Adalentayto ti Libro a Kinaragsak iti Pamilia
Maragsakankayo a makaammo a mangrugi iti lawas ti Oktubre 6-12, 1997, adalentayto ti libro a Ti Sekreto ti Kinaragsak iti Pamilia iti Panagadal iti Libro ti Kongregasion. Awan ti mayat a maikapis iti panagadal ti grupo iti daytoy praktikal a Nainkasuratan a giya iti naragsak a biag ti pamilia. Ti eskediul iti panagadal mangipaay iti umdas a tiempo tapno masukimat a naan-anay ti tunggal parapo ken teksto ti Biblia iti libro.
Mausig ti intero nga umuna a kapitulo iti umuna a lawas ti panagadal, yantangay bassit laeng ti linaonna a di naadaw a kasuratan. Dayta met laeng ti rason no apay a mausigto ti kapitulo 15 iti maminpinsan. Nupay kasta, amin dagiti dadduma a kapitulo mabingay iti dua a paset, nga agarup kagudua ti kapitulo ti mausig iti kada lawas. Gapuna, addanto umdas a tiempo a panangbasa ken panangusig iti amin a naisitar a kasuratan kasta met ti naannad a panangsukimat iti pakayaplikaran amin a naadaw a kasuratan iti kada parapo.
Ti napateg a paset ti panagadal ket ti panangusig iti material nga adda iti pangrepaso a kahon iti ngudo ti kada kapitulo. Gapuna, maipaayan koma iti nawadwad a tiempo tapno mausig dagiti saludsod ken naisitar a kasuratan iti kahon.
Maidagadag kadagiti konduktor ti Panagadal iti Libro ti Kongregasion a mangipaayda iti naisangsangayan nga atension iti panagsagana para iti panagadal ken paregtaenda amin a naitimpuyog iti grupoda, agraman dagiti kabbaro, tapno agsaganada a naimbag ken tumabunoda a regular.—om 74-6.