Dagiti Ministro ti Dios Paneknekanda ti Kualipikasionda

“Siasino ti naan-anay a kualipikado?”​—2 CORINTO 2:16.

1. Iti nasinasina iti relihion a lubong itatta, ania a saludsod ti mabalin a patauden iti amin a kinapasnek?

ITI daytoy a lubong a nasinasina iti relihion, daytoy a saludsod ti mabalin nga iyimtuod iti amin a kinapasnek: Siasino, kinapudnona ti autorisado a ministro ti Dios? Umas-asping met, insaludsod ni apostol Pablo: “Ket kadagitoy a bambanag siasino ti naan-anay a kualipikado?” Idi a nakarit, ni Pablo ken dagiti katrabahuanna maikunada: “Dakami”! (2 Corinto 2:16, 17) Ngem itatta, asino ti addaan natibker a pakaibatayan, ti kalintegan, ken ti tured a sumungbat iti, “Dakami”?

2. Ania ti kababagas dagiti sasao ni Pablo idiay 2 Corinto 2:14-17?

² Sakbay a sungbatan dayta a saludsod, usigentayo pay dagitoy a sasao ni Pablo kadagiti Kristiano idiay Corinto: “Ngem yaman pay iti Dios! Ta . . . sadinoman a papananmi aramatennakami a mangibaga kadagiti dadduma maipapan iti Apo ken tapno isaknap ti Ebanghelio kas nasam-it a bangbanglo. Ta no maipapan iti Dios adda ti maysa a nasam-it, makaay-ayo a banglo iti biagmi. Dayta ti banglo ni Kristo nga adda kadakami, maysa nga angot nga agpadpada kadagiti maisalakan ken kadagiti di maisalakan iti aglawlawmi. Kadagidiay saan a maisalakan, dakami ti maysa a nakabutbuteng nga angot ni patay ken pannakadadael, ngem kadagidiay a makaammo ken Kristo dakami ti makaited-biag a bangbanglo. Ngem siasino ti makaanay iti kasta a trabaho kas iti daytoy? Dagidiay laeng, kas kadakami, a tattao ti kinatarnaw, nga imbaon ti Dios, nga agsasao iti pannakabalin ni Kristo, a ti panangmatmat ti Dios adda kadakami. Ta saankami a kas kadagidiay agtagtagilako​—ket nagaduda​—a ti kapanunotanda iti panangiwaragawag ti Ebanghelio ket tapno dayta ti pagsapulanda.”​—2 Corinto 2:14-17, The Living Bible; kitaenyo met ti The Watchtower, Mayo 1, 1944, pinanid 133-4.

3. (a) Kasanot’ panagriknatayo iti kapanunotan a panangilaklako iti Sao ti Dios a maipaay iti naagum a gunggona? (b) Aniat’ inaramid ni Pablo tapno di agbalin a pinansial a padagsen kadagidiay kinaskasabaanna?

³ Ti panangilako iti Sao ti Dios a maipaay iti inaagum a pagganansiaan​—anian a m/akapasimron ti kasta a kapanunotan! Di sinapul ni Pablo ti pinansial a pagganansiaanna babaen ti panangikaskasaba iti dayta a sao tapno isut’ agbiag a sinanam-ay, a kamaudiananna mabalinnanton ti agretiro manipud iti ministerio ket im-imasennanton ti panagbiagna iti kamaudianan. Isut’ situtulok nga agaramid ti tolda kas panggedanna tapno makasapul ti kuarta para kenkuana ken makatulong kadagiti kakaduana iti serbisio ni Jehova. (Aramid 18:1-4) Saan a nagbalin a padagsen ni Pablo kadagidiay a nangikaskasabaanna iti naimbag a damag. Gapuna mabalinna a maisaludsod kadagiti Kristiano a taga Corinto: “Nakabasolak aya iti panagpakumbabak met laeng tapno madaydayawkayo koma idi, agsipud ta inkaskasabak kadakayo ti naimbag a damag ti Dios nga awan tangdanko?” (2 Corinto 11:7) Dayta a saludsod ti rebbeng a masungbatan iti positibo a saan!

