Ania Dagiti Planoyo iti Tiempo ti Bakasion?

No panunotentayo ti bakasion, mapanunottayo ti nabara a panniempo ken plano iti panaglinglingay wenno nasayaat nga ibibisita kadagiti kabagian ken gagayyem. No iplanoyo ti bakasionyo, adtoy ti sumagmamano a palagip a tumulong kadakayo a kanayon a mangyun-una kadagiti interes ti Pagarian:

◼ No agbakasionkayo iti adayo, iplanoyo ti tumabuno kadagiti gimong iti lokal a kongregasion ken makiramankayo iti ministerio. Siguraduenyo nga iyawat dagiti reportyo ti serbisio; no kasapulan, ikoreoyo iti sekretario ti kongregasionyo.

◼ Ti ibibisita kadagiti kabagian nga awan iti kinapudno ikkannakayo iti gundaway a mangted ti impormal a pammaneknek. Siguraduenyo nga itugot ti Biblia ken dagiti literaturayo.

◼ Napanunotyo kadi ti tumulong iti kabangibang a kongregasion nga agkasapulan ti bádang a mangwanas iti teritoriada? Kasaritayo dagiti panglakayen wenno ti manangaywan ti sirkito tapno maimpormarankayo maipapan kadagiti kasapulan iti lugaryo.

◼ Mangted iti naimbag nga oportunidad kadagiti agtutubo a mangpalawa iti serbisioda ti bakasion iti eskuelaan. Dakayo nga agtutubo, mabalinyo kadi ti agpalista kas auxiliary payunir?

◼ No nasayaat ti panniempo ken at-atiddog ti aldaw, makagun-odkayo ti naimbag a resulta babaen ti ad-adu a panangasaba iti rumabii no adda dagiti tattao iti taengda.

◼ Alerto koma dagiti panglakayen a mangtaginayon nga organisado dagiti aktibidad ti kongregasion, a mayurnos ti mangtaming kadagiti rebbengen a naituding kadagidiay pumanaw.

Laglagipenyo a “dagiti pampanunot ti nagaget a tao ket sigurado nga agduyos iti panagrang-ay.” (Prov. 21:5) Agplanokayo tapno mausaryo a nainsiriban ti bakasionyo.