Agplano a Nasakbay!

¹ Mangisagsagana ti organisasion ni Jehova iti regular a programa dagiti teokratiko nga aktibidad a nairanta a mangpunno kadagiti naespirituan a kasapulantayo. Ti panangapresiar tignayennatayo a mangaprobetsar a naan-anay iti amin a nayurnos, kas kadagiti panagbisita ti agdaldaliasat a manangaywan, dagiti asamblea ken kombension, ken dadduma pay a naisangsangayan nga aktibidad a naiplano iti lokal. (Mat. 5:3) Nupay kasta, adu kadagitoy a naespirituan a probision ti pakaikapkapisan ti dadduma gapu kadagiti sabali a banag nga implanoda. Aniat’ maaramidan tapno saantayo a maikapis? Kasanotay a siguraduen a dagiti di nateokratikuan nga aktibidad ket dida masinga “dagiti napatpateg a bambanag”?​—Fil. 1:10.

² Nasken ti Nainsiriban a Panagplano: Ibalakad ti Proverbio 21:5, NW: “Dagiti gakat daydiay naganetget sigurado a mamagbalin a pagsayaatan, ngem ti tunggal maysa a nadarasudos sigurado nga agturong iti panagkasapulan.” Tapno magun-od ti naespirituan a “pagsayaatan,” masapul a ganetgetantayo ti agplano a nasakbay, a sipapanunottayo kadagiti nayurnosen a teokratiko nga aktibidad. Iyeskediultay koma dagiti personal nga aktibidadtayo iti tiempo a saan a masinga ti panagapittayo kadagiti naespirituan a bendision. No nadarasudostayo nga agplano kadagiti banag a kayattay nga aramiden, a ditay pampanunoten dagiti mapasungad a teokratiko nga okasion, nalabit aglak-amtayto iti naespirituan a “panagkasapulan.”

³ Diyo Itulok a Maikapiskayo! Agpalplanotayo amin para iti masanguanan, a karaman dita ti panagbakasion, biahe a maigapu iti negosio, ibibisita kadagiti kabagian, ken dadduma pay. Sakbay a makitulagkayo wenno sakbay a mangaramidkayo iti masnup a plano, kitaenyo ti eskediul dagiti mapasungad a naespirituan nga aktibidad. No maammuanyo nga umay ti manangaywan iti sirkito wenno maigiddan ti eskediul ti asamblea iti tiempo nga ipapanawyo, ikagumaanyo nga iyurnos dagiti personal nga aktibidadyo tapno dikay maikapis. Mapakaammuantayo a nasaksakbay maipapan kadagiti kangrunaan nga okasion a nayeskediul iti masanguanan. Pakaammuandakayo dagiti panglakayen iti kongregasionyo no ania dagiti lokal a plano.

⁴ Babaen ti nasakbay a panangpampanunot ken panangiplano kadagiti napatpateg a bambanag, ‘mapunnotayto iti nalinteg a bunga, . . . maipaay iti dayag ken pakaidayawan ti Dios.’—Fil. 1:11.