Tuladenyo ti ‘Naragsak a Diostayo’ a ni Jehova
1 Pudno unay a kayat ni Jehova a naragsak dagiti adipenna. Paggagarennatayo ti Saona a mangsegga kadagiti nakaskasdaaw a bendision nga insaganana agpaay iti sangatauan. (Isa. 65:21-25) Masapul a nabatad kadagiti sabsabali a pagragsakantayo nga iranud kadakuada ti “nadayag a naimbag a damag ti naragsak a Dios.” (1 Tim. 1:11) Ti wagas a panangisarsaritatayo iti mensahe ti Pagarian rumbeng nga iparangarangna ti panagayattayo iti kinapudno ken iti napaypayso a pannakaseknantayo kadagiti tattao a makasaritatayo.—Roma 1:14-16.
2 Agpayso a narigat no dadduma a taginayonen ti naragsak a kababalin. Iti dadduma a teritoria, sumagmamano laeng a tattao ti dumngeg iti mensahe ti Pagarian. Mabalin nga adda met dagiti tiempo a maipasangotayo a mismo kadagiti narigat a kasasaad iti biag. Tapno agtalinaedtayo a naragsak, nasayaat no laglagipentayo a nasken a mangngeg ken matarusan dagiti tattao iti teritoriatayo ti ikaskasabatayo a naimbag a damag maipapan iti Pagarian. (Roma 10:13, 14, 17) Ti panangutob iti daytoy tulongannatayo nga agtalinaed a naragsak iti panangipakaammo kadagiti naasi a probision ni Jehova agpaay iti pannakaisalakan.
3 Ipamaysayo Dagiti Naimbag a Bambanag: Nasken a naannadtayo met iti ibagatayo. Nupay mabalin nga irugitayo ti saritaan babaen ti panangdakamat iti maysa a parikut wenno damdamag nga ammo dagiti tattao, masapul a liklikantayo nga ipamaysa ti saritaan kadagiti negatibo a bambanag. Ti annongentayo ket iyeg ti “naimbag a damag ti maysa a banag a nasaysayaat.” (Isa. 52:7; Roma 10:15) Daytoy a naimbag a damag isu ti mensahe a naibatay kadagiti kari ti Dios mainaig iti naranraniag a masakbayan. (2 Ped. 3:13) Bayat a sipapanunottayo iti daytoy, usarentayo ti Kasuratan a “mangpatapat iti nasnaayan ti pusona.” (Isa. 61:1, 2) Daytoy ti tumulong iti tunggal maysa kadatayo a mangtaginayon iti naragsak ken positibo a kababalin.
4 Sigurado a madlaw dagiti tattao ti naragsak a kababalintayo bayat a makiramramantayo iti trabaho a panangasaba. Gapuna, kanayon koma nga iparangarangtayo ti kababalin ti ‘naragsak a Diostayo’ a ni Jehova bayat nga iranranudtayo ti naimbag a damag ti Pagarian kadagiti tattao iti teritoriatayo.