Panagadal iti Padto ni Daniel
1 Mangrugi iti lawas ti Abril 17, adalentayto ti Ipangagyo ti Padto ni Daniel! iti Panagadal iti Libro ti Kongregasion. Adun ti nakabasa iti daytoy makapainteres unay a libro, ngem ita addaantayo iti gundaway a mangtagiragsak kadagiti pagimbagan nga ipaay ti grupo a panangusig iti material. Amin nga agibumbunannag, interesado a tattao, ken ub-ubbing ket maawis ken maparegtada a tumabuno iti linawas iti daytoy naannad a pannakaadal ti libro ti Biblia a Daniel.—Deut. 31:12, 13.
2 Eskediul ti Panagadal ken Dagiti Instruksion: Adda iti daytoy a ruar ti Ministeriotayo iti Pagarian ti kompleto nga eskediul ti panagadal iti libro a Padto ni Daniel. Siguraduenyo nga adda kopia a mairagpin iti libro a pagadalanyo. Ipakita ti eskediul ti kapitulo ken dagiti parapo iti libro agraman dagiti bersikulo iti Daniel a mausig iti linawas a sesion. Ilawlawag dagiti footnote no kasano ken kaanonto a mausig ti dadduma kadagiti material iti libro. Iti ngudo ti kada linawas a panagadal, maparegta ti konduktor a mangirepaso iti grupo dagiti espesipiko a bersikulo manipud iti Daniel a nailista iti eskediul iti dayta a lawas. No ipalubos ti oras, mabalin a mabasa ken makomentuan dagiti bersikulo. Dadduma a bersikulo ti maituloy a masaklaw iti sabali a lawas gapu iti agtultuloy a panangusig iti kaitungpalanda.
3 Agsagana Para iti Detalyado a Panagadal: Naikagumaan ti pannakayurnos ti umdas a tiempo iti kada lawas tapno saan nga agap-apura ti panangusig iti naituding a material. Medio ababa dagiti uppat a leksion. Gapuna, iti ngudo ti panagadal iti lawas ti Hunio 5, mabalin nga iraman ti konduktor ti pannakarepaso ti Daniel 2:1-40. Iti lawas ti Hunio 26, mabalinna nga irepaso ti Daniel 3:1-30. Mairaman iti lawas ti Setiembre 4 ti detalyado a panangusig kadagiti ilustrasion ken teksto iti panid 139. Mapagsasaritaan ti tsart iti panid 188 ken 189 iti panagadal iti lawas ti Oktubre 2.
4 Agsagana a naimbag para iti panagadal iti kada lawas, ket tagiragsakenyo ti makiraman. Apresiarenyo ti pribilehio a pannakitimpuyog iti makitkita nga organisasion ni Jehova ken ti pannakagun-odyo kadagiti gunggona manipud iti nauneg a pannakaawat ken panangilawlawag nga ipapaay dagiti matalek a pinulotanna. (Dan. 12:3, 4) Siaanus a paregtaenyo dagiti sabsabali a tumabuno a regular iti panagadal iti libro. Sapay koma ta ipangagtayo amin ti naimpadtuan a sao ti Dios a naipalgak iti nakaskasdaaw a libro ni Daniel.—Heb. 10:23-25; 2 Ped. 1:19.