4. Kasanot’ panangtulad dagiti Saksi ni Jehova iti ulidan ni Pablo maipapan iti Sao ti Dios?

⁴ Tultuladen itatta dagiti Saksi ni Jehova ti nagsayaat nga ulidan ti apostol iti saanda a panangilaklako iti nasudi a Sao ti Dios no di ket dayta ti pagbalinenda a silulukat kadagiti isuamin. Saanda nga ikomkomersio ti kasta a nasantuan a banag. Gapuna awananda kadagiti matangtangdanan a klero, dagiti managpalawagda iti publiko saanda nga agsingsingir para kadagiti palawagda, ket awan ti plato a pagkolekta a maipaspasa kadagiti paggigimonganda. No adda asinoman nga agtarigagay a tumulong iti kuarta a maipaay iti trabaho, mabalinna nga ikabil ti aniaman a kantidad, uray pay kas iti “dua a lepta a bassit ti pategna nga inted ti balo,” iti maysa a kahon ti kontribusion idiay Kingdom Hall wenno iti dadduma pay a lugar. (Lucas 21:1-4) Ti kasta a sibubulos a kontribusion ti maus-usar a pangbayad kadagiti aniaman a paggastuan ket saan a panangpabaknang iti asinoman nga indibidual. Uray pay dagiti pribado a pagtaengan ti sibubulos a mailukat a paggigimongan dagiti Saksi ni Jehova.​—Filemon 1, 2.

“Naan-anay a Kualipikado”

5. Asino ti namagbalin kadagiti Saksi ni Jehova a kualipikado para iti sagrado a serbisio?

⁵ Ngem asino itatta ti namagbalin kadagiti Saksi ni Jehova a kualipikado a mangibaklay iti kasta a Nainkasuratan a padron agpapan amin a pannakaidadanes ken ibubusor a kanayon a sagsagabaenda? Awan sabali a makasungbat iti daytoy no di ti Indibidual a namagbalin a naan-anay a kualipikado ken Pablo ken kadagiti kakaduana a maipaay iti sagrado a serbisio. Pangngaasiyo ta panunotenyo ti kinadalus ti motibo ni Pablo, a maisupadi iti mangtigtignay kadagiti narelihiusuan nga agtagtagilako, idi nga inlawlawagna: “No di ket agsaokami iti biang ni Kristo a kas buyogen ti kinapudno a kas nagtaud iti Dios, ken kas iti imatang ti Dios.” (2 Corinto 2:17) Kastoy ita ti panagsasao dagiti Saksi ni Jehova. Ngem irekrekomendartay met laeng aya dagiti bagbagitayo kas ministros? Kasapulan aya ti intay panangipablaak kadagiti sursurat iti rekomendasion manipud kadagiti sabsabali?

6. (a) Apay ipato dagiti klero ti Kakristianuan a “naan-anay a kualipikadoda”? (b) Ngem ania ti pakaibatayan ti panagbalin ti maysa a tao a naan-anay a kualipikado a maipaay iti pudno a Nakristianuan a ministerio?

⁶ Di inawat ni Pablo ti kualipikasionna iti ministeriona kas banag a pinatanorna. Kunana: “Ket ti pannakaan-anaymi a kualipikado agtaud iti Dios, isu a nangaramid met kadakami a naan-anay a kualipikado kas ministro iti baro a tulag.” (2 Corinto 3:4-6) Saan a kas ken Pablo, dagiti klero ti Kakristianuan kunada a “naan-anay a kualipikadoda” agsipud ta nagraduarda manipud kadagiti teolohikal a seminario. Gapuna ilibakda a dagidiay saan a nagraduar iti seminario ket kualipikado a ministros nga addaan autoridad a mangisuro. Ngem ti naisangsangayan a panagadal ni Pablo iti Judaismo ti saan a nangkualipikar kenkuana a maipaay iti Nakristianuan a ministerio maipapan iti baro a tulag. Ket di met nangipasdek ni Jesus iti aniaman a teolohikal a seminario para kadagiti 12 nga apostolesna wenno iti asino pay a tumabuno. Saan met a naiduma itatta, ti naan-anay a pannagbalin a kualipikado ti maysa a tao a maipaay iti pudno a Nakristianuan a ministerio ti masapul nga agtaud ken Jehova, ti naindaklan unay a Mannursuro. Siempre, ti kasta a ministro ti rebbeng a mangpataud kadagiti pammaneknek nga awan pannakailibakna.

“Siasino ti Nangted Kenka Itoy a Pannakabalin?”

7. Iti ania a pamay-an a dagiti narelihiusuan a papangulo naigiddiatda ken Nicodemo iti panangmatmatna iti pannakabalin ni Jesus?

