Ikasabatayo ti Naimbag a Damag
1 Anian a naindaklan a pribilehiotayo ti mangawit iti “naimbag a damag dagiti naimbag a bambanag!” (Roma 10:15) Addaantayo iti makapabang-ar a mensahe nga iburay kadagiti tattao a mariribukan ken awanan namnama. Kasanotayo a matulongan ida a mangbigbig nga adda ituktukontayo a “naimbag a damdamag ti kinaimbag”?—Isa. 52:7.
2 Mangisagana iti Positibo a Mensahe: Nasayaatto ti epekto ti pannakisaritatayo iti ministerio no ipamaysatayo dayta kadagiti makapabileg a bambanag. Gapuna, kabayatan ti panangisagana iti presentasiontayo ken panangrepaso iti publikasion nga itukontayo, nasken a pagminarentayo dagiti positibo nga aspeto ti mensahe. Babaen ti panangiburay iti naibatay-Biblia a namnamatayo a buyogen ti panagtalek ken kinagagar, mainanamatayo dagiti makaparegta a resulta.—Prov. 25:11.
3 Nupay makipagriknatayo no iyebkas dagiti tattao ti pannakaapektarda kadagiti dumegdegdeg a kasasaad ti lubong, ipakitatayo koma kadakuada a ti Pagarian ti Dios ti napaypayso a solusion dagiti parikut ti tao. Uray no ibagbagatayo ti umad-adanin nga “aldaw ti ibabales” ni Jehova, kayattayo nga ipakita no kasano a ti talaga a kaipapanan daytoy ket “naimbag a damag kadagiti naemma.” (Isa. 61:1, 2) Mabalintayo nga ipanamnama kadagiti agdengdengngeg nga amin nga aramiden ni Jehova ket mangibunganto kamaudiananna iti kararagsakan ken kasayaatan a resulta.
4 Idatag ti Kinapudno Buyogen ti Napaypayso a Rag-o: No madlaw dagiti tattao ti rag-o ken kompiansa ti panagsaotayo, ad-adda a sidadaanda nga agdengngeg. No iyanninawtayo ti positibo a panangmatmat, matarusanto dagiti agdengdengngeg a ‘pagrag-oantayo ti namnama.’ (Roma 12:12) Iti kasta, nalabit ad-adda nga ipangagda ti naimbag a damag. Wen, addaantayo iti nasayaat a rason a kanayon a mangipakita iti positibo, naragsak a kababalin iti tunggal aspeto ti ministeriotayo.
5 Kas ministro ti naimbag a damag, saan laeng a basta agipakaammo ti trabahotayo. Ti panangasabatayo iburayna ti sigurado a namnama maipapan iti nasaysayaat a biag itan ken iti masanguanan. (1 Tim. 4:8) Bayat nga asitgantayo ti kada tao, ti positibo a panagpampanunottayo ket mayanninaw iti ibagbagatayo ken tulonganna dagiti tattao a mangawat iti naimbag a damag. Babaen ti panangutobtayo iti ibagatayo ken no kasanotay nga ibaga dayta, paregtaentay koma dagiti nasingpet ti panagpuspusoda tapno awatenda ti makapagagar a naimbag a damag nga ikaskasabatayo!