Paset 4—Panangikondukta Kadagiti Progresibo a Panagadal iti Biblia
Panangsanay Kadagiti Estudiante nga Agsagana
1 Alisto a rumang-ay iti naespirituan ti estudiante a mangbasa a nasaksakbay iti leksion, manguged kadagiti sungbat, ken mangpanunot no kasano nga iyebkasna dagita iti bukodna a sasao. Gapuna, no naipasdeken ti regular a panagadal, duakayo a mangisagana iti leksion tapno maipakitayo iti iyad-adalanyo no kasano ti agsagana. Iti kaaduan a mayad-adalan, makatulong no duakayo a mangisagana iti intero a kapitulo wenno leksion.
2 Pananguged ken Panaginotar: Ilawlawagmo no kasano a biroken dagiti direkta a sungbat dagiti nakaimprenta a saludsod. Ipakitam iti iyad-adalam ti bukodmo a kopia ti publikasion a pagad-adalanyo a dagiti laeng kangrunaan a sasao ti inugedam. Bayat nga usigenyo ti material, mabalin a kayatnaka a tuladen, nga ugedanna iti bukodna a kopia dagiti laeng napateg a sasao a tumulong kenkuana a manglagip iti sungbat. (Luc. 6:40) Sa kiddawem kenkuana a sumungbat iti bukodna a sasao. Daytoy ti tumulong kenka a mangkita no natarusanna a naimbag ti material.
3 Ti naannad a panangsukimat kadagiti saan a nakotar a teksto ket napateg a paset ti panagsagana ti estudiante para iti panagadal. (Ara. 17:11) Tulongam a mangkita a ti tunggal naisitar a teksto pasingkedanna ti punto iti parapo. Ipakitam kenkuana no kasano ti aginotar iti ababa iti pingir ti panid ti ad-adalenyo a publikasion. Ipaganetgetmo a ti Biblia ti nakaibatayan ti ad-adalenna. Iparegtam nga agusar kadagiti naisitar a teksto no agkomento bayat ti panagadal.
4 Panangkita iti Pakabuklan ti Leksion ken Panangrepaso: Sakbay nga irugi ti estudiante ti detalyado a panagsagana ken panangadalna iti material, makatulong kenkuana no ammona ti pakabuklan ti leksion. Ibagam kenkuana a mabalinna a kitaen ti pakabuklan ti material babaen ti panangusigna iti apagbiit iti paulo ti kapitulo, dagiti subtitulo, ken ilustrasion. Ilawlawagmo a sakbay nga ileppasna ti panagsaganana, nasayaat no iwayaanna a repasuen dagiti kangrunaan a punto a naidatag iti leksion, a nalabit usarenna ti kahon a pangrepaso no adda. Ti kasta a panangulit ti tumulong kenkuana tapno saanna a malipatan ti impormasion.
5 Ti panangsanaymo iti iyad-adalam nga agsagana a naimbag iti panagadalna ket makatulong tapno makaipaay kadagiti nabagas a komento kadagiti gimong ti kongregasion. Makatulong met dayta kenkuana a mangpatanor kadagiti ugali iti panagadal a makagunggonanto kenkuana uray no nabayagen a nalpas ti panagadalyo iti Biblia.