Masapul a Mangngegan Dagiti Kaarrubatayo ti Naimbag a Damag
1 Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) “Dagiti amin a kita ti tattao” ramanenna amin a kaarrubatayo. Ti panangidanon iti naimbag a damag kadakuada kalikagumanna ti nadumaduma a kita ti presentasiontayo ken pannakaseknan iti paginteresan ti kada tao a maam-ammotayo. (1 Cor. 9:19-23) Nangipaay ti organisasion ni Jehova kadagiti alikamen a makatulong kadatayo a mangdanon iti puspuso dagidiay “siuumiso a maikari iti agnanayon a biag.” (Ara. 13:48) Kitaentayo no kasanotay a mausar ti nadumaduma a broshur kabayatan ti Hulio ken Agosto a mangipaay kadagiti naespirituan a kasapulan dagiti kaarrubatayo.
2 Dagiti Tampok a Broshur: Nailista iti baba dagiti singasing a mabalin a makatulong no iparangyo dagiti broshur. Kada singasing ramanenna ti (1) mamagpanunot a saludsod a pangirugi iti saritaan, (2) reperensia a pakasarakan kadagiti punto a mapagsasaritaan iti broshur, ken (3) maitutop a kasuratan a mabalin a basaen kabayatan ti saritaan. Mabalinyo a buklen ti presentasion iti bukodyo a sasao, sigun iti reaksion ti tao. Iti kaaduan kadagiti broshur, nadakamat ti napalabas a ruar Ti Ministeriotayo iti Pagarian a pakasarakanyo iti ad-adda a detalyado a panangipresenta iti broshur.
Pudno Aya a Maseknan ti Dios Kadatayo?
Ania a namnama ti pagarupenyo a makatulong kadagiti tattao a nagsagaba iti pannakaabuso?—Panid 27-8, parapo 23-7; Isa. 65:17, 18; km 7/97 p. 4.
Ania ti Panggep ti Biag—Kasanoyo a Masarakan Dayta?
Apay a nakaad-adu a tattao itatta ti di mapnek iti biagda?—Panid 29-30, parapo 2, 25-6; Sal. 145:16; km 7/96 p. 4.
Tagiragsakenyo ti Biag nga Agnanayon Ditoy Daga!
Pinampanunotyo kadin no aniat’ ar-aramiden ni Jesu-Kristo itatta?—Dagiti ladawan iti 41-2; Apoc. 11:15; km 8/96 p. 8.
Ti Gobierno a Mangiyegto iti Paraiso.
Kayatyo kadi a maammuan ti maipapan iti Pagarian nga insuro ni Jesus nga ikararagtayo?—Panid 3; Mat. 6:9, 10; km 8/96 p. 8.
No Adda Matay nga Ay-ayatenyo.
Pinampanunotyo kadin no kasano a liwliwaen ti maysa a natayan iti patpatgen?—Panid 26, parapo 2-5; Juan 5:28, 29; km 7/97 p. 4.
Rumbeng Aya a Patienyo ti Trinidad?
Napateg kadi iti masakbayantayo ti pannakatarustay iti pudno a kinasiasino ti Dios?—Panid 3, parapo 3, 7-8; Juan 17:3.
3 Broshur a Mangpabileg Pammati iti Biblia: Iti “Pammati iti Sao ti Dios” a Kombension Distrito idi Disiembre ken Enero, inawattayo ti baro a broshur a napauluan Libro Para iti Amin a Tao. Yantangay ditay pay intukon daytoy a broshur iti tay-ak sipud iti pannakairuarna, nagsayaat a gundaway ti kampania iti Hulio ken Agosto a panagiwaras iti daytoy a broshur idiay tay-ak. Yantangay baro, makaguyugoy la ketdi dayta kadagidiay nakabasan kadagiti immun-una a broshurtayo ket kayatda ti maaddaan iti amin a kaudian a publikasiontayo.
4 Naisagana daytoy baro a broshur a pangtulong kadagiti tattao a mabalin a de adal ngem bassit ti ammoda maipapan iti Biblia. Nairanta dayta a manggutugot kadakuada a mangsukimat iti Sao ti Dios. No itukonyo daytoy a broshur, mabalin a kayatyo nga usaren ti sumaganad a singasing:
Libro Para iti Amin a Tao.
Umanamongkay kadi a ti pananggun-od iti naan-anay nga edukasion ramanenna ti pananggun-od iti pannakaammo a linaon ti Biblia?—Panid 3, parapo 1-3 ken panid 30, parapo 2; Ecl. 12:9, 10.
5 Broshur a Pangyadal iti Biblia: Kanayon koma a ti panggeptayo iti ministerio ket mangirugi iti panangyadal iti Biblia, iti man damo a pannakisarita wenno iti sumaganad nga isasarungkar. Iti dayta a panggep, addaantayo iti nalaka nga usaren a broshur a pangirugi ken pangidaulo kadagiti panangyadal iti Biblia iti pagtaengan:
Ania ti Kalikaguman ti Dios Kadatayo?
Ammoyo kadi nga iti 30 a minuto wenno nakurkurang pay iti kada lawas kabayatan ti 16 a lawas, mabalinyo ti maaddaan iti pamunganayan a pannakaawat iti Biblia?—Leksion 2, parapo 6; 2 Tim. 3:16, 17; km 3/97 p. 4.
6 Iti ilustrasion maipapan iti naasi a Samaritano, pinagminar ni Jesus a ti pudno a kaarruba ket daydiay naayat ken naasi a tumulong iti sabali nga addaan iti pakarigatan. (Luc. 10:27-37) Adda iti naespirituan a pakarigatan dagiti kaarrubatayo. Masapul a mangngegda ti naimbag a damag. Ibaklaytayo ti responsabilidad a mangiburay iti dayta kadakuada, iti kasta maipaneknektay ti bagbagitayo kas napaypayso nga adalan ni Jesu-Kristo.—Mat. 24:14; Gal. 5:14.