Isuroyo Kadagiti Sabsabali ti Kalikaguman ti Dios
1 Adu pay laeng dagiti tao ita a di pay ‘nakangngeg kadagiti sao ni Jehova.’ (Amos 8:11) Nupay patien ti dadduma nga adda Dios, saanda nga ammo ti panggep ken dagiti iparebbengna. Gapuna, nasken nga isurotayo kadakuada ti kinapudno maipapan iti Pagarian. No nakabalantayo a naimbag ken nakasagana a mangasaba iti amin a gundaway, madanontayo dagidiay mayat a mangammo iti kalikaguman ni Jehova.
2 Iti Abril ken Mayo, addaantayo kadagiti naintiempuan unay a ruar Ti Pagwanawanan ken Agriingkayo! nga iwarastayo. Mainayon pay, iti damo a gundaway, itampoktayo ti broshur nga Ania ti Kalikaguman ti Dios Kadatayo? Makaallukoy iti amin a kita ti tao dagiti makaawis nga ilustrasion ken mamagpanunot a saludsodna. Naipaay dagiti sumaganad a singasing a tumulong kadatayo a mangusar a sieepektibo kadagiti publikasiontayo.
3 Panangbirok Kadagiti Tao: Kadagiti lugar nga adu dagiti tattao nga awan iti pagtaenganda no mamalaybalaytayo, nasayaat no biroken ken kasaritatayo dagiti tattao iti sadinoman a pakasarakan kadakuada. Ti suplemento ti Ministeriotayo iti Pagarian a Setiembre 1996 pinaregtanatayo a mangikasaba iti naimbag a damag iti uray sadinoman—iti lansangan, kadagiti lugan a para iti publiko, ken kadagiti parke, paradaan, ken lugar ti negosio. Impalagipna met kadatayo a masapul a sipapanunottayo a mangparnuay kadagiti gundaway a mangasaba iti di pormal. Kas ehemplo iti daytoy, napan ti maysa a payunir a babai iti zoo ket nangitugot iti suplay ti Agosto 8, 1996, nga Agriingkayo! nga addaan iti serye nga “‘Species’ nga Agpegpeggad a Maungaw—Apay a Maseknankayo?” Iti las-ud ti maysa nga oras, nakaipaima iti 40 a kopia kadagiti sumagmamano a manangipateg unay a tattao a naayat kadagiti animal! Maitutop la unay iti amin a kita ti panangasaba Ti Pagwanawanan ken Agriingkayo! ken kasta met ti broshur a Kalikaguman, tangay naglaon dagitoy iti impormasion a mangapektar iti biag dagiti tao ken mamagpanunot.
4 Panangirugi iti Saritaan: Inlawlawag ti maudi a panid ti Oktubre 1996 a Ti Ministeriotayo iti Pagarian no kasano nga isagana dagiti bukodyo a presentasion iti magasin a Pagwanawanan ken Agriingkayo! Epektibo met dagitoy a singasing no isagsaganatayo nga ipresentar ti broshur a Kalikaguman. Mabalin a sumagmamano laeng a sasao wenno iyat-atiddog bassit ti komentotayo tapno madakamat ti Nainkasuratan a punto. Napateg a pilien a naimbag dagiti panglukat a sasao, tangay mabalin a dagitoy ti mangdeterminar no itultuloy ti tao ti dumngeg. Naballigi dagiti dadduma babaen ti kastoy a panglukat a sasao: “Adda nabasak nga artikulo a makaparegta kaniak, ket kayatko nga iranud kadakayo.” Wenno, mabalin ti mangibangon iti makapainteres a saludsod tapno maallukoy a makisarita.
