Saludsod
Ania ti rumbeng nga aramiden no adda dumteng a didigra a mangapektar kadagiti kakabsat?
No Adda Didigra iti Lugaryo: Dikay aglagaw. Agkalmakayo, ket ti pudpudno a napateg ti panunotenyo—ti biag, saan a dagiti sanikua. Asikasuenyo dagiti naganat a pisikal a kasapulan ti pamiliayo. Kalpasanna pakaammuanyo dagiti panglakayen maipapan iti sasaadenyo ken ti agdama nga ayanyo.
Napateg ti akem dagiti panglakayen ken ministerial nga adipen iti panangipaay iti saranay. No naipakdaar nga adda dumteng a didigra, kas iti bagyo, siguraduen koma dagitoy a kakabsat nga adda ti tunggal maysa iti natalged a lugar, ket no ipalubos ti tiempo, gumun-od ken agibunongda kadagiti kasapulan a suplay.
Kalpasanna, sapulen koma dagiti konduktor iti panagadal iti libro ti tunggal pamilia ket damagenda ti sasaadenda. Mapakaammuan koma ti mamangulo a manangaywan wenno ti sabali a panglakayen maipapan iti kasasaad ti tunggal sangakabbalayan, uray no nasayaat ti amin. No adda nadangran, ipamuspusan dagiti panglakayen ti pannakapaagasna. Mangipaayda met iti aniaman a material a banag a kas iti taraon, kawes, pagtaengan, wenno dagiti masapsapul iti balay. (Juan 13:35; Gal. 6:10) Mangipaay dagiti lokal a panglakayen iti naespirituan ken emosional a pannaranay iti kongregasion ken iyurnosda a dagus aginggat’ mabalin ti pannakaituloy dagiti gimong ti kongregasion. No naammuanen a naan-anay ti kasasaad, pakaammuan koma ti maysa a panglakayen ti manangaywan ti sirkito maipapan iti siasinoman a nadangran, dadael iti Kingdom Hall wenno iti pagtaengan dagiti kakabsat. Kalpasanna makiuman ti manangaywan ti sirkito kadagiti dadduma a kongregasion tapno makitana no kasano kasaknap ti parikut, sana teleponuan wenno telegramaan ti sanga nga opisina tapno maireport ti kasasaad.
No Adda Didigra iti Sabali a Lugar: Ikararaganyo dagiti apektado a kakabsat. (2 Cor. 1:8-11) No kayatyo ti mangted iti tulong a kuarta, mabalinyo nga ipatulod ti donasionyo iti Sosiedad, a pakailatangan ti pondo a pangsaranay para iti daytoy a panggep. Ti direksion ket: Watch Tower Society, P. O. Box 2044, 1060 Manila. (Ara. 2:44, 45; 1 Cor. 16:1-3; 2 Cor. 9:5-7; kitaenyo ti Disiembre 1, 1985, Watchtower, panid 20-2.) Dikay mangipatpatulod kadagiti materiales wenno suplay iti lugar a nakapasamakan ti didigra malaksid no espesipiko nga indawat dagiti kakabsat a mangimatmaton. Iti kasta maliklikan ti pannakariro ken masigurado nga umiso ti pannakaibunong ti aniaman a kasapulan.—1 Cor. 14:40.
No natingitingen a naimbag ti kasasaad, ikeddeng ti Sosiedad no kasapulan ti mangbukel iti relief committee. Mapakaammuan dagiti responsable a kakabsat. Makikooperar koma ti amin kadagiti panglakayen tapno maasikaso a naimbag dagiti naganat a kasapulan dagiti kakabsat.—Kitaenyo ti Dagiti Saksi ni Jehova—Manangiwaragawag iti Pagarian ti Dios, panid 310-15.