“Nangnangruna” Ita a Kasapulan ti Pannakigimong
1 Ti panaggigimong kanayon a napateg iti ili ni Jehova. Dagiti Israelita addaanda idi iti templo ken sinagoga kas sentro ti pudno a panagdayaw, nadibinuan nga edukasion, ken naragsak a panagtitimpuyog. Dagita met laeng ti makagapu no apay a di binaybay-an dagidi nagkauna a Kristiano ti panagtataripnongda. Bayat a dumegdeg dagiti pakarigatan ken pakasuotan kadagitoy napeggad a maudi nga al-aldaw, kasapulantay met ti naespirituan a pannakapabileg nga ipaay dagiti gimong ti kongregasiontayo ken “nangnangruna” a kasapulantay dayta ita. (Heb. 10:25) Kitaenyo ti tallo a rason no apay a makigimongtayo.
2 Tapno Makapagtitimpuyog: Bagbagaannatayo ti Kasuratan nga ‘itultuloytayo a liwliwaen ti maysa ken maysa ken pabilgen ti maysa ken maysa.’ (1 Tes. 5:11) Ti nadiosan a panagtitimpuyog kargaanna ti panunottayo kadagiti nasayaat a kapanunotan ken tignayennatayo nga agaramid kadagiti naimbag. Ngem no suminsinatayo, adda pagannayasanna nga umapay kadatayo dagiti minamaag, inaagum, wenno imoral pay ketdi a kapanunotan.—Prov. 18:1.
3 Pakasursuruan: Dagiti Nakristianuan a gimong mangipaayda iti agtultuloy a programa ti panangisuro maipapan iti Biblia a nadisenio tapno masalimetmetantay a nabiag iti pusotayo ti ayattay iti Dios. Mangtedda iti praktikal a panangiwanwan iti panangyaplikar iti “isuamin a pammatigmaan ti Dios.” (Ara. 20:27) Dagiti gimong sanayendatayo iti arte ti panangasaba ken panangisuro iti naimbag a damag, dagiti laing a nangnangruna a kasapulan itan tapno masagraptayo ti di mailadawan a rag-o iti panangbirok ken panangtulong kadagidiay mangawat iti kinapudno nga adda iti Biblia.
4 Pakasalakniban: Iti daytoy nadangkes a lubong, ti kongregasion ket pudno a naespirituan a pagkamangan—pakasarakan iti talna ken ayat. No tumabunotayo kadagiti gimong ti kongregasion, nabileg ti impluensia ti nasantuan nga espiritu ti Dios kadatayo, a mangpataud kadagiti bunga nga “ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel.” (Gal. 5:22, 23) Dagiti gimong pakirdendatayo nga agtakder a sititibker ken maaddaan iti nabileg a pammati. Dagitoy ti mangkabal kadatayo tapno sisasaganatayo kadagiti pakasuotan a dumteng.
5 Babaen ti regular a pannakigimong, matagiragsaktayo ti dineskribir ti salmista a kas nailanad iti Salmo 133:1, 3: “Kitaenyo, nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!” Sadinoman a pagserbian ken paggigimongan ita ti ili ti Dios, “sadiay inkumit ni Jehova ti bendision, ken biag iti agnanayon.”