Siasino ti Kualipikado a Mangasaba?
1 Maipapan iti ministerio, nariknayo kadin ti kas iti narikna ni Moises? Kinunana: “Dispensarem, O Jehova, ta saanak a nalaing a sumasao, uray idi kalman wenno sakbay dayta wenno uray manipud pannakisaom iti adipenmo.” (Ex. 4:10, NW) No kasta ti mariknayo, mabalin nga agannayaskayo nga agkedked. Kaskasdi, ‘binilinnatayo [ni Jesus] a mangasaba kadagiti tattao ken mangipaay iti naan-anay a pangsaksi.’ (Ara. 10:42) Gapuna, kasanotayo nga agbalin a kualipikado a manangaskasaba?
2 Saan a ti sekular nga edukasiontayo ti mangkualipikar kadatayo iti ministerio. Kinuna ni Pablo a “saan nga adu a mamasirib iti nainlasagan a pamay-an ti naayaban.” (1 Cor. 1:26) Pinili ni Jesus dagiti apostolna manipud kadagiti trabahador—uppat kadakuada ti mangngalap. Minatmatan ida dagiti napalangguad a relihioso a pangulo kas ‘tattao nga awan adalna ken gagangay.’ No iti pagrukodan ti lubong, saan a kualipikado dagiti apostol a mangasaba. Kaskasdi, ti nagsayaat a diskurso ni Pedro idi aldaw ti Pentecostes tinignayna ti 3,000 a nagpabautisar!—Ara. 2:14, 37-41; 4:13.
3 Ni Jehova ti Mangkualipikar Kadatayo a Mangasaba: Kinuna ni Pablo: “Ti panagbalinmi a makaanayen a kualipikado agtaud iti Dios.” (2 Cor. 3:5) Minilion ti sinursuruan ni Jehova a mangikasaba iti kinapudno ti Pagarian kadagiti sabsabali. (Isa. 54:13) Makita ti kinaepektibo daytoy a trabaho iti 338,491 a nabautisaran idi napan a tawen kas sibibiag a ‘sursurat ti rekomendasion.’—2 Cor. 3:1-3.
4 Nangipasdek ti organisasion ti Dios iti internasional a programa a panangsanay kadagiti ministro. Babaen ti Kasuratan ken adu a katulongan iti panagadal iti Biblia, nasanaytayo nga agbalin a ‘naan-anay a makabael, naan-anay a nakabalan’ a mangasaba. (2 Tim. 3:16, 17) Magustuan dagiti adu ti nagsayaat nga impormasion a masarakan kadagiti publikasion ti Sosiedad. Kas pagarigan, kinuna ti maysa a pagiwarnak ti Sweden: “Iti likud ti pammati nga ikaskasaba dagiti Saksi ni Jehova, adda nakaskasdaaw ti kinasayaatna nga edukasion iti Biblia nga agpaay iti amin a nasion.”
5 Babaen ti panangiwanwan a maipapaay kadagiti lima a linawas a gimongtayo, ti programatayo a panagbasa ken panagadal iti Biblia, ti pammagbaga iti Teokratiko nga Eskuelaan ti Panagministro, ti personal a tulong dagiti sabsabali a nasanay a ministro, ken kangrunaan iti amin, ti pannaranay ti nasantuan nga espiritu ni Jehova, makapagtalektayo nga ibilangnatayo ni Jehova a naan-anay a kualipikado a mangasaba.—2 Cor. 2:17.
6 No aprobetsarentayo ti panagsanay a maipapaay babaen ti organisasion ti Dios, awan panggapuantayo nga agkedked. Mabalintayo ti mangasaba a sirarag-o kadagiti sabsabali, a siinanama a bendisionan ni Jehova ti reggettayo.—1 Cor. 3:6.