Naan-anay a Nakabalan kas Mannursuro iti Sao ti Dios
“Ti Dios . . . pudno unay a namagbalin kadakami a makaanayen a kualipikado a ministro.”—2 CORINTO 3:5, 6.
1, 2. Kasano ti panangikagkagumaan ti dadduma a mangasaba, ngem apay a masansan a mapaayda?
KAYATYO kadi ti maikkan iti trabaho a diyo paglaingan? Darepdepenyo: Adda iti sanguananyo ti amin a piesa ken rimienta a kasapulanyo. Ngem diyo ammo no kasanoyo nga ibanag idinto ta naganat dayta a trabaho. Mangnamnama kenka dagiti tattao. Nakalkaldaang la ketdi dayta!
2 Adda dagiti kasta a kasasaad. Usigenyo daytoy a pagarigan. No dadduma, adda relihion ti Kakristianuan a mangorganisar ken mangaramid iti panangasaba iti binalaybalay. Ngem masansan a mapaay ti kasta a panagregget, nga agpaut iti sumagmamano laeng a lawas wenno bulan. Apay? Saan ngamin a natulongan ti Kakristianuan dagiti pasurotna nga agbalin a kualipikado iti dayta a trabaho. Saan pay ketdi a kualipikado a mangasaba uray dagiti klero, nupay adu a tawen a nagadalda kadagiti sekular nga eskuelaan ken seminario. Apay a maikunatayo ti kasta?
3. Iti 2 Corinto 3:5, 6, ania a sasao ti namitlo a nausar, ket ania ti kaipapananna?
3 Ilanad ti Sao ti Dios no ania ti kualipikasion ti pudno a manangikasaba iti Nakristianuan a naimbag a damag. Napaltiingan ni apostol Pablo a mangisurat: “Saan a gapu ta dakami a mismo ket makaanayen a kualipikado a mangibilang iti aniaman a banag kas agtaud iti bagbagimi, no di ket ti panagbalinmi a makaanayen a kualipikado agtaud iti Dios, a pudno unay a namagbalin kadakami a makaanayen a kualipikado a ministro.” (2 Corinto 3:5, 6) Imutektekanyo ti sasao a namitlo a nausar ditoy—‘naan-anay a kualipikado.’ Ania ti kaipapananna? Kuna ti Vine’s Expository Dictionary of Biblical Words: “No ti tuktukoyenna ket bambanag [ti orihinal a Griego a sao] kaipapananna ‘umdas’ . . . ; no ti tuktukoyenna ket tao, ti kaipapananna ‘makabael,’ ‘maikari.’” No kasta, ti ‘naan-anay a kualipikado’ ket makabael ken maikari a mangibanag iti annongen. Wen, dagiti pudno a ministro ti naimbag a damag kualipikadoda a mangaramid iti dayta a trabaho. Makabael ken maikarida a mangasaba.
4. (a) Kasano nga impakita ti ulidan ni Pablo a saan laeng a sumagmamano a napili ti makualipikar iti Nakristianuan a ministerio? (b) Ania dagiti tallo a pamay-an nga us-usaren ni Jehova tapno makualipikartayo nga agbalin kas ministro?
4 Ngem kasano a makualipikar iti dayta? Babaen kadi kadagiti personal nga abilidad? Kinasaririt? Propesion a nagun-od kadagiti nalatak nga eskuelaan? Agparang nga adda amin dagita a banag ken apostol Pablo. (Aramid 22:3; Filipos 3:4, 5) Kaskasdi, sipapakumbaba a binigbigna a ti kualipikasionna kas ministro ket naggapu, saan a kadagiti eskuelaan ti nangato nga edukasion, no di ket ken ni Jehova a Dios. Manmano laeng kadi a napili ti makualipikar? Iti surat ni Pablo iti kongregasion sadi Corinto, dinakamatna ti ‘panagbalintayo a makaanayen a kualipikado.’ Mangipasimudaag dayta a siertuen ni Jehova nga amin a matalek nga adipenna ket makabael a mangaramid iti trabaho nga impaannongna. Kasano a tulongan ni Jehova a makualipikar dagiti pudno a Kristiano ita? Usigentayo dagiti tallo a pamay-an nga us-usarenna: (1) ti Saona, (2) ti nasantuan nga espirituna, ken (3) ti organisasionna ditoy daga.
