Mangasaba iti Sadinoman nga Ayan ti Tattao
1 Iti panangbigbigna iti akem ti espiritu ti Dios iti ministeriona, kinuna ni apostol Pablo: “Intultuloy ti Dios a padpadakkelen dayta.” Binigbigna pay: “Dakami ket katrabahuan ti Dios.” (1 Cor. 3:5-9) Nakaskasdaaw a pribilehio daytoy. Kasanotay a maipakita iti publiko nga apresiarentayo ti panagbalin a katrabahuan ti Dios? Babaen ti panangipakaammo iti naimbag a damag kadagiti amin a makasaritatayo iti trabaho a panagbalaybalay ken iti sadinoman.
2 Naibilin kadatayo nga ‘agaramidtayo kadagiti adalan a tattao.’ (Mat. 28:19) No manmano a tattao ti makasaritatayo kabayatan ti pannakiramantayo iti ministerio, nalabit maupaytayo a dagus ken mariknatay a bassit ti naaramidantayo. Iti sabali a bangir, tagiragsakentay unay ti ministeriotayo no adu ti masarakantay a tattao ken makasaritatayo ida. Medio makakarit daytoy, yantangay kasapulan a naganetgettayo a mapan iti sadinoman nga ayan dagiti tattao tapno makasaritatay ida.
3 Dagiti Praktikal a Pagtuladan: Mabalintay a kasabaan dagiti tattao kadagiti tiendaan, parke, pagparadaan iti lugan, ken kadagiti estasion ti bus. No aglugankayo iti publiko a transportasion, sisasaganakay kadi a mangasaba kabayatan ti biahe? Dua a Saksi a nakalugan iti napekpek a bus a mapan iti pagtataripnonganda sakbay ti panangasaba ti nangisarita maipapan iti ladawan ti Paraiso nga adda iti libro a Pannakaammo. Kas ninamnamada a mapasamak, nagimdeng ti agkabannuag a lalaki a nakatakder iti asideg ket nasdaaw iti nangngeganna. Sakbay a dimsaag iti bus, nangala iti libro ken nagkiddaw iti sumarungkar iti pagtaenganna.
4 Adu nga agibumbunannag ti maragragsakan a mangasaba iti di pormal. Maysa a kabsat a babai ti napan iti lokal a shopping center iti maysa a malem ket inasitganna dagiti tattao a nakagatangen ngem madlaw a saanda nga agap-apura. Naipaimana amin a literatura nga adda iti bagna. Adda maysa a lalaki nga agur-uray iti uneg ti kotsena a naragsakan a nangala kadagiti magasin kenkuana. Timmabuno idin kadagiti gimong, ket narubroban ti interesna iti panagsaritada.
5 Pribilehio ti panangitan-ok iti nagan ni Jehova. Babaen ti kinaregtatayo a mangasaba, maipakitatayo a saantay a naikapis iti panggep ti di kaikarian a kinamanangngaasi ti Dios kadatayo. Gapu ta “itan ti nangnangruna a makaay-ayo a tiempo” a panangtulong kadagiti sabsabali, mapantayo iti sadinoman nga ayan dagiti tattao ket ikasabatayo kadakuada ti maipapan iti ‘aldaw ti panangisalakan’ ni Jehova.—2 Cor. 6:1, 2.