Saludsod

◼ Kasano kapaut a maikondukta ti pormal a panagadal iti Biblia iti maysa a tao iti libro a Pannakaammo?

Bembendisionan ni Jehova ti organisasionna kadagitoy nga aldaw. Makitatayo ti ebidensia iti daytoy kada tawen bayat a rinibu dagiti umaw-awat iti kinapudno. Maysa nga epektibo a kagawaan iti panangibanag iti daytoy ti libro a Pannakaammo. Inlawlawag ti Enero 15, 1996, a ruar Ti Pagwanawanan a nairanta daytoy a libro a tumulong iti estudiante ti Biblia a rumang-ay a sidadaras iti naespirituan, a nalabit agpabautisar kalpasan ti sumagmamano a bulan.

Gapuna, imbalakad ti isu met laeng a Pagwanawanan, panid 17: “No nalpasen a naan-anay ti indibidual ti panagadalna iti Biblia iti libro a Pannakaammo ken nabautisaranen, mabalin a saanen a kasapulan a pormal nga iyadalan iti maikadua a libro.”

Kasanon ngay ti maysa a tao a saan pay nga agpabautisar no nalpasnan ti libro a Pannakaammo? Impalagip kadatayo ti Hunio 1996 a Ti Ministeriotayo iti Pagarian, panid 6, parapo 23, ti kuna Ti Pagwanawanan maipapan iti saanen a panangiyadal iti kanayonan a libro iti estudiante no nalpasnan ti libro a Pannakaammo. Kayat kadi a sawen daytoy a saantayon nga interesado a tumulong iti estudiante ti Biblia iti labes daytoy a punto? Saan. Kayattayo a maaddaan dagiti tattao iti pagdadamuan a pannakaammo iti kinapudno. Nupay kasta, manamnama nga iti ababa a tiempo, matulongan ti epektibo a mannursuro ti napasnek nga estudiante a gumun-od iti umdas a pannakaammo a mamagdesision kenkuana nga agserbi ken Jehova. Nalabit tarigagayan pay ketdi ti dadduma nga estudiante ti Biblia ti agadal iti nasursurok ngem maminsan iti makalawas.

Pudno nga adda dagiti estudiante a nabambannayat ti panagrang-ayda ngem iti dadduma. Ngem no kalpasan a maadal ti maysa a tao ti libro a Pannakaammo, nalabit napapaut ngem iti gagangay, ket di pay makapagdesision a makitimpuyog iti kongregasion, nasayaat no makisarita ti agibumbunannag iti maysa kadagiti panglakayen iti Komite ti Serbisio ti Kongregasion maipanggep iti daytoy. No naisangsangayan ti kasasaadna, nalabit a kasapulan ti kanayonan a tulong. Mayataday daytoy iti prinsipio a naibaga iti parapo 11 ken 12 iti panid 17 ti Enero 15, 1996, a Pagwanawanan.

Ti panangipateg iti uray pagdadamuan a pannakaammo iti kinapudno gutugotenna ti estudiante a tumabuno kadagiti Nakristianuan a gimong. Mabalin a daytoy ti mangiturong iti estudiante a mangipaneknek a sibabatad a tarigagayanna ti agserbi ken Jehova. No awan makita a kasta a naespirituan a panangipateg kalpasan ti panagadal iti libro a Pannakaammo iti napaut bassit a panawen, mabalin a nasaysayaat no isardengen ti panagadal.