Makualipikartayo Babaen ti Sao ni Jehova
5, 6. Ania ti epekto ti Nasantuan a Kasuratan kadagiti pudno a Kristiano?
5 Umuna, kasano a tulongannatayo ti Sao ti Dios tapno makualipikartayo nga agbalin a ministro? Insurat ni Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 3:16, 17) Gapuna, tulongannatayo ti Nasantuan a Kasuratan nga agbalin a ‘naan-anay a makabael, naan-anay a nakabalan’ a mangibanag iti “naimbag nga aramid” a panangisuro kadagiti tattao maipapan iti Sao ti Dios. Ngem komusta met dagiti pasurot dagiti relihion ti Kakristianuan? Adda Bibliada. Apay ngarud nga adda tattao a matulongan daytoy a libro ngem adda met dagiti dina matulongan? Agpannuray ngamin dayta iti panangmatmattayo iti Biblia.
6 Makapaladingit ta adu a makimismisa ti di mangbigbig iti mensahe ti Biblia “kas iti kinapudno daytoy, kas sao ti Dios.” (1 Tesalonica 2:13) Nakababain ti pakasaritaan ti Kakristianuan no maipapan iti daytoy. Kalpasan a nagadalda iti adu a tawen kadagiti eskuelaan ti teolohia, nakabalan kadi dagiti klero a mangisuro iti Sao ti Dios? Saan. Agasenyo, dadduma nga estudiante ti mangrugi kadagiti seminario kas manamati iti Biblia, ngem agbalinda a managduadua no agturposdan! Kalpasanna, imbes nga ikasabada ti Sao ti Dios—a saanen a patien ti adu kadakuada—sabalin a bambanag ti pangipamaysaanda iti ministerioda, kas iti pannakibiang kadagiti napolitikaan nga isyu, panangrisut kadagiti problema ti kagimongan babaen dagiti natauan a programa, wenno panangipaganetget kadagiti natauan a pilosopia kadagiti sermonda. (2 Timoteo 4:3) Maisupadi iti dayta, tuladen dagiti pudno a Kristiano ti ulidan ni Jesu-Kristo.
7, 8. Ania ti nagdumaan ti panangmatmat ni Jesus iti Sao ti Dios ken ti panangmatmat dagiti panguluen ti relihion idi kaaldawanna?
7 Saan nga impalubos ni Jesus a sukogen dagiti relihioso a panguluen ti panagpampanunotna. Ti sursuruanna man ket bassit a grupo, kas kadagiti apostolna, wenno umariwekwek, kanayon nga inusar ni Jesus ti nasantuan a kasuratan. (Mateo 13:10-17; 15:1-11) Daytoy ti nakaidumaanna kadagiti panguluen ti relihion idi kaaldawanna. Dida kayat a maammuan dagiti gagangay a tattao dagiti nauneg a bambanag maipapan iti Dios. Kinapudnona, gagangay a patien dagiti mannursuro kadagidi nga aldaw nga addada teksto iti Biblia a narikut unay, ket iti laeng kasingedan nga estudiantena ti mabalinna a pangilawlawagan kadagita—kaskasdi, aramidenna dayta iti naalumamay a timek ken nakadalungdong ti ulona. Dagidi a panguluen ti relihion ket agpada nga adda inaanito a pammatida no iti panangilawlawag iti dadduma a paset ti Biblia kas iti panangibalikas iti nagan ti Dios!