⁷ Kinarit dagiti relihiuso a papangulo ti kalintegan uray pay ti Anak ti Dios a mangikaskasaba ti naimbag a damag ken ti panagaramidna kadagiti datdatlag. Idiay templo, “idi dimteng idiay templo dagiti panguluen dagiti papadi ken dagiti panglakayen dagiti umili, immasidegda kenkuana idi madama a mangisursuro ket kinunada: ‘Ania a pannakabalin ti pangaramidmo kadagitoy? Ket siasino ti nangted kenka itoy a pannakabalin?’” (Mateo 21:23) Madida a mangala ti konklusion a nagtengan iti maysa a panguluen dagiti Judio a ni Nicodemo idi a kinunana ken Jesus: “Mannursuro, ammomi a maysaka a mannursuro a naggapu iti Dios; ta awan ti makabalin a mangaramid kadagitoy a pagilasinan nga aramiden no awan ti Dios kenkuana.”​—Juan 3:1, 2.

8. Kalpasan ti nasurok a tallo a tawen a ministerio ni Jesus, kasanot’ panagrikna dagiti papangulo a Judio iti pammaneknek ti kinatao ken pannakabalinna?

⁸ Nabalinan koma nga imbaga ni Jesus kadagiti manangkarit kenkuana, ‘Bay-anyo a dagiti aramidko ti agsao a maipaay iti bagbagida!’ Kalpasan ti nasurok a tallo a tawen iti karerana iti publiko, dagiti panguluen a papadi ken panglakayen naaddaandan kadagiti adu a pagilasinan a pangibatayan koma iti umiso a konklusion maipapan iti kinatao ken kalintegan ni Jesus nga agaramid kadagiti datdatlag ken mangisuro iti kinapudno maipapan iti Pagarian ti Dios. Ngem natangken la unay ti lengngesda a mangawat kadagiti adu a pammaneknek nga ipapaay ni Jehova a mangpaneknek a ni Jesus isu ti naikari a Mesias.

9, 10. (a) Apay a di pagsiddaawanen dagiti Saksi ni Jehova a ti kualipikasionda kas ministros ket mapagduaduaan itatta? (b) Kasanot’ panangsango ni Jesus kadagiti narelihiusuan a papangulo a nangkarit iti pannakabalinna, ket ania ti epektona daytoy?

⁹ Gapu iti napasamak iti kaso ni Jesus, saanen a makakellaat kadagiti Saksi ni Jehova a ti kualipikasionda kas dagiti autorisado a ministros ti Amada ti pagduaduaan met dagiti narelihiusuan a papangulo itatta. Yantangay dagidiay nangkarit iti pannakabalin ni Jesus dida inkankano dagiti adu a datdatlag nga inaramidda, isut’ nangpataud iti maysa a saludsod a nangibabain kadakuada. Ket dagiti agdama nga ad-adalanna maaramidda met dayta a banag iti kaso dagidiay sipapakinakem a libakenda ti ar-aramid dagidiay nga adalan.

¹⁰ Idi a nagsaludsod dagiti papangulo a papadi ken papanglakayen ken Jesus, “Siasino ti nangted kenka itoy a pannakabalin?” Saan a nangpataud iti di nalawag wenno di maawatan a saludsod no di ket kunana: “Siak, imtuodekto met kadakayo ti maysa a banag, isu a no masungbatanyo kaniak, ibagakto met kadakayo no ania a pannakabalin ti pangaramidko kadagitoy a banag: Ti pammautisar ni Juan, adino ti naggapuanna? Iti langit wenno kadagiti tao?” Intuloy pay ti salaysay: “Ket pampanunotenda idi iti nakemda, a kunkunada: ‘No kunaenminto, “Iti langit,” kunaennanto kadakami, “Apay-apay, ngarud, a dikay pinati?” Ngem no kunaenminto, “Kadagiti tao,” kabutengmi dagiti umili, ta isuda amin imbilangda a ni Juan mammadto.’ Ket simmungbatda ken Jesus ket kinunada: ‘Dikam ammo.’ Isu kinunana met kadakuada: ‘Uray siak diak met ibaga kadakayo no ania a pannakabalin ti pangaramidko kadagitoy a banag.’” (Mateo 21:23-27) Itatta, dagiti Saksi ni Jehova mabalinda met a pagsaludsodan dagiti klero iti nainkasuratan iti pamay-an nga addaan iti umas-asping nga epekto.a

