoy iti natalna a panunot a pudno a di magatadan.
4 Nupay kasta, ad-adu pay dagiti naespirituan a bendisiontayo. Agpannuray ti biagtayo iti naespirituan a taraon manipud ken Jehova. (Mat. 4:4) Agbisin dagidiay mangnamnama iti nailubongan a gubuayan maipaay iti naespirituan a sustento bayat a pennekennatayo a sibubuslon ti ‘matalek nga adipen.’—Isa. 65:13; Mat. 24:45.
5 Ti sangalubongan a panagkakabsattayo ipaayannatay iti pannakilangen kadagiti naayat a kakabsat iti amin a paset ti daga. (Juan 13:35) Ti lokal a kongregasion isut’ lugar a pakasarakantayo iti liwliwa ken bang-ar. Bambantayan dagiti panglakayen ti kararuatayo, tultulongandatayo a mangsaranget kadagiti adu a kita ti problema. (Heb. 13:17) Mangparegta ken mangpapigsa kadatayo nga agitured ti pannakisingedtay kadagiti kakabsattayo.—Roma 1:11, 12.
6 Uray ti trabahotayo ket maysa a bendision. Ti panangiraman iti naimbag a damag mangyeg iti rag-o iti sabsabali ken ragsak kadatayo. (Ara. 20:35) Pudno a makasaraktayo iti imbag iti amin a nagbannogantayo.—Ecl. 2:24.
7 Kangrunaan ti amin, addaantayo iti nakaskasdaaw a namnama iti masakbayan. (Roma 12:12) Paspasungadantay ti maysa a perpekto a baro a lubong ti kinalinteg, a sadiay mabalintayto ti agbiag a kadua dagiti dungdungnguentayo iti ragsak ken talna iti agnanayon!
8 Kasanotay nga Ipakita ti Panangipategtayo? Pulos a ditay makasubad ken Jehova iti naaramidannan kadatayo. Mabalintay laeng nga iyebkas ti panangipategtayo babaen ti (1) panagyaman kenkuana iti inaldaw gapu iti di magatadan nga asina (Efe. 5:20), (2) panangidemostra iti ayattayo babaen ti kinatulnog (1 Juan 5:3), (3) panangsantipikar iti naganna babaen ti panangikasaba ti naimbag a damag (Sal. 83:18), ken (4) panangsuporta iti kongregasion Kristiano babaen ti naimpusuan a kooperasiontayo.—1 Tim. 3:15.
9 Addaantayo ti amin a rason nga agbalin a karagsakan a tattao ditoy daga. (Sal. 144:15b) Sapay koma ta irimat ti kababalin, kondukta, ken serbisiotayo ti mariknatayo a rag-o iti naespirituan a paraisotayo—a saantay pay a naaddaan ti kastat’ kasayaatna!