Ania ti Aramidenyo No Aleng-aleng Dagiti Tattao?
1 Ti kinaaleng-aleng kayatna a sawen awanan rikna wenno emosion, awanan iti interes wenno pannakaseknan. Maysa dayta kadagiti gagangay ken narikut unay a kababalin a masarakantayo iti ministerio. Aniat’ aramidenyo no adda masarakanyo a kasta? Pabannayatenna kadi ti ministerioyo? Kasanoyo a maparmek dayta tapno maipakaammoyo ti mensahe ti Pagarian kadagiti tattao?
2 Umuna, ammuenyo no apay nga aleng-aleng dagiti tattao iti teritoriayo. Gapu ngata ta maupayda kadagiti napolitikaan ken narelihiosuan a papanguloda? Ipagarupda ngata nga awanen ti solusion kadagiti parikut a sangsanguenda? Agduaduada kadi kadagiti kari maipapan iti nasaysayaat a banag? Dida kadi kayat a panunoten dagiti naespirituan a banag no dida makakita kadagiti giddato ken aktual a pagimbagan?
3 Itampok ti Namnama iti Pagarian: Awan problema a dinto marisut ti Pagarian. Gapuna no kabaelantay nga aramiden, isaritatayo dagiti kari ti Pagarian, a dakamatentayo dagiti kangrunaan a Nainkasuratan a sasao, uray saan a posible wenno praktikal nga ipakita ti teksto ti Biblia. (Heb. 4:12) Nupay kasta, kasanotayo a maiserrek dayta iti saritaan?
4 Nasken a matarusan dagiti tattao ti panggep ti ibibisitatayo. Masapul a matarusanda nga addatayo sadiay gapu iti ayat iti padatayo a tao ken pannakaseknantayo iti komunidad. Mabalin a mangdakamattayo iti nabagas a saludsod a kas iti, “Aniat’ pagarupenyo a solusion iti [maysa a parikut a mangap-apektar iti komunidad]?” No saan nga epektibo ti maysa a wagas, mangpadaskayo iti sabali.
5 Iti maysa a nakarangrang-ay a teritoria a dagiti bumalay dida ikaskaso ti mensahe ti Pagarian, nakadiskobre dagiti agibumbunannag iti introduksion a makagutugot iti interes. Idi intampokda ti libro a Pannakaammo, pinadas dagiti agassawa daytoy nga introduksion: “Mamatikayo kadi a nasken ti nasayaat nga edukasion para iti balligi ita ditoy lubong? Umanamongkay kadi a ti nasayaat nga edukasion ramanenna ti pannakaammo iti Biblia?” Iti naminsan a malem nakaipaimada iti tallo a libro, a ti maysa naipaimada iti babai nga idi agangay kinunana a nabasanan ti intero a libro a Pannakaammo ken immanamong nga agadal iti Biblia.
6 No adda masarakanyo nga aleng-aleng, padasenyo ti nadumaduma a pamay-an, mangdakamat kadagiti mamagpanunot a saludsod, ken aramatenyo ti bileg ti Sao ti Dios. Iti kasta matulonganyo dagiti sabsabali a mangabrasa iti nakaskasdaaw a namnamatayo iti Pagarian.