11. Ania a trabaho ti inaramid ti ili ni Jehova sakbay ti 1914, ket kasano a mapagulimek dagiti manangbabalawda?

¹¹ Manipud 1876 a nagtultuloy, pinakdaaranen ti ili ni Jehova ti lubong ken nangnangruna ti Kakristianuan, a ti Panawen Gentil agpatingga inton otonio ti 1914. (Lucas 21:24, King James Version) Saan a mailibak dagiti klero daytoy pakpakauna a trabaho iti ngangngani 40 a tawtawen​—maysa a trabaho nga umas-asping ken Juan a Mammautisar. Sigagagar dagidiay a klero nga agur-uray a mangkemmeg iti editor daytoy a pagiwarnakan no lumabas ti 1914 nga awan ti aniaman a naisangsangayan a pasamak nga umas-asping iti daydiay adda nga impakdaarna. Ngem, ay, anian ti panagulimekda idi iti Hulio 28, 1914, narakrak ti talna babaen ti panagbettak ti Gubat Sangalubongan I!

12. Ania a rigrigat ti naipakuyog ken simmaruno iti Gubat Sangalubongan I?

¹² Ti panangdadael ti gubat ken ti panagtalaw dagiti adu a tattao manipud kadagiti pagtrabahuanda kadagiti pagtalonan ti nangyeg ti kinakirang ti taraon. Dagiti ginggined ti nangyegyeg kadagiti nadumaduma a paset iti daga, a nangpataud iti adu a perdi ken panagsagaba. Idi 1915 maysa a ginggined idiay Avezzano, Italia, ti nangpapatay iti 29,970, ket ti maysa a nagpigsa a ginggined idi 1920 ti nangyeg ipapatay kadagiti 200,000 idiay Probinsia ti Kansu, Tsina. Idi 1923, nasurok a 140,000 ti natay iti daydiay Great Kanto a ginggined idiay Japan. Sumarsaruno met iti gubat immay ti trangkaso Español nga iti maysa a tawen nangpapatay iti ad-adu a biktima ngem iti uppat a tawen a panaggugubat. Ket di met mabalin a mapalabas ti pannakaidadanes dagiti ad-adipen ni Jehova bayat dayta umuna a sangalubongan a panagsususik, a ti naipangpangruna iti dayta isu ti di nainkalintegan a siam a bulan a pannakaibalud ti presidente ken ti sekretario-tesurero ti Watch Tower Society ken innem kadagiti katrabahuanna.

13. Aniat’ insaludsod dagiti Saksi ni Jehova kadagiti klero ti Kakristianuan, ken aniat’ rebbeng nga aminen dagitoy a kritiko no sumungbatda a siuumiso?

¹³ Nanipud panagpatingga ti Gubat Sangalubongan I, pinagsaludsodan dagiti Saksi ni Jehova dagiti klero ti Kakristianuan: ‘Dagiti kadi makadadael a pasamak a nangsaplit iti dagatayo manipud 1914 a nagtultuloy maysa a kaitungpalan ti padto ni Jesus idiay Mateo 24:3-13?’ No sipupudno koma a sumungbat dagidiay a klero iti wen, aminenda met koma a ni Jesu-Kristo immayen iti nailangitan a Pagarianna idi 1914. Natural, yantangay kinuna ni Jesus a ‘ti lubong dinakton makita’ ket isu itan ti maysa a di matay nga espiritu a persona, ti “iyaayna,” wenno “kaaddana,” ket di makita. (Juan 14:19; Mateo 24:3, KJ; 1 Pedro 3:18) Ngem ti panangamin kadagitoy amin ti mamasardeng kadagiti klero manipud panagrasonda a dagiti makapakintayeg iti lubong a paspasamak iti 1914-18 ket kadawyan laeng a panagpungtot dagiti nasnasion iti kurso ti historia.

14. (a) No aramiden dagiti relihiuso a papangulo ti umiso a panangbigbig, iti ania a trabaho ti pakaobligaranda a pakiramanan? (b) Ania a sukat ti Pagarian ti rebbeng a tallikudanda koma, ngem ania a kurso ti sinurotda?