8 Saan a kasta ni Kristo. Patienna a saan laeng a sumagmamano ti napili no di ket amin a tattao ti masapul a mangusig iti “tunggal sao a rumrummuar iti ngiwat ni Jehova.” Saan a kayat ni Jesus a bassit laeng a grupo ti pangtedanna iti pannakaawat iti Kasuratan. Kinunana kadagiti adalanna: “Ti ibagak kadakayo iti sipnget, sawenyo iti lawag; ket ti mangngegyo a nayarasaas, ikasabayo manipud kadagiti tuktok ti balbalay.” (Mateo 4:4; 10:27) Kasta unay ti tarigagay ni Jesus a mangiranud kadagiti amin a tattao ti pannakaammo maipapan iti Dios.
9. Pangusaran dagiti pudno a Kristiano iti Biblia?
9 Ti Sao ti Dios ti nasken a nakaisentruan ti sursurotayo. Kas pagarigan, no agpalawagtayo iti Kingdom Hall dagiti Saksi ni Jehova, saan nga umdas a basaen lattan dagiti napili a teksto ti Biblia. Masapul nga ilawlawag, iyilustrar, ken usaren ti kasuratan sigun iti kontekstona. Kayattayo a maawatanda ti mensahe ti Biblia ken maitukit dayta iti puso dagiti agdengdengngeg. (Nehemias 8:8, 12) Nasken nga usaren met ti Biblia no kasapulan a mangbalakad wenno mangdisiplina. Nupay nadumaduma ti pagsasao ti ili ni Jehova ken nagduduma ti nalikudanda, raemenda amin ti kasayaatan a libro—ti Biblia.
10. Ania ti mabalin nga epektona kadatayo ti naipaltiing a mensahe ti Biblia?
10 No mausar buyogen ti kasta a panagraem, nabileg ti mensahe ti Biblia. (Hebreo 4:12) Gutugotenna dagiti tattao nga agbalbaliw, kas iti panangisardeng kadagiti di nainkasuratan nga aramid a pannakiabig, pannakikamalala, idolatria, panagbartek, ken panagtakaw. Tinulonganna ti adu a tattao a manguksob iti daan a personalidad ken mangisuot iti baro a personalidad. (Efeso 4:20-24) Wen, no ipangagtayo dayta imbes a dagiti opinion ti tao wenno tradision ket kanayon nga usarentayo, matulongannatayo ti Biblia nga agbalin a makabael, naan-anay a nakabalan kas mannursuro iti Sao ti Dios.
Makualipikartayo Babaen ti Espiritu ni Jehova
11. Apay a maikanatad a naawagan ti nasantuan nga espiritu ni Jehova kas “ti katulongan”?
11 Maikadua, usigentayo ti paset ti nasantuan nga espiritu, wenno aktibo a puersa ni Jehova, a naan-anay a mangkabal kadatayo. Ditay koma pulos liplipatan a ti espiritu ni Jehova ti kabilgan a puersa. Inikkan ni Jehova iti pannakabalin ti dungdungnguenna nga Anak tapno maiparangarang ni Jesus ti nakaskasdaaw a puersa agpaay iti amin a pudno a Kristiano. Maikanatad nga inawagan ni Jesus ti nasantuan nga espiritu kas “ti katulongan.” (Juan 16:7) Indagadagna kadagiti pasurotna a kiddawenda dayta nga espiritu ken Jehova, ket impanamnamana kadakuada a sipaparabur nga ipaay dayta ni Jehova.—Lucas 11:10-13; Santiago 1:17.
12, 13. (a) Apay a napateg nga ikararagtayo ti nasantuan nga espiritu a tumulong kadatayo iti ministerio? (b) Kasano nga impakita dagiti Fariseo a saan nga agtigtignay kadakuada ti nasantuan nga espiritu?