5 No maitutop iti lugaryo, mabalinyo a padasen ti mangibangon kadagiti saludsod a kas iti sumaganad kadagiti presentasionyo ita a bulan:
◼ “Adu ita ti makitatayo a nasuratsuratan a pader, wara, ken polusion. Ania ti pagarupyo a kasapulan tapno madalusan ti daga ken agbalin a nasaysayaat a lugar a pagnaedan?” Palubosanyo a sumungbat, sayo dakamaten nga addaankayo iti impormasion a mangilawlawag no kasano ken no kaano nga agbalin ti daga a sangalubongan a minuyongan. Mangipakitakayo iti espesipiko a komento, ababa a kasuratan, ken de kolor nga ilustrasion iti magasin, sayo itukon iti indibidual. Sakbay nga ingudoyo ti saritaan, ikagumaanyo nga iyurnos ti panagsubliyo.
◼ “Iti panagkunayo inranta ngata ti Dios nga agbiagtayo iti nariribuk a kasasaad a kas iti mapaspasarantayo ita?” Kalpasan a sumungbat, mabalinyo a kunaen: “Nalabit kabesadoyo ti kararag nga insuro ni Jesus nga ikararag dagiti pasurotna, a mangidawdawat iti iyaay ti Pagarian ti Dios. Napampanunotyo kadin no ania a talaga ti Pagarian ti Dios?” Iturongyo iti leksion 6 iti broshur a Kalikaguman, ket basaenyo dagiti saludsod iti pangrugian ti leksion. Kalpasanna, bayat a basbasaenyo ti parapo 1, ipakitayo ti sungbat ti umuna a saludsod. Ilawlawagyo a masungbatan met iti ababa ti dadduma pay a saludsod. Itukonyo ti broshur, ket ibagayo nga agsublikayto nga addaan iti kanayonan nga impormasion maipapan iti Pagarian.
◼ “Adu a managpanunot a tattao ti mangmatmatmaten kadagiti relihion ti lubong a kas pakaigapuan dagiti parikut ti tao imbes a solusion. Ania ti makunayo iti dayta?” Kalpasan a mangeganyo ti kapanunotanna, mangipakitakayo manipud iti maysa kadagiti baro a magasin iti mabalin a mangawis iti interesna maipapan iti pannakapaay ti ulbod a relihion. Damagenyo no kayatna a basaen. Makiam-ammokayo, ket ibagayo a kayatyo a kasaritanto manen tapno mailawlawagyo no apay a saan a pinaay ti pudno a relihion ti sangatauan.
◼ “Iti kaadu dagiti parikut iti biag ti pamilia ita, napampanunotyo kadin no ania ti sekreto ti kinaragsak iti pamilia?” Urayenyo ti sungbat, sayo ilawlawag nga iti Biblia ipalgak ti Dios ti napaypayso a sekreto ti kinaragsak iti pamilia. Mabalinyo a basaen ti Isaias 48:17. Kalpasanna iturongyo iti leksion 8 iti broshur a Kalikaguman, ket ipakitayo ti dadduma kadagiti bersikulo iti Biblia a mangiwanwan iti tunggal miembro ti pamilia. Basaenyo dagiti saludsod iti pangrugian ti leksion. Damagenyo no kayatna a basaen dagiti sungbat. No kayatna, itukonyo kenkuana ti broshur. Ibagayo nga agsublikayto iti sabali a gundaway tapno pagsaritaanyo dagiti kanayonan a praktikal a balakad para iti naragsak a biag ti pamilia.
6 Ti suplemento iti Marso 1997 a Ti Ministeriotayo iti Pagarian pinaregtanatayo a maaddaan iti tured nga agsarungkar. Inrekomendana ti panangaramat iti baro a broshur a pangirugi kadagiti panagadal iti Biblia, no saan nga iti damo nga ipapan, iti panagsarungkar. Ti panangammo ken panangaramid iti kalikaguman ti Dios ti kangrunaan a kasapulan ti sangatauan. (Col. 1:9, 10) Dakkel ti maitulongtayo kadagiti sabsabali iti Abril ken Mayo no mairugitayo nga isuro kadakuada ti ammotayo maipapan kadagiti kalikaguman ni Jehova maipaay iti biag.—1 Cor. 9:23.