Saludsod

◼ Ania ti rebbeng a maaramid no saan a dumteng ti agpalawag iti naituding nga oras ti gimong?

No dadduma, adda dagiti di maliklikan a kasasaad a manglapped iti maysa a kabsat a dumteng iti oras a panangipaayna iti nayeskediul a palawagna. No adda pamatian a sumangpet met laeng, mabalin nga ikeddeng dagiti panglakayen nga iyuna ti Panagadal iti Pagwanawanan; sa maisaruno ti Miting Publiko. Ngem kasanon no nabatad a saan a makasangpet ti agpalawag? Nalabit a maysa kadagiti lokal a pumapalawag ti mangted iti aniaman a palawag a naisaganana.

Masansan a malapdan daytoy a problema babaen ti naannad ken nasakbay a panagplano. Nasken a palagipan ti coordinator ti palawag publiko ti tunggal agpalawag iti agarup maysa a lawas a nasaksakbay maipapan iti annongenna. Mairaman iti palagip ti oras ti gimong, ti direksion ti Kingdom Hall ken numero ti telepono, ken nalawag a direksion no kasano a masarakan ti paggigimongan. Masapul nga inotar a naimbag ti agpalawag dagitoy a detalye. No adda tumanor a di maliklikan a kasasaad a manglapped kenkuana a mangted iti palawag, masapul a makiuman a dagus iti coordinator ti palawag publiko tapno mayurnos ti sumukát kenkuana. Masapul a maaramid ti amin a pamuspusan tapno maliklikan dagiti naladaw a panangkanselar. No maladaw ti agpalawag iti sumagmamano a minuto, mabalinna ti agtelepono wenno ipakaammo aginggat’ mabalin tapno ammo dagiti kakabsat ti aramidenda.

Ti panangipateg kadagiti naituding a palawag publiko, nasayaat ken nasakbay a panagplano ken pammalagip, ken naannad a panangimaton ti mangipasiguro nga agsagrap ti kongregasion iti makagunggona a palawag publiko iti kada lawas.