Iyun-unayo Dagiti Bambanag nga Ad-adda a Napateg
1 Aniat’ sumagmamano a napapateg a bambanag a nasken iti naespirituan a pagimbagantayo? Sigurado a mairaman ditoy ti personal a panagadal, itatabuno iti gimong, naynay a panagkararag, nasayaat a pannakitimpuyog, ken ti Nakristianuan a ministerio. Saantay a mamantener ti nasayaat a naespirituan a salun-at no ditay ipangpangruna dagiti napapateg a banag iti biagtayo.
2 Nupay kasta, makidangadangtay amin iti nainlasagan a tarigagay ket kasapulantayo ti disiplina. (Gal. 5:17) Ditay koma pulos ipagarup nga ad-adu ti magunggona iti pananggun-od kadagiti kabukbukodantayo a pagimbagan. (Jer. 17:9) No kasta, tapno masaluadantay ti pusotayo ken saantayo a maallilaw, napateg ti regular a panangsukimattay iti bagitayo.—Prov. 4:23; 2 Cor. 13:5.
3 Sukimatenyo ti Mismo a Pusoyo: Maaramidyo daytoy babaen ti panangusigyo iti sumagmamano a prangka a saludsod: Il-iliwek kadi a basaen ti Sao ti Dios? (1 Ped. 2:2) Apresiarek kadi ti kinapateg ti itatabuno kadagiti amin a gimong ti kongregasion? (Heb. 10:24, 25) Agkarkararagak kadi a naynay? (Rom. 12:12) Dagiti kadi naespirituan ti panagpampanunotda a tattao ti pakikadkaduaak? (Rom. 1:11, 12) Mariknak kadi a personal nga obligasionko nga iwaragawag ti naimbag a damag? (1 Cor. 9:16) Dagiti positibo a sungbat ipakitada a tartarigagayanyo nga iyun-una dagiti napatpateg a bambanag.
4 Sukimatenyo ti Inaldaw a Rutinayo: Masapul a surnadanyo a sukimaten dagiti tarigagay ti pusoyo babaen ti panangikeddeng kadagiti maiyun-una iti panangusar iti tiempo. Mairaman ditoy ti regular nga eskediul ti panagbasa iti Biblia ken tunggal ruar Ti Pagwanawanan ken Agriingkayo!, kasta met ti panagsagana kadagiti gimong. Masapul met a mangilatang ti pamilia iti tiempoda nga agadal ken agkararag a sangsangkamaysa. Limitaran ti kaadu ti tiempo a mabusbos iti sanguanan ti TV wenno kompiuter. Determinadokayo koma a tumabuno iti amin a gimong ti kongregasion, ket ipangpangrunayo dayta. Iplanoyo ti pannakiraman ti intero a pamilia iti tay-ak ti serbisio iti kada lawas.
5 Di pagduaduaan, ti panangyun-una kadagiti napatpateg a banag iti biagtayo isut’ pakaigapuan ti panagrag-o.