12 Masapul nga inaldaw nga ikararagtayo ti nasantuan nga espiritu, nangnangruna tapno tumulong kadatayo iti ministerio. Ania ti maaramidan kadatayo ti aktibo a puersa? Matignayna ti isip ken pusotayo, tulongannatayo nga agbalbaliw, rumang-ay, ken mangpabaro iti daan a personalidad. (Colosas 3:9, 10) Tulongannatayo a mangpatanor kadagiti agkakaimbag a galad ni Kristo. Adu kadatayo ti makaikabesa iti Galacia 5:22, 23. Linaon dagita a bersikulo dagiti bunga ti espiritu ti Dios. Ti umuna ket ayat. Napateg dayta a galad iti ministeriotayo. Apay?
13 Nabileg a mangtignay ti ayat. Ti panagayat ken ni Jehova ken iti pada a tao tignayenna dagiti pudno a Kristiano a mangiranud iti naimbag a damag. (Marcos 12:28-31) No awan ti kasta nga ayat, ditay mabalin ti makualipikar kas mannursuro iti Sao ti Dios. Imutektekanyo ti nagdumaan ni Jesus ken dagiti Fariseo. Kuna ti Mateo 9:36 maipapan ken Jesus: “Idi makitana dagiti bunggoy simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” Ania ti panangmatmat dagiti Fariseo kadagiti gagangay a tattao? Kinunada: “Daytoy a bunggoy a saan a makaammo iti Linteg nailunodda a tattao.” (Juan 7:49) Dagidi a Fariseo dida ay-ayaten ti tattao. Imbes ketdi, karimonda ida. Nalawag a saan nga agtigtignay kadakuada ti espiritu ni Jehova.
14. Ania koma ti epektona kadatayo ti ulidan ni Kristo maipapan iti panangipakita iti ayat iti ministeriona?
14 Maseknan ni Jesus kadagiti tattao. Ammona ti rigatda. Ammona a naabuso, nalalatan, ken naiwarawarada, kas karnero nga awanan iti pastor. Kuna kadatayo ti Juan 2:25 nga “ammo [ni Jesus] no ania ti adda iti tao.” Kas ti dinutokan ni Jehova a Nasigo a Managobra bayat ti panamarsua, di matukod ti pannakaammo ni Jesus no maipapan iti kababalin ti tao. (Proverbio 8:30, 31) Dayta a pannakaammo ti nangparayray iti ayatna. Sapay koma ta ti kasta nga ayat ti kanayon a mangtignay kadatayo a mangasaba! No makitatayo a masapul a parang-ayentayo daytoy, ikararagtayo ken Jehova ti nasantuan nga espirituna, satay agtignay maitunos iti kararagtayo. Ipangagnatayo ni Jehova. Ipaayna daytoy di mapagkedkedan a puersa tapno tumulong kadatayo a mangtulad ken Kristo, ti kangrunaan a kualipikado a mangikasaba iti naimbag a damag.
15. Kasano a ti sasao iti Isaias 61:1-3 agaplikar ken ni Jesus ken ibutaktakna pay dagiti eskriba ken Fariseo?
15 Asino ti nangkualipikar ken Jesus? Kinunana: “Ti espiritu ni Jehova adda kaniak.” (Lucas 4:17-21) Wen, ni Jehova a mismo ti nangdutok ken Jesus babaen ti nasantuan nga espiritu. Saan a kasapulan ni Jesus ti kanayonan a kualipikasion. Dinutokan kadi ti nasantuan nga espiritu dagidi a panguluen ti relihion idi kaaldawanna? Saan. Dida met nakabalan a mangtungpal iti Isaias 61:1-3, a sipipigsa a binasa ni Jesus ken inyaplikarna iti bagina. Pangngaasiyo ta basaenyo dagita a bersikulo ket kitaenyo no kasano a saan a nakualipikar dagidi a managinsisingpet nga eskriba ken Fariseo. Awan ti impakaammoda a naimbag a damag kadagiti napanglaw. Ken kasano koma a maikasabada kadagiti nakayawan ti maipapan iti pannakawayawaya ken ti pannakaisubli ti panagkita dagiti bulsek? Iti naespirituan nga anag, bulsekda ken nakayawanda kadagiti tradision a namunganay iti tao! Saan a kas kadagidi a lallaki, kualipikadotayo kadi a mangisuro kadagiti tattao?
