Ti Teokratiko nga Eskuelaan ti Panagministro Para iti 2000
1 Ti Teokratiko nga Eskuelaan ti Panagministro ket napaneknekan a nabaknang a bendision iti ili ni Jehova. Iti napalabas a 50 a tawen, minilion ti natulonganna a nangparang-ay iti abilidadda nga agpalawag iti publiko ken mangisuro kadagiti kinapudno iti Biblia. (Sal. 145:10-12; Mat. 28:19, 20) Makitayo kadi no kasano a natulongannakayo dayta nga eskuelaan? Agtultuloy a matulongannakayo kabayatan ti tawen 2000 no makipasetkayo a naan-anay iti dayta ken iyaplikaryo ti maibalakad.
2 Dagiti instruksion maipapan iti paspaset ken dagiti publikasion a mausarto ket nailista iti umuna a panid ti eskediul ti eskuelaan para iti tawen 2000. Nailawlawag sadiay ti kapaut ti kada paset, ti pakaadawan ti material, no kasano a maiparang ti material, ken dadduma pay a detalye. Pangngaasiyo ta iwayaanyo a basaen a naimbag dagiti instruksion ket iyaplikaryo dagita.
3 Linawas a Panagbasa iti Biblia: Adda dua nga agduma a programa para iti linawas a panagbasa iti Biblia a nailista iti eskediul ti eskuelaan. Ti maysa isu ti gagangayen a programa ti panagbasa a mangsaklaw iti agarup lima a panid ti Biblia. Dagiti tampok iti Biblia ket maibatay iti daytoy a panagbasa. Ti sabali pay a programa ti panagbasa ket kanayonan ken doble ti kaadu ti material a saklawenna. Babaen ti panangsurot iti daytoy a programa, mabasayonto ti intero a Biblia iti tallo a tawen. Siempre mabalin nga adda dagiti mayat a mangbasa iti ad-adu pay ngem iti nakaeskediul iti kanayonan a programa, ken mabalin nga adda dadduma a di makasurot iti dayta. Imbes nga idiligyo ti bagiyo kadagiti sabsabali, pagrag-oanyo no ania ti kabaelanyo nga aramiden. (Gal. 6:4) Ti napateg ket basaenyo nga inaldaw ti Sao ti Dios.—Sal. 1:1-3.
4 Tapno makapagpasalistakayo iti Teokratiko nga Eskuelaan ti Panagministro, makisaritakayo iti manangaywan ti eskuelaan. Pangngaasiyo ta matmatanyo a siseserioso dagiti pasetyo, ket saanyo a basta kanselaren lattan dagita. Apresiarenyo ti eskuelaan kas maysa a probision ni Jehova. Agsaganakayo a naimbag, kabesaduenyo ti naituding a material, ken agsaokayo a naimpusuan, iti kasta magunggonaankayo a naan-anay iti daytoy naisalsalumina nga eskuelaan.