Nakasaganakayo Kadin No Adda Mapagteng a Didigra?
1. Apay a nainsiriban nga agsaganatayo maipaay kadagiti didigra?
1 Tunggal tawen, riniwriw a tattao iti intero a lubong, agraman ti adu kadagiti kakabsattayo ti maap-apektaran kadagiti ginggined, tsunami, tudo, bagyo, alawig, ken layus. Yantangay di mapakpakadaan ti pannakapasamak dagiti natural a didigra ken mabalin a maapektaran ti siasinoman kadatayo, nainsiriban no agsaganatayo a nasaksakbay.—Prov. 21:5.
2. Apay a napateg nga ibagatayo kadagiti panglakayen no ania ti agdama nga adrestayo ken no ania (dagi)ti numero ti teleponotayo?
2 Nasaksakbay: No dadduma, dagiti autoridad mangtedda iti pakdaar maipapan kadagiti umad-adani a didigra. Napateg nga ipangag dagidiay a pakdaar. (Prov. 22:3) Kadagiti kasta a kasasaad, dagiti panglakayen ikagumaanda ti makiuman kadagiti amin iti kongregasion tapno matulonganda ida a mangaramid kadagiti nasken a panagsagana. Kalpasan ti didigra, ikagumaan manen dagiti panglakayen ti makiuman kadagiti amin a naitimpuyog iti kongregasion tapno maammuanda no natalgedda ken no ania a tulong ti kasapulanda. Masayang ti napateg a tiempo no awanan dagiti panglakayen iti kabaruan a listaan dagiti adres ken numero ti telepono dagiti agibumbunannag. Gapuna, dagiti agibumbunannag napateg nga ibagada iti sekretario ken iti manangaywan iti panagadal iti libro no ania ti agdama nga adresda ken no ania (dagi)ti numero ti teleponoda.
3. Kasanotayo a makikooperar kadagiti panglakayen no agnanaedtayo iti lugar a pakapaspasamakan ti didigra?
3 No ti kongregasion ket adda iti lugar a pakapaspasamakan ti didigra, dagiti panglakayen mabalinda a kiddawen kadagiti agibumbunannag ti nagan ken numero ti telepono ti kabagian wenno gayyemda nga agnanaed iti sabali a lugar a mabalin a maawagan no adda mapasamak nga emerhensia. Daytoy ti tumulong kadagiti panglakayen a mangbirok kadagidiay nagbakuit. Mabalin met a mangaramid dagiti panglakayen iti plano no ania ti aramiden ti kongregasion no adda emerhensia. Ramanen daytoy ti simple a listaan dagiti suplay a kasapulan ti tunggal indibidual, dagiti urnos iti panagbakuit, ken dagiti plano tapno matulongan dagidiay addaan iti naisangsangayan a kasapulan. Napateg ti pannakikooperar kadagitoy a naayat nga urnos.—Heb. 13:17.
4. Ania ti masapul nga aramidentayo no adda mapasamak a didigra iti lugartayo?
4 Kalpasan ti Didigra: Ania ti masapul nga aramidem no adda mapasamak a didigra iti lugaryo? Siguraduem nga asikasuen dagiti kangrunaan a kasapulan ti pamiliam. No kabaelam, tumulongka kadagidiay naapektaran. Ikagumaam ti makiuman iti manangaywan iti panagadal iti libro wenno iti sabali pay a panglakayen iti kabiitan a panawen. Nasken nga aramidem daytoy uray no natalgedka ken saanmo a kasapulan ti tulong. No kasapulam ti tulong, namnamaem nga aramiden dagiti kakabsat ti amin a kabaelanda a tumulong kenka. (1 Cor. 13:4, 7) Laglagipem nga ammo ni Jehova ti kasasaadmo; agtalekka kenkuana a saranayennaka. (Sal. 37:39; 62:8) Agbalinka a nasiput kadagiti gundaway a mangipaay iti naespirituan ken emosional a tulong kadagiti dadduma. (2 Cor. 1:3, 4) Ituloymo ti nateokratikuan a rutinam iti kabiitan a panawen.—Mat. 6:33.
5. Kasano a datayo kas Kristiano apektadotayo iti pangta ti didigra?
5 Nupay napalalo ti danag ti lubong gapu iti pangta ti didigra, kumitkitatayo iti masanguanan buyogen ti panagtalek. Mabiiten nga agpatingga dagiti amin a didigra. (Apoc. 21:4) Kabayatanna, mabalintayo ti mangaramid kadagiti nainkalintegan nga addang tapno makapagsaganatayo no adda mapagteng a riribuk ken rigat bayat nga agtalinaedtayo a naregta a mangiwaragawag iti naimbag a damag kadagiti sabsabali.