Ania ti Makatulong Kadatayo nga Agtakder a Sititibker iti Pammati?
1 Sipud idi rugiantayo ti makitimpuyog iti organisasion ni Jehova, nagbalin a gubuayan ti rag-otayo ti naespirituan nga irarang-aytayo! Nupay kasta, tapno makapagtalinaedtay a ‘naparamut, napadakkel, ken napatibker iti pammati,’ nasken ti agtultuloy a naespirituan nga irarang-ay. (Col. 2:6, 7) Nupay kaaduan ti rimmang-ay iti naespirituan, addada dagiti nayayus gapu ta saanda a ‘nagtakder a sititibker iti pammati.’ (1 Cor. 16:13) Maliklikantayo daytoy. Kasano?
2 Agtultuloy a Naespirituan nga Aramid: Mangipasdek iti nasayaat a naespirituan a rutina iti uneg ti organisasion ni Jehova. Maipapaay ditoy ti nawadwad a naespirituan a kasapulantayo. Dagiti gimong ti kongregasion, asamblea, ken kombension gutugotendatayo nga ad-adda pay a rumang-ay ken tumibker iti naespirituan, no la ketdi ta kanayon a tumabunotayo tapno agapit kadagiti gunggona. (Heb. 10:24, 25) Ti regular a rutina a panagbasa iti Biblia, dagiti magasin a Pagwanawanan ken Agriingkayo!, ken dagiti libro a mangilawlawag kadagiti nakired a taraon iti Sao ti Dios paunegen ken palagdaenda dagiti naespirituan a ramuttayo. (Heb. 5:14) Mangyeg met kadagiti manayon a gunggona ti panangyurnos kadagiti personal a naespirituan a kalat sa saetan a ragpaten dagita.—Fil. 3:16.
3 Tulong Manipud Kadagiti Nataengan: Ikagumaanyo ti makitimpuyog nga ad-adda pay kadagiti nataengan iti naespirituan iti kongregasion. Am-ammuenyo dagiti panglakayen, yantangay isuda ti kangrunaan a makapabileg kadatayo. (1 Tes. 2:11, 12) Awatenyo ti aniaman a balakad wenno singasing nga itukonda. (Efe. 4:11-16) Interesado met dagiti ministerial nga adipen a tumulong kadagiti sabsabali a tumibker iti pammati, isu a namnamaenyo a maparegtadakayo dagitoy a kakabsat.
4 Kasapulanyo kadi ti tulong iti ministerio? Kasaritayo dagiti panglakayen, ket agpatulongkayo. Nalabit mairamankayo iti programa a Panangtulong Dagiti Payunir Kadagiti Sabsabali. Kababautisaryo aya? Ti panangadal iti libro a Ti Ministeriotayo ken panangyaplikar kadagiti linaonna ket tumulong iti panagrang-ay iti naespirituan a kinanataengan. Maysakayo aya a naganak? Itultuloyyo a pabilgen ti espiritualidad dagiti annakyo.—Efe. 6:4.
5 Babaen ti pannakairamut ken pannakapatibker iti pammati, matagiragsaktayo ti nasinged a relasion ken Jehova ken ti nabara a pannakitimpuyog kadagiti kakabsattayo. Daytoy ti tumulong kadatayo a mangdaer kadagiti panangraut ni Satanas, ken pabilgenna ti namnamatayo nga agnanayon a masanguanan.—1 Ped. 5:9, 10.