¹⁴ Nupay kasta, no aminen dagiti klero ti Kakristianuan a dagiti paspasamak iti 1914-18 tinandaanda ti panangurgi ti panungpalan ti daan a sistema dagiti bambanag, obligadoda met a mangbigbig kadagiti dadduma pay a paset “ti pagilasinan” iti “kaadda” ni Jesus ket rebbeng a makipasetda iti kaitungpalan dagiti sasaona: “Ket daytoy naimbag a damag ti pagarian maikaskasabanto iti isuamin a mapagnaedan a daga kas pammaneknek kadagiti isuamin a nasion.” (Mateo 24:14) Dayta kaipapananna ti panangikaskasaba, saan a ti Ebanghelio nga inkaskasabada iti adun a siglo, no di ket ti naimbag a damag ti Pagarian a naipasdeken idiay langit idi panagpatingga ti Panawen Gentil idi 1914. Rebbeng a tallikudanda ti Liga de Naciones kas “ti napolitikaan nga ebkas ti Pagarian ti Dios ditoy daga” ket matmatanda ken ti sunona, ti Naciones Unidas, kas ‘ti makarimon a mamagwalwalang nga agtaktakder iti nasantuan a disso.’ (Mateo 24:15, KJ) Ngem agingga idi tawen 1985, dagiti klero ti Kakristianuan dida kayat a markaan ti Liga de Naciones ken ti Naciones Unidas, kas ti “makarimon a banag.”

15. Ania a masanguanan ti agur-uray kadagiti klero, ngem ania ti ar-aramiden dagiti Saksi ni Jehova?

¹⁵ Gapuna, dagiti klero ti Kakristianuan madida nga alaen ti panagtakderda iti sibay ti Pagarian ni Jehova babaen ken Jesu-Kristo. Gaput’ saanda a panangsuportar iti dayta, isudanto ti madadael iti “dakkel a rigat” nga adda iti masanguanan. Ngem saan a kas kadakuada, dagiti Saksi ni Jehova pinanawanda ti Babilonia a Dakkel, ti sangalubongan nga imperio ti ulbod a relihion, ket inkaskasabada ti mensahe ti Pagarian kadagiti 203 a dagdaga. Daytoy di maartapan a trabaho isut’ maysa a naisangsangayan a paset “ti pagilasinan” a mangpampaneknek nga idi 1914 ni Jesus naipatugawen kas nailangitan nga Ari nga agturay iti tengnga dagiti kabkabusorna.​—Mateo 24:3, 14, 21; Salmo 110:1, 2; Apocalipsis 18:1-5.

Adda Kadi Pannakasapul ti Rekomendasion?

16. Ania a salsaludsod ti tumaud maipapan iti rekomendasion, ken aniat’ makuna ni Pablo maipapan iti daytoy?

¹⁶ Iti awan gapgapuna kadi nga irekrekomendartay dagiti bagbagitayo kas dagiti napulotan a saksi ni Jehova? Wenno silalaingtay laeng kadi nga imammaniobra dagiti bambanag tapno makaipasdektayo iti kasta a rekomendasion a maipaay kadagiti “sabsabali a karnero” ni Jesus? (Juan 10:16) Saan nga inaramid ni Pablo ti kasta a banag no di ket naikunana kadagidiay a taga Corinto a nagbalin a Kristiano gapu iti di mabambannog a panagreggetna: “Baliwanmi manen aya nga italek dagiti bagbagimi met laeng? Wenno masapul ngata, a kas kadagiti dadduma dagiti sursurat a panangitalek a maipaay kadakayo wenno iti biangyo? Ti suratmi dakayo met laeng, a naisurat iti pusomi nga ammo ken basaen dagiti isuamin a tattao. Maiparangarang kadakayo ti maysa a surat ni Kristo nga inaywananmi a nasuratan saan nga iti tinta no di ket iti espiritu ti Dios a sibibiag, saan a kadagiti taptapi a batbato, no di ket kadagiti taptapi a puspuso a naglasag.”​—2 Corinto 3:1-3.

17. Apay a maikuna a ni Pablo ti naan-anay a kualipikado para iti ministerio, ket iti daytoy a banag, aniat’ maikuna met maipapan kadagiti Saksi ni Jehova?