16. Iti ania a makapagtalek ti ili ni Jehova ita no maipapan iti kualipikasionda kas ministro?
16 Pudno, saantayo a nagadal kadagiti eskuelaan ti Kakristianuan a mangituktukon iti nangato nga edukasion. Awan met ti diplomatayo kas mannursuro a naggapu iti seminario ti teolohia. No kasta, saan kadi nga umdas ti kualipikasiontayo? Adayo a kasta! Ni Jehova ti nangdutok kadatayo kas dagiti Saksina. (Isaias 43:10-12) No ikararagtayo ti espirituna ken agtignaytayo maitunos iti kararagtayo, adda kadatayo dagiti kangrunaan a kualipikasion. Siempre, imperpekto ken ditay naan-anay a matulad ti ulidan ti Naindaklan a Mannursuro, ni Jesus. Kaskasdi, saantayo kadi nga agyaman ken Jehova ta us-usarenna ti espirituna a mangkualipikar ken mangkabal kadatayo kas mannursuro iti Saona?
Makualipikartayo Babaen ti Organisasion ni Jehova
17-19. Kasano a ti lima a linawas a gimong nga inyurnos ti organisasion ni Jehova tulongannatayo nga agbalin a kualipikado kas ministro?
17 Usigentayo ita ti maikatlo a pamay-an nga us-usaren ni Jehova a mangkabal kadatayo kas mannursuro iti Saona—ti kongregasion wenno organisasionna ditoy daga, a mangsansanay kadatayo nga agbalin a ministro. Kasano? Panunotenyo laengen ti tagtagiragsakentayo a programa ti pannakaisuro! Kadagiti gagangay a lawas, tabunuantayo ti lima a Nakristianuan a gimong. (Hebreo 10:24, 25) Agtataripnongtayo iti babassit a grupo kadagiti Panagadal iti Libro ti Kongregasion tapno masukimat a naimbag ti Biblia babaen ti maysa a libro a magun-odan iti organisasion ni Jehova. Babaen ti panagimdeng ken panagkomento, makapagsisinnuro ken makapagpipinnaregtatayo. Makaawattayo met iti indibidual a pannakaisuro ken atension manipud iti konduktor ti panagadal iti libro. Iti Palawag Publiko ken Panagadal iti Pagwanawanan, magun-odtayo dagiti nabaknang a naespirituan a taraon.
18 Ti Teokratiko nga Eskuelaan ti Panagministro ket nairanta a mangiwardas kadatayo no kasano ti mangisuro. Babaen ti panangisagana kadagiti pasettayo kas estudiante, masursurotayo no kasano nga usaren ti Sao ti Dios a mangisuro maipapan iti nadumaduma a suheto. (1 Pedro 3:15) Nadutokankayo kadi a mangipalawag iti maysa a topiko a pamiliar kadakayo, ket adda latta naadalyo a baro a banag? Gagangay dayta. Maasa ti pannakaammotayo iti maysa a topiko no isurotayo dayta iti sabsabali. Uray no saan a datayo ti nadutokan iti maysa a presentasion, makasursurotayo latta nga agbalin a nalaing a mannursuro. Iti tunggal estudiante, makaadaltay kadagiti nasayaat a galad, ket mabalintayo nga utoben no kasano a matuladtayo dagita a galad.
