Itultuloyyo nga Isao ti Kinapudno
1 Kinuna dagiti apostol: “Dikam mabalin ti agsardeng nga agsao maipapan kadagiti bambanag a nakita ken nangngegmi.” (Ara. 4:20) Ita addaantayon iti nawadwad a literatura ti Biblia nga usaren iti ministeriotayo, ngem masapul nga itultuloytay met nga isao ti kinapudno. Adtoy ti sumagmamano a wagas tapno maaramid daytoy bayat a sarungkarantayo dagidiay immawat iti kallabes a ruar.
2 No surnadan ti naipaima nga espesial nga “Agriingkayo!” ti Abril iti topikona nga “Inton Awanen Dagiti Gubat,” mabalinyo a kunaen:
◼ “Iti napalabas, nagsaritaantayo maipapan iti gubgubat ken ti pannakipaset ti relihion kadagita. Nabigbigyo kadi a paneknekan dagita a pasamak nga agbibiagtayon iti maudi nga al-aldaw? [Ipakita ti libro a Pannakaammo. Basaen ti umuna a parapo iti kapitulo 11, ken ipakita ti kahon iti panid 102.] Ilawlawag daytoy a libro ti suheto ken 18 a sabali pay a nailista ditoy dagiti linaonna. [Ipakita ti panid 3.] Kayatko koma nga idemostra no kasano a makatulong daytoy a libro kadakayo.” No maipalubos, irugi ti panagadal iti panid 6.
3 No napagsaritaanyo maipapan iti natalged a biag iti Mayo 15 a “Pagwanawanan” iti umuna a pannakisaritayo, mabalinyo a kunaen ti kaasping daytoy:
◼ “Idi damo a nagsaraktayo, binasatay ti maysa a teksto manipud iti Biblia a mangted kadatayo iti namnama iti masakbayan. Ita nga aldaw kayatko nga ilawlawag no siasino ti makaited kadatayo iti kasta a rikna ti kinatalged itan.” Basaen ti Salmo 4:8. Luktan ti libro a Pannakaammo iti panid 168 sa basaen ti parapo 19. Kalpasanna isaludsod: “Ragsakenyo kadi ti maaddaan iti libre a panagadal ti Biblia iti pagtaengan tapno masarakanyo daytoy a kita ti kinatalged iti biagyo?” No wen ti sungbat, iturong iti kapitulo 1.
4 No napagsaritaanyo idi damo nga ipapanyo maipapan iti pannakigayyem iti Mayo 22 nga “Agriingkayo!”, mabalinyo nga ibaga ti sumaganad iti panagsubliyo:
◼ “Idi napalabas, nagsaritaantayo no kasano a maaddaantay kadagiti nasasayaat a gagayyem. Ngem aniat’ mapasamak no tumaud ti di panagkikinnaawatan? Pagpatinggaen ngata daytoy ti pannnakigayyem? [Palubosan a sumungbat.] Iti artikulo a nagsaritaantayo itay napan a lawas, adda bennegna a ‘No Rumsua Dagiti Parikut.’ Di la mabalin nga alaenyo ti kopiayo?” Pagsaritaan iti apagbiit ti artikulo sa basaen ti Efeso 4:26. Kalpasanna iturong ti panagsasarita iti libro a Pannakaammo, nalabit usaren dagiti punto iti panid 166.
5 Mabalin nga itukonyo a direkta ti panagadal iti panagsarungkaryo babaen ti panangikuna:
◼ “Iwarwarasmi dagiti magasinmi tapno maipakaammo iti tattao no ania ti isursuro ti Biblia. No ipateg dagiti tattao ti maadalda, itukonmi ti libre a panagadal ti Biblia iti pagtaengan. [Iturong iti kahon nga ‘Awatenyo Kadi ti Maysa nga Isasarungkar?’ iti makinlikud nga akkub Ti Pagwanawanan.] Usarentayo daytoy a libro, Pannakaammo a Mangiturong iti Biag nga Agnanayon, kas giya. Ipakitak kadakayo no kasano a maikondukta ti panagadal.”
6 No itultuloytayo a sawen ti kinapudno, masiguradotayo nga addanto sumagmamano a sidadaan a dumngeg ken mangipangag.—Mar. 4:20.