Ad-adu a Kakabsat a Lallaki ti Kasapulan iti Serbisio a Kinapayunir
1 Indagadag kadatayo ni Pablo a ‘kanayon koma nga aduantayo iti aramid ti Apo.’ (1 Cor. 15:58) Kadagiti adu, kaipapanan daytoy ti panagserbi kas payunir. Manipud Setiembre, 1995 agingga iti Marso, 1996, nasurok a 1,200 ti nainayon iti ranggo dagiti payunir ditoy Pilipinas! Awan duadua nga adunto pay ti agaplikar inton Setiembre 1, 1996, ti rugi ti baro a tawen ti serbisio!
2 Iti agdama ad-adu dagiti babbai nga agserserbi kas payunir iti daytoy a pagilian. (Sal. 68:11) Anian a rag-o iti kongregasion no ad-adu pay koma a kakabsat a lallaki ti tumipon iti ranggo dagiti amin-tiempo nga ad-adipen! (Sal. 110:3) Kaawatan nga adu a kakabsat a lallaki ti addaan kadagiti nadagsen nga obligasion a sekular ken iti pamilia a rebbeng a tamingenda. Sipipinget nga as-asikasuen ti dadduma dagiti naespirituan a kasapulan ti kongregasion. Patgentayo dagitoy a lallaki a mangar-aramid iti amin a kabaelanda a maipuon iti Pagarian.—1 Tim. 4:10.
3 Nupay kasta, kakabsat a lallaki, adu pay kadi kadakayo ti makabael nga agserbi kas payunir? No agpaypayunir ni baketmo, mabalinmo met kadi ti agpayunir? No nagretirokan, dika kadi umanamong nga awanen ti mas makapnek a pangusaran iti tiempom ngem iti amin-tiempo a ministerio? No kalkalpasmo ti haiskul, sipapasnek ken nainkararagan a pinampanunotmo kadin a gundawayan ti pribilehio nga agserbi kas payunir a kas pagtalaytayan iti kanayonan a pribilehio kas iti panagserbi idiay Bethel?—Efe. 5:15-17.
4 Inlako ti maysa a kabsat a lalaki ti narang-ay a negosiona sa nangala iti part-time a trabaho tapno makapagpayunir. Gapu iti nasayaat a panangidaulona, tallo kadagiti uppat nga annakna ti nagbalin a payunir apaman a nalpas ti panageskuelada. Magagaran met ti maikapat nga agpayunir. Sibabaknang a nabendisionan daytoy a kabsat a lalaki ken ti pamiliana.
5 Silulukat ti Dakkel a Ruangan: Ti serbisio a kinapayunir mabalin a luktanna ti “dakkel a ruangan a mangiturong iti panagaramid.” (1 Cor. 16:9) Mabalin nga adu ti pakausaran dagiti kakabsat a lallaki a payunir iti kongregasion. Ti naregta nga aktibidad iti tay-ak pasayaatenna ti naespirituan a takderda ken makatulong iti teokratiko nga irarang-ayda. Ti panagpayunir mabalin a luktanna ti dalan nga agturong iti kanayonan a pribilehio iti serbisio. Mabalin a maysa dayta a pagtalaytayan iti panagserbi idiay Bethel. Kalpasan ti makatawen a panagpayunir, maysa a bendision ti itatabuno iti Pioneer Service School. Mabalin a ragpaten dagiti agwaywayas a ministerial nga adipen ken panglakayen ti itatabuno iti Ministerial Training School. Wen, ti ministerio a kinapayunir luktanna ti ruangan nga agturong kadagitoy a dakdakkel a pribilehio iti serbisio iti organisasion ni Jehova.
6 Dagiti kakabsat a lallaki a makayurnos kadagiti aramidda tapno makapagserbida kas regular payunir mabalin a mapasaranda ti dakdakkel a ragsak nga aggubuay iti naparang-ay a panangted.—Ara. 20:35.