19 Ti Gimong ti Serbisio ket nadisenio met a mangkabal kadatayo kas mannursuro iti Sao ti Dios. Linawas a mangngegtayo dagiti nabiag a palawag, diskusion, ken demostrasion a maibagay iti ministeriotayo. Ania a presentasion ti usarentayo? Kasanotay a tamingen dagiti naisangsangayan a karit iti publiko a ministeriotayo? Aniada a paset ti panangasabatayo ti mabalintayo pay a parang-ayen? Ania ti tumulong kadatayo nga agbalin nga ad-adda nga epektibo a mannursuro no agsarungkar ken mangyadaltayo iti Biblia? (1 Corinto 9:19-22) Dagita a saludsod ket mataming ken mailawlawag a detaliado iti Gimong ti Serbisio. Adu a paset ti gimong ti naibasar kadagiti artikulo Ti Ministeriotayo iti Pagarian, ti maysa pay nga alikamen a naipaay tapno makabalantayo iti napateg a trabahotayo.
20. Kasano a naan-anay a magunggonaantayo kadagiti gimong ken asamblea?
20 Makasursurotayo a naimbag no agsagana ken tabunuantayo dagiti gimong satay iyaplikar dagiti maad-adaltayo iti trabahotayo kas mannursuro. Ngem saan la a dayta. Adda met dagiti dadakkel a panagtataripnongtayo—dagiti asamblea ken kombension—a nadisenio a mangkabal kadatayo kas mannursuro iti Sao ti Dios. Anian a gagartayo a mangipangag a naimbag ken mangyaplikar kadagita a balakad!—Lucas 8:18.
21. Ania ti mangipakita nga epektibo ti pannakasanaytayo, ket asino ti makinggapuanan iti daytoy?
21 Epektibo met laeng kadi ti panangsanay nga ipapaay ni Jehova? Bay-antayo a dagiti pasamak ti mangpaneknek. Kada tawen, ginasut a ribu a tattao ti matultulongan nga agadal kadagiti kangrunaan a doktrina ti Biblia ken agbiag maitunos kadagiti bilin ti Dios. Umad-adu ti bilangtayo, ngem saan a maigapu dayta iti asinoman kadatayo. Masapul a realistiko ti panangmatmattayo kadagiti bambanag, kas inaramid ni Jesus. Kinunana: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” Kas kadagiti nagkauna nga apostol, kaaduan kadatayo ket ordinario ken saan a de adal. (Juan 6:44; Aramid 4:13) Agpannuray ken Jehova ti balligitayo, yantangay isu ti mangyadani kadagiti nasingpet a tattao iti kinapudno. Nagsayaat ti panangibaga ni Pablo: “Nagmulaak, ni Apolos nagsibug, ngem ti Dios ti nangpadpadakkel iti dayta.”—1 Corinto 3:6.
22. Apay a ditay koma maupay a makiraman a naan-anay iti Nakristianuan a ministerio?
22 Wen, ni Jehova a Dios ket aktibo a karaman iti trabahotayo kas mannursuro iti Saona. Mabalin nga addada gundaway a mariknatayo a saantay a kualipikado kas mannursuro. Ngem laglagipenyo a ni Jehova ti mangyadani kadagiti tattao nga agturong kenkuana ken iti Anakna. Ni Jehova ti mangkualipikar kadatayo a mangisuro kadagiti kabbaro babaen ti Sao, nasantuan nga espiritu, ken organisasionna ditoy daga. Aprobetsarentayo koma ti panangsanay ni Jehova babaen ti panangyaplikar kadagiti agkakaimbag a banag nga ipapaayna ita tapno naan-anay a makabalantayo kas mannursuro iti Sao ti Dios!
Ania ti Sungbatyo?
• Kasano a kabalannatayo ti Biblia agpaay iti trabaho a panangasaba?
• Ania ti paset ti nasantuan nga espiritu iti panagbalintayo a kualipikado kas ministro?
• Kadagiti ania a wagas a natulongannakayo ti organisasion ni Jehova ditoy daga tapno makualipikarkayo a mangikasaba iti naimbag a damag?
• Apay a natalged ti riknatayo bayat a makiramramantayo iti ministerio?
[Ladawan iti panid 25]
Kas mannursuro iti Sao ti Dios, impakita ni Jesus ti panagayatna kadagiti tattao