Magunggonaan ti Kinamatalek
1 Iti Hebreo 11:6 naibaga kadatayo a ti Dios “agbalin a mananggunggona kadagidiay sipapasnek a mangsapsapul kenkuana.” Ti maysa a wagas a pananggunggonana kadagiti napasnek nga adipenna a nagbalin a ‘matalek kadagiti sumagmamano a bambanag’ ket ‘dinutokanna ida kadagiti adu a bambanag.’ (Mateo 25:23) Iti sabali a pannao, masansan a supapakan ni Jehova ti naimbag nga aramid babaen ti panangipaayna iti kanayonan a pribilehio iti serbisio kadagiti matalek a saksina.
2 Nagunggonaan ti kinamatalek ni apostol Pablo yantangay natudingan iti ministerio a nangidanon kenkuana kadagiti siudad ken purok ti Europa ken Asia Minor. (1 Tim. 1:12) Nupay kasapulan ti panagregget iti panangitungpalna a naan-anay iti ministeriona, impateg unay ni Pablo ti pribilehio nga inawatna. (Roma 11:13; Col. 1:25) Impakitana ti naimpusuan a panangapresiar babaen ti napasnek a panangbirokna kadagiti gundaway a mangasaba. Babaen ti naregta a panagtrabahona, imbatadna nga isu ket nagbiag a maitunos iti pammatina. Ti ulidanna tignayennatayo a mangipateg kadagiti pribilehiotayo iti serbisio.
3 Inikkannatayo ni Jehova iti Ministerio: Kasanotay a maipakita ti umasping a panangmatmat iti daytoy a pribilehio ti serbisio a kas ti impakita ni Pablo? Agbiroktay kadagiti wagas a pangparang-ayan iti pannakipasettayo iti ministerio. Gundawayantayo ti tunggal oportunidad a mangasaba iti di pormal kasta met iti binalaybalay. Subliantayo amin dagidiay ditay nadanon kadagiti pagtaenganda ken sarungkarantay amin nga interesado. Sa tungpalentay dagiti urnostayo a mangyadal iti Biblia iti pagtaengan.
4 Maipanggep iti ministeriotayo, imbalakad ni Pablo: “Naganetgetka koma iti dayta.” (2 Tim. 4:2) Masapul a maasikaso a dagus ti banag a naganat. Naganetgettay kadi iti ministeriotayo, a dayta ti ipangpangrunatay iti biagtayo? Kas pagarigan, ditay itulok a dagiti panaglinglingay ken dadduma pay a personal nga aramid iti ngudo ti lawas a mangsallin iti tiempo a masapul nga ipaaytayo iti tay-ak ti ministerio. Yantangay kombinsidotayo nga asidegen ti panungpalan daytoy a sistema, kombinsidotay met a ti panangikasaba iti naimbag a damag ti Pagarian isu ti kapatgan a trabaho a maaramidantayo.
5 Maipakita ti kinamatalek iti Dios babaen ti panagbalin a napudno ken nasungdo kenkuana ken naynay a panangaramid iti trabaho nga imparebbengna kadatayo. Itungpaltay a naan-anay ti ministeriotayo tapno sibubuslon a gunggonaan ni Jehova ti kinamatalektayo.