¹⁷ Babaen iti tulong ti espiritu ni Jehova, nakapagsurat ni Pablo iti sumagmamano kadagiti liblibro ti Biblia ken adu dagiti nakumbertena iti Kinakristiano. Gapuna pinaneknekanna nga isut’ naan-anay a kualipikado para iti Nakristianuan a ministerio. Iti moderno a katupagna, nangnangruna nanipud umuna a maipablaak daytoy a pagiwarnakan idi 1879, dagiti napulotan a natda kadagiti ad-adalan ni Kristo numan pay saanda a napaltiingan kas ken pablo nakapataudda iti adu a literatura ti Biblia. Nanipud 1920, nakaipablaakda iti rinibribo a milion a liblibro, polieto, magasin, ken traks kadagiti adu a pagsasao. Daytoy a literatura ti di maiwarwaras iti napababa a gatadna, a kaaduan iti dayta ti mait-ited nga awan bayadna kadagiti napanglaw. Nangiyur-urnos met ti Watch Tower Society kadagiti libre a palawag ti Biblia ken nakaibaon kadagiti misionero kadagiti di pay nasagsagid a teritoria iti intero a globo. Pinulpullo a ribo ti simmungbat kadagiti naimaldit ken naiyebkas a mensahe ket insimboloda ti dedikasionda ken Jehova a Dios babaen ti pannakabautisarda, nangnangruna nanipud 1935 idi damdamona unay a nagbalinen a nalawag a ti di nakedngan a “dakkel a bunggoy” dagiti “sabsabali a karnero” ni Jesus mabalindan ti manginanama iti biag nga awan inggana iti naisublin a paraiso ditoy daga.​—Apocalipsis 7:9-17; Lucas 23:43.

18. No makarit a mangpaneknek iti kualipikasionda kas ministros, iti aniat’ mabalin a pangituduan ti napulotan a natda?

¹⁸ Gapu itoy, anian no dagiti klero karitenda ti napulotan a natda a mangpataud kadagiti sertipiko kas dagiti Doktor iti Dibinidad? Ta, dagitoy nga ad-adipen ni Jehova makaipaayda ti dakdakkel pay pategna a pammaneknek! Mabalinda itan nga itudo ti nasurok a dua ket kagudua a milion a “sabsabali a karnero” iti intero a daga ket maikunada: ‘Dagitoy dagiti sursurat a pangsuportarmi!’ Mabalinda a tuladen ti sasao ni Pablo ket iwaragawag kadagiti kamkameng ti “dakkel a bunggoy”: “Ti suratmi dakayo met laeng, a naisurat iti pusomi nga ammo ken basaen dagiti isuamin a tattao.” (2 Corinto 3:2) Bay-am dagiti klero ti Kakristianuan a mangbasa iti dayta sibibiag a surat a buklen dagiti dedikado, bautisado a Kristiano nga agserserbi ken Jehova a Dios iti aldaw ken rabii iti templona ken tumultulong a ‘mangikaskasaba iti daytoy naimbag a damag ti pagarian iti amin a daga kas maysa a pammaneknek kadagiti amin a nasion.’ (Mateo 24:14) Kas iti napulotan a natda, pampaneknekanda ti bagbagida a naan-anay a kualipikado para iti Nakristianuan a ministerio.

19. Ania a naisangsangayan a surat ti rekomendasion ti mailasat iti Har–Magedon?

¹⁹ Daytoy naisangsangayan a surat ti rekomendasion saanto a mapunas iti dayta umadanin a “gubat ti dakkel nga aldaw ti Dios a Mannakabalin-amin” iti dayta simboliko a lugar a maaw-awagan Har–Magedon. (Apocalipsis 16:14-16) Imbes ketdi, daytanto ti masalwadan ken ispalen ti Mannakabalin-amin a Dios a maiparangto iti dayta kalpasan ti Har–Magedon a sistema dagiti bambanag iti sidong ni Kristo nga Ari. Anian a nagpigsa a surat dayta “dakkel a bunggoy” kadagiti binilbilion a natauan a natnatay a pagungarento ni Jehova a Dios babaen ken Jesu-Kristo, manipud kadagiti tanem a pakalaglagipan iti intero a daga! Ket itultuloyyo met a tulongan ida, dakayo a “dakkel a bunggoy” dagiti “sabsabali a karnero” ti Naimbag a Pastor!

[Dagiti Footnote]

Ania dagiti komentoyo?

◻ Kasano a tultuladen dagiti Saksi ni Jehova ni Pablo iti saanda a panangilaklako iti Sao ti Dios?

◻ Ania ti pakaibatayan ti panagbalin ti maysa a tao a naan-anay a kualipikado a maipaay iti pudpudno a Nakristianuan a ministerio?

◻ No aramiden dagiti narelihiusuan a papangulo ti umiso a panangbigbig, iti ania a trabaho ti obligado a pakiramananda koma?

◻ Maitudo dagiti napulotan a natda ti ania a naisangsangayan a surat a mangpampaneknek a naan-anayda a kualipikado kas ministros?