No Kasano nga Agtitinnulong Dagiti Miembro ti Pamilia Tapno Makiramanda a Naan-anay—Kadagiti Gimong ti Kongregasion
1 Masapul nga ipangag dagiti Nakristianuan a pamilia ti bilin nga agtataripnong kadagiti gimong ti kongregasion. (Heb. 10:24, 25) No adda nasayaat a panagtitinnulong, agballigi dagiti isuamin nga agsagana, tumabuno, ken makiraman kadagiti gimong. Nagduduma dagiti sirkumstansia iti pamilia, ngem adda bambanag a mabalin nga aramiden ti Kristiano nga asawa a lalaki, ti manamati nga asawa a babai, wenno ti agsolsolo a naganak a mangparang-ay iti panagtitimpuyog ti pamilia kadagiti naespirituan a bambanag, uray no mano ti bilang ken edad dagiti annakda.—Prov. 1:8.
2 Ilugaranyo ti Agsagana: Agtitinnulong dagiti kameng ti pamilia tapno masiguradoda a nakasagana a naimbag ti tunggal maysa kadagiti gimong ti kongregasion. Adu dagidiay mangadal a sangsangkamaysa iti artikulo nga adalen iti linawas a Panagadal iti Pagwanawanan. Dagiti dadduma isaganada ti Panagadal iti Libro ti Kongregasion wenno basaenda ti nayeskediul a linawas a panagbasa iti Biblia a sangapamiliaan. Kalatda nga imula dagiti kangrunaan a punto iti panunotda sakbay a makigimongda. Iti kasta, ad-adda a mabenepisiaran dagiti isuamin iti mangngegda ket sidadaandanto a makiraman no adda gundaway.—1 Tim. 4:15.
3 Iplanoyo ti Makiraman: Addaan koma ti kalat ti tunggal kameng ti pamilia a mangideklara iti namnamana iti imatang dagiti sabsabali babaen ti panagkomentona kadagiti gimong. (Heb. 10:23) Masapul kadi ti maysa a kameng ti pamilia ti tulong wenno pammaregta tapno maaramidanna daytoy? Ania a tulong ti kasapulan ti tunggal maysa iti panagisagana kadagiti paset iti Teokratiko nga Eskuelaan ti Panagministro? Maragsakan dagiti babbai no tumulong dagiti assawada ken nalabit mangisingasingda iti maikanatad nga ilustrasion wenno praktikal a setting. Saan koma nga ipapan dagiti nagannak nga isuda ti rumbeng a mangisagana iti paset dagiti ubbing nga annakda. Maikkat ti interes dagiti ubbing no kasta ti aramidenda. Ngem mabalin a tulongan dagiti nagannak dagiti annakda ket denggenda ida bayat nga agensayoda a sipipigsa.—Efe. 6:4.
4 Organisado a Tumabuno: Masursuruan dagiti ubbing manipud kinaganus nga agsukat ken agrubbuat a makigimong iti naituding a tiempo. Masapul a makitinnulong dagiti kameng ti pamilia a mangasikaso kadagiti trabaho iti balay tapno awan pakataktakan.—Kitaenyo dagiti singasing iti libro a Kinaragsak iti Pamilia, panid 112, ken Saludsod nga Iyimtuod ti Agtutubo, panid 316-17.
5 Utoben nga agpadpada dagiti nagannak ken annak ti sasao ni Josue idi ugma, a nagkuna: “Ngem siak ken ti balayko, agserbikamto ken Jehova.” Ket determinadokayo koma a makitinnulong tapno makiramankayo a naan-anay kadagiti gimong ti kongregasion.—Jos. 24:15.